每次香港政治氣候不穩,坊間又會有移民聲音湧現。
近日有報導指港人移民台灣意慾強勁,又有出版社新書,趁機教港人移民台灣;另邊廂,台灣嘉義市、基隆市、台南市、桃園市及宜蘭縣等5城市入圍ICF舉辦嘅2017全球智慧城市選拔「Smart 21」,以入選數量計屬全球第二多,好似台灣真係香港人嘅理想居所咁。
但人離鄉賤,台灣又係咪想像中咁好呢?我哋一次過羅列坊間迴響以及當地人近半年關注嘅部分問題,點出目前台灣,有啲咩你要知:1. 憂外資撤出
一旦美國開始緊縮貨幣政策,台灣將面對外資撤出、資金外流風險,目前市場預計台幣來年仍會持續貶值至少4%。
2. 弱勢勞工
台灣有好多工時不足、臨時工或派遣人員等「非典型工作者」,全國農林漁牧、工業、服務業的非典工作者達到78.1萬人,多半處於經濟弱勢,計唔到年資日做夜做,連要爭取權益都好難。
3. 過勞同低薪未改
台灣過勞同低薪嘅情況未見改善,上年人工最低係「其他教育及教育輔助服務業」,平均每月2萬4千台幣,最高工時係「保全及私家偵探服務業」,平均每月222.2小時,以4個星期計算,每星期工作約55小時,年輕人要有捱苦準備。
4. 薪金倒退18年
30到34歲、35到39歲兩個年齡層,上年年收入僅有58.1萬元和66.5萬元台幣(14萬和16萬港元年薪),比1997年仲要低,人工可倒謂退18年。
5. 陷入長期低迷
台灣GDP近2年卻都低於2%,預計2016全年增長約1%,唔少人擔心台灣已陷入長期低迷。
6. 出口結構性集中
台灣出口結構性問題過於集中喺電子產品身上,達到40%,然而出口產品,4成集中喺內地同香港市場,據了解目前唔少原材料行業,都有產能過剩現象。
7. 兩岸關係不確定
台灣具備國家條件,但有政界人士形容台灣至今為「不是一個正常國家」,而且「中華民國」國號於國際間有混淆之虞。
8. 台企的式微問題
台化關廠、HTC失去手機話語權,令人擔心台灣企業會否於國際上,進一步成為弱勢群體。
9. 吸引投資仍差
WEF競爭力排行,台灣雖然排全球第14,但吸引投資同經濟表現一直好差,其中政策唔穩定、缺乏投資機會係台灣弱項。
10. 氣候問題
颱風加地震,官方救災以至樹木政策,常遭到市民批評。
11. 外人難搶飯碗
旅遊業愈見蕭條,有遊艇生意老闆明言部分員工,已經無job到要放無薪假;外地人要去搶飯碗,除非你本身有資本,否則單憑雙手,只會難上加難。
12. 斬人案
社會壓力大,陸續發生無差別斬人案,教育問題係「第一大山」。
13. 人口受老化與少子化打擊
台灣人口老化兼少子化,樓市缺乏新血承托,走向日本嘅困境。
似乎去唔去台灣,真係要視乎你有幾雄厚資本,同埋你對人生嘅要求。如果你目標只係宜居,錢已搵,有無工開唔太care,咁真係或者可以選擇台灣,過你嘅「小確幸」。
而事實上,早年《華爾街日報》曾刊載文章指出,台北絕對係個適合「簡單」、「慢活」嘅文化城市,適合養老,但唔適合創一番事業嘅年輕人居住。
反之,如果你仲要繼續打拼嘅話,認真要留意下當地經濟了。