早排睇網上視頻,見到一位主婦教授日常省錢兼省時間方法,其中一項就係唔用電飯煲煮飯,改用普通鍋具煮,睇完後我好想仿傚。
一直以嚟,家中都係買大容量電飯煲,既可煮大煲粥,亦可煮大鑊飯。 由於容量大,無論所煮嘅份量多與少,一樣都要煮咁耐,間接耗電量就高咗。(試過按快速煮鍵,計過時間,仲耐過普通煮法,搵笨嘅!)
為咗能夠慳啲,於是我每次都會煮多飯,刻意留剩飯,第二日就唔駛再煮,只需煮餸,跟住叮熱啲飯又可解決一餐。
有時狼起上嚟,更會加個蒸籠一齊蒸嘢,時而蒸魚時而蒸蛋時而蒸肉時而蒸包。。。。。務求多功能唔好嘥。
儘管有時過於大堆頭,致使某啲食物未太熟透,要另行再蒸過,但起碼已縮短咗時間,相對上叫做慳咗,所以我依然物盡其用,最多提早煮飯,咁樣就可以藉由保溫時間長啲而將之徹底焗熟,唔駛另外再加工。
自從萌起要回歸基本之後,每次打開電飯煲煮飯時,我就諗等你壞咗一於改用普通鍋煮啦。 估唔到冇幾耐之後,忽然一日明明煮得好地地,差十零分鐘就煮完,當我做完其他嘢返嚟準備熄保溫掣嘅時候,發現原本應該亮住保溫燈嘅訊號漆黑一片,最初以為係跳咗總掣或電掣鬆脫,經過一輪仔細檢查之後唔關事,係電飯煲自己嘅問題。
我對住佢講 :我係諗住換啫,你都唔駛咁快成全我㗎嘛,你而家毫無預警話死就死,生米未煮成熟飯咁就去咗,實在太不負責任嘞。
經當家驗證後,宣佈電飯煲已死,急不及待熱心地幫我尋找新飯煲,我將原先諗好嘅計劃同佢哋講,兩仔爺反應各異。
當家 :咁點得㗎? 電飯煲始終方便過普通鍋,按下掣你就可以去忙其他,但係用鍋煮又要睇火又要驚煮燶,一啲都唔方便。
吾兒 : 咦! 返返去以前嘅年代? 咁遲啲可能要燒柴煮飯,成間屋煙霧瀰漫。 (跟住扮一邊吹火一邊撥火兼一邊咳嘅表情。)
最初我仲好堅持,咪當煮煲仔飯啫嘛,仲好啦,到時日日有新鮮飯,唔駛再留隔夜飯,雪櫃就少咗個霸佔空間,而原先用嚟放電飯煲嘅位置,就可以騰出放其他物件,慢慢地實行斷捨離。
後來諗諗吓,唔係喎,煲仔飯勁黐底,每次偶一為之煮完都要洗刷好耐,到時日日煮我咪要日日刷餐懵? 嘥水嘥力嘥時間。 又,有時出街遲返,會校定時間掣煮飯,就算稍為遲啲開飯,起碼仲可以保溫,如果煲仔飯唔及時食嘅話,咁凍咗點算,原煲翻熱會燶上加燶,盛起落鑊炒熱,咪即係又要另外加工。
算嘞算嘞,都係離唔開現代科技嘅掣肘,買過個新嘅吧。
春有百花秋有月, 夏有涼風冬有雪, 若無煩事掛心頭, 便是人間好時節.