少年成長今日: 1|主題: 15863

收藏本版

回覆發帖

返回列表

跳至頁

查看: 54694 | 回覆: 8

培養閱讀習慣 [複製鏈接]

csir3290

子爵府

積分: 11015

1^#

發表於 23-6-18 13:01 |只看該作者 |倒序瀏覽 |打印

我成日都講要從細就開始培養細路仔嘅生活習慣，越細個開始越容易養成，當細路仔養成咗一個良好嘅生活習慣，到佢大個嘅時候其實要出事嘅機會亦都會降低。在咁多種生活習慣之中，除咗自理能力或者作息規律之外，其中一個我覺得好重要嘅生活習慣就係一定要自細開始就幫細路仔培養閱讀習慣。閱讀習慣之所以重要除咗可以擴闊細路仔嘅眼界之外，更重要嘅其實就係懂得自學嘅開始。因為細路仔細個開始鍾意閱讀，佢哋就會發掘自己鍾意嘅圖書，慢慢佢哋就會發展出興趣，對自己有興趣嘅嘢佢哋會透過閱讀更加詳細去了解。好多嘅知識其實都可以透過閱讀學到。所以自細培養細路仔閱讀習慣係其中一個我覺得家長首要要做嘅工作。

講到要培養細路仔閱讀習慣，由細個開始其實好睇家長點樣去做。好多家長都會細個嘅時候同細路仔一齊講故事一齊睇故事書，呢個正正就係培養細路仔閱讀習慣嘅第一步，由故事書之中令到細路仔覺得閱讀有趣，不過對住細個嘅細路仔，其實父母都要訓練下自己講故事嘅技巧，唔係平鋪直敘咁讀書而係真係需要好似做戲咁。只有咁樣先至可以吸引細路仔一齊睇故事書。開頭由家長去講，慢慢發展到同細路仔一齊講一齊睇，從中亦都發展佢哋嘅閱讀能力。所以家長千祈唔可以忽視講故事時間，而呢啲時間亦都要有規律咁做，唔好鍾意就做下唔鍾意就唔做。好似我自己咁，仔女好細個嘅時候就係臨瞓前一定一齊講故事，到佢哋大個啲三四歲嘅時候開始，就每晚食完飯之後一定係熄電視大家一齊睇半個鐘頭至一個鐘頭嘅書，開頭一定係大家一齊睇一齊當講故事，慢慢到佢哋大啲就可以畀佢哋自己慢慢去睇，不過睇完都可以請佢哋講番個故仔畀家長聽。再到佢哋大個啲，呢半小時到一小時嘅閱讀時間，就係佢哋自己睇佢哋鍾意嘅書，不過家長唔可以忘記喺呢個閱讀嘅時間入面，家長自己都要閱讀唔好淨係叫佢哋自己睇書，然之後自己就開住個電視或者揸住部手機，要培養細路仔閱讀嘅習慣其實家長係要同佢哋一齊睇書。

多行圖書館，多行書局亦都係培養細路仔閱讀另外一個重要嘅部分。以前仔女細個嘅時候，每兩星期都會同佢哋去一次圖書館，借佢哋鍾意睇嘅書，咁就唔會擔心每晚閱讀時間佢哋冇書睇，而且仲可以保持新鮮感。另外屋企擺書嘅地方亦都好重要，有啲家長將啲書放得好整齊，放曬喺個書櫃上面，但係書櫃就唔係細路仔咁容易攞到。我自己就鍾意喺細路仔隨手可及的地方都放書，即係細路仔任何時候都可以好方便咁攞到書睇，只有咁樣佢哋先至會幾時想睇書就幾時都可以攞到，所以家長亦都唔可以忽略放書嘅地方。到而家阿仔阿女都已經中學，我哋一家都仍然係習慣每晚食完飯之後都一定會熄電視，有陣時佢哋都係睇書，有陣時係溫習，總之嗰段時間父母都係要陪佢哋一齊睇書，其實生活習慣就係咁樣養成。為咗培養對仔女睇書，屋企啲書多到其實都唔夠地方擺，但係而家用咗電子閱讀器就好好多，一部電子閱讀器就可以有大量嘅圖書。而家已經發展到全家一人一部機。

總之自細幫細路仔培養閱讀嘅習慣，對細路仔嘅發展一定有好大嘅幫助。但係細路仔唔係話父母開句聲叫佢睇多啲書佢就會自己去睇，而係需要家長用心機同埋策略去慢慢培養。我都見過好多家長成日叫自己嘅仔女睇多啲書，但係家長自己就連書本都唔掂下，只係掛住手機同埋電腦，咁又點樣可以培養到仔女嘅閱讀習慣啦。每一種生活習慣其實都要用時間同埋策略慢慢幫細路仔養成，所以家長有陣時就要考慮點樣幫細路仔養成呢啲習慣。