吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 自由講場› 胰臟癌的生存率係咪好低

自由講場今日: 180|主題: 1303054

收藏本版

發帖

返回列表

跳至頁

樓主: heily123

積分: 54808

2024年龍年勳章 2024勳章 2023年兔年勳章 2018父親節勳章 2018母親節勳章熱血金章精緻種植勳章好媽媽勳章超級版主 2011至尊種植勳章環保接龍勳章大廚勳章 BK猜猜猜慶中秋 hashtag影視迷勳章

1^#

發表於 21-11-30 20:34 |顯示全部帖子

本帖最後由召藥師於 21-11-30 20:47 編輯

胰臟癌真係好惡，我爸由發現到離世，只係大半年內發生嘅事。

我個人建議係，如果醫生話可以做手術又病人同家人都決定做嘅，而又決定去公立醫院做手術，要有以下心理準備:

1. 冇得探，要好幾個星期瞓床著尿片，亦預咗姑娘或護理員隔好耐先同你清理，想像吓BB長期唔換片個屁股會發生咩事

2. 冇娛樂，日瞓夜瞓，如果嘴刁嘅，應該係冇啖好食，就算屋企人煲湯拎入去，如果自己起唔到身飲都冇用，唔會有人餵

3. 如果病人本身睇開好幾科醫生，公立醫院係唔會有人統籌病人之後仲適唔適合食手術前食開嘅藥，直到我爸體力不支入另一間公立醫院，先有好心醫護發現再調較佢啲藥，但都唔係最好......

4. 公立醫院醫護冇提點病人同家人手術後護理，我地對呢個病好陌生，根本唔知應該點做，病人可以做乜唔可以做乜，身體有咩狀況時要睇醫生或入急症，唔知

手術雖然做咗，但後來再照都發現已擴散到肝，當時以為仲可以頂到兩、三年(醫生冇同家人講可以生存幾耐)，之後我爸又開始冇胃口，腹痛背痛，便秘，肚脹，手腳水腫，當時個個以為佢瞓得多又食得少，又揀飲擇食先會咁 (睇普通西醫，話貧血會手腳水腫，開鐵丸同維他命b佢食)，到佢去公立醫院肝膽外科覆診，我爸話佢腹痛又肚脹便秘，個醫生睇都唔睇佢個肚，淨係話之前份報告指數冇問題，我爸食好多藥，我媽要問可唔可以開啲好少少嘅胃藥，個醫生話想要靚藥自己去養和醫院腫瘤科睇啦，於是我細佬兩公婆帶我爸去睇，一睇就已經安排去入院，放腹水(血)，放肺水 (有血)，滴白蛋白(退水腫)，輸血，聞氧氣，停咗好多食緊嘅藥，醫生話已經醫唔好，只有舒緩治療。

住咗幾日，出院一個星期，個肚又脹番，又再入院，今次入住幾日就同佢永別，可幸係養和醫院可以有家人陪伴，幫佢抹面抹身同餵食，可以陪佢過夜照顧佢，醫生又會同屋企人好清楚講解點樣做等佢舒服啲走，如果唔係，我想像唔到我爸係幾咁痛苦地離開......

最後，全家人都陪住走，睇住佢最後一下呼吸，聽住監察儀器再度唔到佢血含氧量同心跳而娼警告聲，感受住佢體溫下降......

如果屋企人有胰臟癌(尤其係年紀大嘅長者)，盡快及時行樂，好好陪伴佢，而最後一刻，睇吓經濟能力許唔許可，考慮入私院走......

盡我一己之力，發放正能量!

私人傳訊

召藥師

超級版主

積分: 54808

2^#

發表於 21-11-30 20:44 |顯示全部帖子

72leelily 發表於 21-11-30 20:06
這個病後期痛到嗎啡都止不住
怎會開心地離開？

最後佢係好痛，痛到今日食緊12個鐘先食一粒嘅特強止痛藥，第二日已經痛到要打止痛針，第三日已經要打嗎啡止痛......

不過可能我爸做過手術，佢入面內出血，放咗個肚嘅血，佢唔夠血就幾日內由清醒變長期昏睡，佢走前最後個24小時，清醒時間連15分鐘都冇，就咁昏腄到走

盡我一己之力，發放正能量!

私人傳訊

召藥師

超級版主

積分: 54808

3^#

發表於 21-11-30 22:10 |顯示全部帖子

heily123 發表於 21-11-30 20:57
好多謝你詳盡的分享。我哋負擔唔起私院只能在公院醫，聽你咁講公院真係恐怖
...

我屋企都唔係咩有錢人家，係老人家咁多年黎都好慳家，十年都唔一次旅行，最多係閒日落街飲茶，久唔久先去酒樓同親戚食飯，所以佢都係去公立醫院做手術，只係後來公立肝膽外科醫生都唔理佢腹脹腹痛，腫瘤科又唔使佢再去覆診，好無助之下先去睇養和腫瘤科，前後住咗唔夠10日，最後埋單過十萬(唔係我找數，我媽事後同番我講)。

唔知有幸定不幸，佢好快就走咗，如果醫生話繼續吊佢命，同佢輸血，佢就可能一直瞓床忍痛多一段日子，真正嘅燒銀紙吊命，仲要生不如死，但係佢喺養和走，我自己同屋企人都叫做無憾，可以24小時人釘人貼身照顧到佢最後一刻 (當然可以搵姑娘幫手，但我媽話每call一次護士就要收一次服務費，所以我地家人做到嘅都盡量親力親為)，佢唔會孤獨咁走，就算呢筆錢我父母俾唔到，我都必定攞出嚟醫佢(當然大前提下一定要有個銀碼積蓄)。

