少年成長今日: 1|主題: 15863

收藏本版

回覆發帖

返回列表

跳至頁

查看: 5792 | 回覆: 0

傾想同你講 [複製鏈接]

csir3290

子爵府

積分: 11015

1^#

發表於 24-5-12 11:35 |只看該作者 |倒序瀏覽 |打印

好多家長都會面對一個問題，就係當仔女進入青春期嘅時候好似越嚟越難溝通，仔女返到屋企就好似唔識出聲一樣，家長講多句問多句就露出一副唔耐煩嘅表情。但相反啲仔女同啲同學朋友溝通就完全冇問題，仲雞啄唔斷好多嘢講。

但係面家長有冇諗過點解仔女同朋友咁多嘢講同自己有冇嘢講呢？有冇諗過其實同仔女講嘅通常係乜嘢話題，而仔女同朋友講嘅又係啲乜嘢話題呢？如果深入諗下，其實都會開始明白點解仔女同自己會越嚟越少嘢傾。因為家長始終都係家長，好多時甩唔到自己呢個身份，所以同仔女傾嘅時候好多時都係由問題開始，或者係見到仔女一啲唔順眼嘅嘢而出聲。好簡單一個諗法，如果父母都要返工，放工返到嚟自自然然就係關注仔女溫咗習未，有冇做功課咁。又或者就算係家庭主婦喺屋企都好，仔女返咗學全日，放學返到嚟，自自然然就問學校嘅情況，有冇溫習有冇功課做，除此之外就好少其他嘢講。又或者當講嘢時候，我哋做家長嘅通常都係用一個比較高高在上嘅語氣，總之家長講嘢仔女就要聽，叫佢做啲乜嘢就應該要按指示去做。但係想像一下我哋自己都做過細路仔，當我哋自己去到青春期嘅時候，係咪接受到呢啲語氣呢？其實只要諗下我哋自己細個嘅時候點解會覺得父母煩，就會明白而家啲細路仔點解會覺得我哋煩一樣。

細路仔點解可以同朋友有咁多嘢講，而同父母冇嘢講呢？我覺得最主要嘅問題就係啱唔啱傾，乜嘢係啱唔啱傾呢？就係究竟你知唔知佢哋諗乜嘢。佢哋啲朋友同埋同學大家都係差唔多年紀，自自然然就會好明白大家嘅諗法，有好多共鳴，同埋朋友同埋同學根本就唔會成日講到啲功課呀或者學業問題，更加唔會成日提住佢哋要做呢樣要做嗰樣，或者成日見到佢哋啲嘢篤眼篤鼻好多投訴咁。正所謂做朋友嘅啱傾就一齊唔啱傾就唔使做朋友，所以自自然然就當然覺得同朋友傾得開心好多啦！但係相反同家長可唔可以用到呢種心態去傾呢！

所以作為青春期仔女嘅家長，喺呢啲時間想同佢哋溝通得好啲嘅話，自自然然就應該要諗下點樣可以知道佢哋嘅諗法。我唔係話父母要放低自己嘅身份，就算見到唔啱嘅嘢都唔出聲。而係我哋要嘗試同仔女有多啲唔同嘅話題去傾，亦都要嘗試去明白佢哋嘅諗法。可能有家長都會聽過自己嘅仔女講，唔想講嘅原因係因為「講你都唔會明！」個問題嘅重點就在於細路仔覺得家長唔會明白佢哋嘅諗法，因為家長好多時同佢哋嘅所謂傾計都係用一啲批判嘅講法，喺家長嘅心目中只有啱同唔啱。所以啲細路仔覺得講嚟都冇用。作為家長正正就要明白點樣能夠講中或者明白仔女嘅諗法。呢個先至係最嘥時間，係要平時用好多心機用好多時間慢慢同佢哋去講嘢傾計，了解佢哋嘅心態先至可以慢慢明白佢哋嘅諗法。但係好多時家長因為平日工作繁重，經常掛喺嘴邊嘅冇時間，又或者覺得細路仔嘅諗法幼稚而唔去嘗試了解佢哋嘅諗法。如果我哋做家長嘗試諗下我哋以前嘅經驗，有陣時我哋唔想講嘅嘢，如果畀人講中咗我哋嘅諗法，我哋就會變得滔滔不絕好多嘢講，覺得搵到共鳴終於有人明白自己。其實同樣道理，仔女都係一樣，只要你能夠講中佢嘅心事，佢自自然然就好似打開咗道門咁好多嘢同你講！好似我自己對仔女咁，幸好到而家佢哋都仲好肯自己講佢哋學校發生嘅事或者係同同學之間發生嘅事，例如佢哋有陣時都會對學校或者老師有啲投訴，我哋唔需要第一時間覺得佢哋啲諗法唔啱，其實佢哋都只不過係想講下發洩下，只要我哋用返我哋自己做學生時候嘅心態，同佢哋講下聽下，佢哋就會滔滔不絕咁講。但係好多時如果放唔低家長嘅心態嘅話，我哋就會好快趣咁用批判嘅講法，覺得佢哋啲諗法唔啱，唔應該咁多投訴。試想像一下其實佢哋唔同我哋講，佢哋都會同同學講，同同學去講老師或者學校嘅嘢嘅時候，一定會得到好多認同因而好多嘢講落去。就係呢一個分別，所以仔女好多時就會覺得父母唔明白同佢哋，所以講都冇用。另一面好似我自己對仔女咁雖然我哋都覺得佢哋好乖，但係講真佢哋點樣都會有啲嘢做得唔係咁理想，例如最常見嘅就係啲嘢執得唔整齊，但係做家長嘅，見到少少都可能會篤眼篤鼻，仔女最常嘅回答就係「得啦得啦！」家長嘅期望就係得完即刻做！但係講真我哋都做過細嘅，就算父母成日係咁講，我哋又係咪真係會即刻做呢！所以我而家同自己對仔女相處，我哋都會盡量減少呢啲投訴，反而調返轉多啲欣賞佢哋做得好嘅地方，其實細路仔同大人都係一樣，需要多啲嘅欣賞同埋成功感！當大家嘅溝通入面少咗問題同少咗投訴，多啲其他嘅話題同埋多啲欣賞，自自然然大家嘅溝通就會容易啲。

講到最尾，其實想同自己嘅仔女溝通得好啲，其實我覺得最重要就係在於要明白佢哋嘅諗法，同講中佢哋嘅諗法。但係要做到一啲都唔容易，就係要睇家長肯唔肯放開，同埋肯唔肯擺時間嘗試慢慢去理解佢哋嘅諗法。