吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 懷孕前後› [分享]廣華開刀過程 (好囉嗦), 注意事項同BB相. ...

懷孕前後今日: 1|主題: 330056

收藏本版

發帖

返回列表

跳至頁

查看: 11257 | 回覆: 60

[分享]廣華開刀過程 (好囉嗦), 注意事項同BB相. [複製鏈接]

12 3 4

yamadalei

男爵府

積分: 5902

1^#

發表於 12-1-17 03:24 |只看該作者 |倒序瀏覽 |打印

本帖最後由 yamadalei 於 12-1-17 03:26 編輯

11月12日

報到
- 2PM 帶齊入院紙, 自己同C6身分證, 去主樓地下急症室入院部報到.

入院
- 上北翼九樓產房, 等助產士做最後一次觸診, 留小便, 聽BB心跳. 雙胞胎好難聽清, 搞左好耐下.
- 檢查完就正式入院, 我住南翼9號房. C6可以跟入去幫我執好D野, 我就去換衫.
- 準爸爸好快就要走, 因為大房可能有其他媽媽生完要餵奶之類, 有男人好唔方便架.
- 跟住就有醫生姑娘輪住過來, 將頭先D檢查做多次之外, 駁左胎心音機聽半個鐘. 聽胎心音既時候, 同房所有人都要關手機(開飛航模式都得, 不過有D姑娘或者助理唔知道呢個功能, 可

能會照鬧).
- 麻醉師黎講解全身麻醉同半身麻醉, 其實都差唔多. 雖然我好驚, 但唔想錯過BB出黎一刻要保持清醒, 所以我揀左半身麻醉.
- 搞完一輪, 6-8PM係探病同派晚餐時間, 廣華D伙食都幾好味, 白飯唔會好似屯門甘煮到爛曬. 同埋有D咩坐月餵人奶時期唔食得既, 就好趁呢餐叫屋企人買/拿黎食啦. 當晚12點後到做

完手術好耐, 都唔可以進食, 我叫C6買埋宵夜, 11點食飽D.
- 夜晚會有姑娘黎召集第日開刀既產婦講解開刀前後既安排, cover好多方面, 同俾你問問題.
- 我問姑娘自己明天排第幾個開刀, CALL定C6過黎, 佢話我係第一個開刀, 所以8點要ready. 如果無人闖急症, 或者緊急開刀, 9點就到我被人膛啦.

病房情況
- 夜晚周圍行左幾次, 發現未生同生左既病人(唔同衫架), 會盡量安排響唔同房, 安排得好好. 雖然見到有D房有外籍人, 但我間房換左幾次人都係全HK人, 住得好舒服.- 唔似得外科病

房, 呢科唔係間間房都爆, 但經常有臨時入院, 忽然作動要送去產房等CASE CALL黎CALL去, D護士助理都好忙.
- 有時見到差人叔叔行過, 大家都估到咩事啦...

開刀當日
手術前
- 6點半提早起身, 拿拿臨沖涼洗頭(可以外借風筒), 下次都唔知幾時...
- 8點就有姑娘同助理, 輪流來派藥, 換衫, 聽心音之類既檢查, 同叫我執好曬D野俾*響外面等既*屋企人. 呢個時候得自己一個執野, 大住個肚彎腰執袋拿袋, 所以待產個日千祈唔好帶

多野.
- 8點45分推入產房, 門口路過既時候俾屋企人見下就要入去啦...當時真係好緊張.
- 入到去開刀前又做多次聽心音之類既檢查. 我有個B哩響入面, 好難聽到心音, 次次都搞好耐. 我問助產士, 點解要做得甘密, 佢話係因為部門交部門要重做confirm無問題甘話...

做手術
- 個手術室俾想像中大, 我做手術當日係全女班, 入面醫生護士加埋好似有9個人.
- 前一晚同我講解開刀過程個姑娘都響度, 佢好好人, 問翻原來佢交通連埋訓覺食飯得8hr休息, 一早又返工, 好辛苦.
- 手術室入面D姑娘同醫生都好好人, 雖然我知道係規範, 但我徬徨又驚恐既時候, 有人用好溫柔既語氣甘鼓勵自己, 真係鎮定好多架.
- 做手術前過床, 然後被人大字型攤開, 一隻手吊鹽水, 另一隻手唔記得做咩啦, 好似係博機, 跟住醫生幫我打側個人, 麻醉師響我尾龍骨打麻醉藥. 睇HOUSE的病人好似好痛甘, 原來唔

係太痛, 跟住好快就下身開始無感覺.
- 之前我都好驚插尿喉好痛, 原來係打左麻醉藥之後先插, 又係完全無感覺...
- 打完麻醉藥到全生效其實都幾耐, D醫生護士開始忙佢地既野, 仲一邊做野一邊同我講佢地即將做乜.
- 我前面有個架用布cover住, 所以我睇唔到佢地響度做咩. 我FEEL到D麻醉藥慢慢生效, 對腳好快FEEL唔到, 原來半身麻痺, 上身都會有感覺, 有5分鐘脖頭同頸都痺住痛, 又控制唔到D