如果你屋企經濟唔許可，真係要俾定心理準備病人，當然唔係話俾佢知之後佢會幾痛苦，但係病人入院之後，有咩事都係要靠佢自己同醫護講，一定要主動講自己身體狀況係點，醫生同佢講要注意啲乜，一定要一五一十同番屋企人講。而作為家人，留意病人身體狀況，有時病人以為自己撐得住，唔要人扶，唔要人旁住，但隨時會體力不支倒下，如果做咗手術，跌到係大忌，隨時內傷都唔知，同埋留意病人要食啲乜嘢藥，如果本身係長期病患，一定要問清楚醫生，係唔係要再調較過啲藥。就以我爸個case為例，佢有三高問題，食糖尿藥又食薄血丸，但佢割咗一忽胃，食少咗嘢，變咗仲keep住食之前份量嘅糖尿藥，佢啲血糖就好似坐過山車咁，太低係隨時會暈低死人，而護士就只會話太低就立即隊包檸檬茶，唔會理個病人有冇營養 (已經食得少咗，仲要飲糖水去控制血糖，仲邊有quota 食嘢)；佢食開薄血丸，影響凝血，入面傷口更難好，又加埋有擴散，腹部內出血，連肺都有積水，放出嚟都有血。

盡我一己之力，發放正能量!

私人傳訊

召藥師

超級版主

積分: 54808

4^#

發表於 21-11-30 22:27 |顯示全部帖子

貓頭雀發表於 21-11-30 21:48
我想起媽媽了... 最後的幾日也是昏睡；有時回想，覺得都好嘅，太辛苦，我幫不到， ...

謝謝你，我爸走咗1個月左右，佢走之前一個星期我最難過，去到醫院見到佢瘦到冇肉(因為退晒水腫)，面無血色，肚放出嚟嘅係鮮血，肺水帶血，慢慢流出，聞住氧氣昏睡，有人叫佢先望一望，見佢咁疲累，都唔忍心打搞佢，就算我仲有好嘢想同佢講，我都講唔出，係佢醒一醒時話要飲水食嘢，先慢慢漸啲餵佢；佢話要鴨仔，就攞俾佢幫佢小便同清理；佢話背脊酸痛(因為插晒喉打點滴同放腹水肺水，連日瞓喺度郁唔到)，就幫佢按摩全身；佢有蛀牙，食完嘢佢慣咗要刷牙先安落，就幫佢用牙縫刷刷再加乾淨濕紙巾濕熟水抹口腔......呢啲就如我當年照顧我初出生嘅仔女一樣，但係今次要照顧嘅，唔係一個生新命，而係即將離世嘅爸爸，又唔可以俾佢知道我有幾難過，想喊都要忍住，怕佢見到嚇親佢，走得走得唔安落

到佢走咗，我反而個人鬆咗，佢唔使再痛苦喇，我而家當佢去咗遠遊，見唔到面但佢仲活喺我心入面。

盡我一己之力，發放正能量!

私人傳訊

召藥師

超級版主

積分: 54808

5^#

發表於 21-12-1 11:16 |顯示全部帖子

taidou 發表於 21-11-30 22:55
我一邊睇一邊流眼淚，非常感受到果種心痛，政府的醫療體制真令人好無奈。

...

首先公立醫院人手不足，每次覆診都係唔同醫生，病情跟進方面，病人唔主動出聲，可能會錯過得到最適切治療嘅機會，同埋手術後護理都係，公立醫院我覺得呢方面做得好差，我幾年前入院補耳膜，我做完手術到差唔多出院，護士先俾張紙我睇要點護理，當中提到唔可以擤鼻，但我已曾經因為鼻有啲塞就擤咗一下(雖然唔大力)，但應該做手術前都要提吧。

仲有疫情下，家人唔可以探訪，如果病人自己行動不便，大小二便後都冇人理，拖到夠鐘先換，仲要求其清潔，醃到下身損爛。我爸係斯文人，佢死忍，每日都等出院，但身體唔許何，到出到院，我媽幫佢搽藥膏(醫院冇理佢，冇開藥)，到我爸走個刻都仲見到佢之前損傷痕跡。

我唔係話公立醫院就冇好醫護，但一個護士睇幾多個病人？佢好心照顧得一個，其他病人可以不理？當佢瞓晒身去做，今日佢返個更照顧得好妥貼，咁下一更接手嘅又肯唔肯跟佢個套定按本子辦事？我仲好記得我當年去廣華生大仔，原本護士話應該有排先生得，叫我老公去食早餐先(佢冇上堂所以冇得陪產)，點知我1個鐘都唔使就生咗，到我預備推番去產後房，等緊床位，我借醫院無線電話通知我老公，我問有份推我個位助理阿姐我會去幾多號床，佢竟然發脾氣用鬧我嘅語氣咁講出黎，我生完冇力氣，已經唔該前唔該後，佢竟然咁樣對一個產婦

又講幾年前我去補耳膜，我係半麻，所以手術前唔使禁食(不過一早入院，我都冇時間食嘢就入去)，手術做完後，剛剛中午派完飯，冇人派俾我，我同護士講，佢話幫我攞一份，等多陣再提都冇係冇件事，我變咗由之前個晚食完飯到第二晚晚餐先有得食，仲要啲阿姐都想skip咗我唔派，因為個間房大部份病人都係禁食等做手術，我立即追出去話我食得飯先派俾我咋，而我老公要睇住仔女冇黎探我，我就一直餓到個晚先有嘢食......

所以公立醫院係平，但唔好預有任何服務，受到良好對待係bonus，受氣或冇人理係平常事，所以真係要做好各種預備，尤其係大病，唔好諗住靠醫院搞掂。

盡我一己之力，發放正能量!

私人傳訊