少年成長今日: 1|主題: 15858

收藏本版

回覆發帖

返回列表

跳至頁

查看: 25970 | 回覆: 0

唔合格 [複製鏈接]

csir3290

子爵府

積分: 10994

1^#

發表於 23-10-8 12:00 |只看該作者 |倒序瀏覽 |打印

本帖最後由 csir3290 於 23-10-12 16:36 編輯

早兩日細佬又係喺我啱啱返到屋企嘅時候就同我講佢中文默書唔合格，其實佢講之前我見到佢都好似面有難色咁，講完又好似好尷尬，其實都知佢好難為情。對於一個小學成績都算係幾好嘅學生嚟講，默書唔合格可能都好難開口同父母講。小學期間其實我老婆一路都有跟佢啲測驗默書咁，所以其實佢小學除咗一年班初頭嘅時候之外，一路佢啲默書成績其實都幾好，總之就未試過唔合格。所以佢今次中文默書唔合格，我哋都明白佢自己唔開心之餘，其實都好難開口同我哋講，因為佢今次默書係佢自己溫習，我同老婆都講因為上咗中學其實好多嘢都應該要自己學習自己跟，所以老婆就冇好似以前咁默書前要幫佢溫習，今次默書純粹都係佢自己溫。阿仔其實喺默書之前嘅兩個禮拜已經同我哋講話佢會默書，仲係背默而且係一篇文言文，份量畀佢小學嘅時候多咗少少，但係因為小學唔係成日話背默，所以可能佢有少少唔適應，而且再加上要背文言文添，佢話佢今次默書之所以唔合格係因為默漏咗成句所以唔合格。

我同老婆都知佢有啲唔開心可能驚我哋話佢啦，但係我同老婆都知道其實佢今次默書之前自己都有溫習，而且都有背書畀我同老婆聽，佢今次唔合格唔係因為佢懶唔溫習而造成，所以我同老婆都冇特別話佢，仲同佢講話我哋都知道佢有溫習今次默書唔合格可能係唔小心背漏咗嘢，我仲話畀佢聽我以前細個都有背默，但係就係擔心會默漏咗嘢，所以我細個嘅時候如果一背默我就會數句子，即係我會數下其實今次我要背嘅書總共有幾多句，到墨完之後就會數返究竟啱唔啱數，如果唔啱就會知道自己背漏咗嘢。我同佢講下次小心一啲，可以嘗試下我嘅方法睇下得唔得。細佬可能見我同老婆都冇話佢有啲出乎意料，所以佢又即刻滔滔不絕咁同我哋講咗好多佢溫習時嘅嘢，好快趣又變返平時嘅細佬。

有啲家長可能會覺得細路仔一向都成績好，默書唔合格可能好大件事，因為自細都未試過。好似我個仔咁，其實佢一向都算係成績好，但係佢嘅成績好其中一個好大原因就係我老婆會跟佢嘅功課同埋默書測驗，而家開始上到中學我老婆跟少咗，其實就係想慢慢放手等佢開始自己去溫習，同埋佢處理自己嘅默書測驗，啱啱開始總係要嘗試亦都會有做得唔好嘅時候，如果咁快就打沉佢嘅自信心，只係話佢，其實對佢嚟講根本就冇幫助。所以今次我哋就有一個明白嘅同埋諒解嘅態度去處理成件事，因為我哋知道阿仔根本自己就有溫習並唔係懶，所以鬧佢根本就冇用，反而體諒佢畀多啲信心佢，同時可以畀少少改善嘅建議反而對佢可能仲有幫助。如果經過今次嘅事件，汲取咗教訓下次有進步嘅話反而仲會增加咗佢嘅自信，慢慢就會越做越好。正如我之前都講，一向成績好嘅小學生當被派到去啲成績好嘅中學，以前小學可能佢係最叻嗰批，但係而家可能根本成級都係成績好嘅學生，自自然然出嚟嘅表現就可能冇以前咁好，咁並唔係因為要做得差咗，可能只係需要時間適應，而亦都可能而家佢身邊其他嘅同學都係以前小學嘅精英，而學校嘅課程亦都比以前深咗，所以出嚟觀感上就可能冇以前小學咁好。如果父母都仲係用返以前小學嘅標準去睇佢而家中學嘅情況，可能個細路仔就會有好多挫敗感。喺呢個時候其實家長最重要做嘅就係明白實際嘅情況，究竟係個細路仔懶咗呢？讀書嘅方法唔好呢？抑或可能只係客觀嘅情況係課程深咗呢？。如果家長都未了解清楚情況就只係用怪責嘅態度去處理，到頭來細路仔只會覺得父母唔明白，因為佢真係付出咗努力。既然付出咗努力都得唔到父母嘅體諒，父母只係在意眼前嘅分數，咁最終破壞親子關係之餘亦都唔能夠改善到學習同埋成績上面嘅問題。要處理仔女成績上面嘅問題需要父母係身邊嘅支持同埋幫佢一齊搵出改進嘅方法，先至有機會令到問題可以解決，同時亦都可以增進親子嘅關係。

0 0 0

私人傳訊回覆引用

跳至頁

返回列表

上一主題 • 下一主題

回覆

發帖

頻道

討論區

熱門搜尋：

少年成長 今日: 1|主題: 15858

少年成長今日: 1|主題: 15858