肌, 成個人好似打冷鎮甘不停抽蓄. 我隔離個麻醉師姐姐MON住我同個機器, 又同我傾計講笑, 我先無甘驚.
- 麻醉藥生效之後, 知道佢地開始做野, 不過我完全FEEL唔到, 只係感覺到好似有人輕輕禁我個肚... 跟住就聽到有人報告第一個BB出左世. 姑娘話我知要拿個B去隔離張台打針, 洗乾淨

, 跟住話我聽時間, 性別同埋重量之類.
- 9:25到先開始做手術(麻醉藥生效之後), 9:30出左第一個B, 33分出左第二個B, 超快!!
- 唔似電視做既甘, BB出世喊到拆天, 我兩個B出黎喊得好高音但細聲, 姑娘拿過黎俾我睇, 同我講細B大比有心型胎記, 同埋雖然我個肚唔大, 但兩個都足磅, 唔洗送去觀察佢地好'口力

'仔.
- 第一次見到兩個仔仔, 我以為會百感交集口水鼻涕一齊流甘, 但原來個刻無咩感覺...
- 兩個仔仔送翻去住院部, 經過門口會俾外面既屋企人望一眼.
- 我就要慢慢縫針, 都係20~30分鐘既事. 做完手術就推出去外面, 有個姑娘陪我觀察一段時間就推翻去住院部, 又係經過既時候望屋企人一眼.

手術後
- 我同之前一間房, 不過唔同左床.
- 屋企人俾左入院包包護士拿入來擺低, 就要響外面呆等到中午探病時間先見得面, 真係擔心死佢地, 呢樣野私院就處理得好好多.
- 出離之後, 姑娘問我餵人奶定奶粉, 如果要做完手術當日餵人奶我會好辛苦. 我好驚BB們飲奶嘴後唔肯埋身, 加上我要比人生產多一倍份量, 以後追奶好麻煩, 所以我選擇即日開始餵

母乳. 佢建議幫我用奶粉湊一個, 我第一日餵左哥哥先, 第二日調轉餵弟弟.
- 如果選擇餵母乳就3小時餵一次, 走廊貼左時間表. 時間到佢地會整醒呀B拿過黎俾我餵.
- 奶粉就4小時一次, 佢地會幫我餵.
- 佢臨走前問我要唔要打止痛針, 個陣麻醉藥未過唔係好痛, 我話唔洗, 覺得既然打算餵母乳, 藥既野可免則免麻, 呢個係我最錯既決擇.....
- 好似係11點半到, 我第一次餵母乳! 姑娘幫我將D簾拉埋, 抱大B過來, 鼓勵我同溫柔細心甘教我點樣引導大B吸奶. 我連坐起身都唔得, 所以打側訓響度餵.
抱起佢時, 真係覺得佢好弱小同軟綿綿, 打喊路同扭計會發出微弱又高亢既聲音, 肚餓時嘴仔張開好可憐甘. 響呢個時候, 我真係感覺到佢好需要我, 我係佢媽媽, 幾痛都要忍住.
其實我都唔知道有無奶, 總之見到大B個面仔郁郁下, 餵左30分鐘到, 姑娘就來抱翻走BB. 我問姑娘點知我有無奶? 姑娘話我唔洗理, 照餵就得, 佢地換片有尿尿會MARK數, 一日落來埋單

唔夠數就會補奶粉我唔洗擔心.

跟住開刀既痛苦開始啦...

- 當麻醉藥漸漸過, 痛苦就來啦...漸漸由少少痛, 到痛到想死.
- 甘痛點算呢? 唔可以餵到奶... 我懶口力計埋下次餵奶時間, 打算死頂到2點, 甘打完止痛針半小時最有效既時候餵B.
- 到左中午, 兩隻B都推曬出黎放響我床邊.
- 同其它公院一樣, 廣華每次只可以2人探病, 出出入入都有姊姊mark數, 好嚴. 屋企人輪流入黎問候我, 我痛到開口講句: "好痛...唔洗理我, 玩B啦..." 用盡全身氣力都要逐個詞分開

講, 點知佢地見我甘辛苦, 仲問多幾句=_=.
- 終於等到2點CALL護士幫我打止痛針. 護士話要搵負責醫生簽紙之類, 好唔容易捱多左大半個鐘先有針打... 打完之後同我講:"你打左針會訓覺, 3點個餐呀B食住奶粉先啦." 究竟我捱

痛到2點為乜...
- 打左止痛針果然好訓, 一陣就訓著左, 醒翻已經係56點, 被人拍醒呀B夠鐘要食奶. 醒左後雖然都仲係好痛, 但係減輕左.
- 究竟麻醉藥過後既痛, 同陣痛比差幾遠呢? 後來認識一位本來順產, 陣痛左好耐結果要開刀既媽媽話係一樣甘痛! 陣痛一下下甘, 但開完刀既痛係恆常, 無唔痛既時候只可以等時間過,

佢都覺得順產無甘受罪.
- 講翻我餵B, 呢次就真係拿命......原來BB一吸nipple, 個子宮就收縮. 一下下好似有人用刀扯翻開個傷口甘痛, 痛到我抓實床邊, 眼淚水都飆埋... 之前人地都warn左會好辛苦, 我又

堅持, 而家叫人餵奶粉好衰女遮, 所以死忍.
- 隔離床個媽媽, 同一日開刀, 遲我1小時左右推出來. 本來佢打算餵母乳, 但傷口好寬縫左9針, 太痛所以放棄左, 到第3日先試埋身餵, B女餓到狂喊一小時都唔肯食. 個位媽媽結果放

棄左, 我好慶自己當初有堅持.
- 奶粉媽媽可以好好睡覺逃避痛楚, 頭兩日BB全程姑娘照顧. 我就每3小時被人叫醒餵B, 每次都要捱眼訓同忍痛, 但我好開心, 因為可以見多BB幾面. 第一日餵既時候, 大B係甘?住我條

鹽水喉來扯, 郁到針孔位搞到原來成晚無點滴到, 次次都係姑娘巡房先幫我整翻.

手術第二日上午
- 8點半開始姑娘醫生逐個來問問題同做檢查, 個個負責唔同野, 所以上午想補眠係無可能, 15分鐘被人叫醒一次仲慘過唔訓. 私院呢方面又係做得好好多.
- 10點到醫生黎睇過無問題, 護士就來拆尿喉, 叫我較高張床來訓同飲多D水, 中午個餐流質餐, 即係攪到好似BB糊甘既粥.
- 午前有助理來幫我"落床", 我估唔到呢一刻先係最慘烈既一刻... 第一次落床, 助理教我雙手托住個肚, 個肚傷口未埋, 個人坐直一刻, 五臟六腑同子宮一次過跌曬落個傷口度, 個種

痛真係難以形容...雖然個助理係甘叫我用力紮馬, 但我太矮吊腳, 佢又叫我用手禁住床企起身, 但我右手插左喉, 禁落床到咪將支針插落骨囉... 對腳可能因為麻醉過, 加上我懷孕後期

成日訓, 無曬肌肉用唔到力. 好痛苦甘坐低左響張凳度, 助理就走左, 張床就響隔離, 但我試左半個鐘先翻得到上去.
- 我上左床就聽醫生護士話狂飲水試小便. 點知道個助理拿左個量杯俾我, 話我落得床就自己去toilet, 痾落個量杯度, 倒去TOILET翻來寫低, 姑娘會定期來記錄.
- 試問我自己落床都要搞5分鐘, 雙手壓住傷口, 捧住子宮先企得直, 對腳完全提唔起, 要拖住來行. 甘又邊度搵手拿個量杯M巾紙巾加埋沖洗瓶自己去TOILET呢? 於是我響病房扶助行來

行去, 希望行順D可以用單手托子宮, 可以拿埋d野去toilet(間房離兩邊toilet都好遠).
- 後來另一位助理路過, 我同佢傾左兩句. 佢話如果我好辛苦, 可以打電話叫屋企人買束腹帶俾我, 會無甘痛. 我答佢之前睇BK話政府醫院唔用得, 助理話唔係唔俾用, 只係唔會提供同

幫我地著.
- 其實我有帶束腹帶, 雖然佢好好人, 話忙完可以來幫我著.結果我都等唔到, 因為實在太尿急, 我拿拿臨搵左出來訓上床, 有甘實扎甘實. 跟住試落床就真係好好多, 痛楚少左一半, 最

緊要係有佢代替對手壓住傷口, 我終於有手拿個水桶甘大既量杯同私人物品去TOILET, 個次有1公升尿尿...姑娘來抄既時候叫我唔好忍尿...你估我想架咩....
- 隔離床個媽媽聽完我講, 馬上急call朋友中午買俾佢, 跟住佢都落左床去噓噓嚕.
- 午餐轉做流質餐, 即係好似BB D 糊仔甘.

我都覺得自己好囉嗦, 簡述下之後會發生D咩事算嚕.
- 第二日夜晚個餐轉翻做軟餐, 即係粥+乜都攪碎曬既配菜.
- 第三日, 上午會被人抓去上堂, 會開班教D媽媽換片同餵奶, 然後中午開始, 你就要全程自己照顧BB. 飲奶時間到會拿100ML奶來俾媽媽. 下午會教幫BB洗白白. 夜晚會教點樣拿出世紙,

BB出院後護理, 同埋之後既安排. 再夜D仲會教埋用擠奶器(optional).
我當然係只拿翻一個B來湊, 原來已經好辛苦...
- 接落來一日幾乎每HR都要醒一次, 唔同既姑娘會來take 孕婦record, 問問題, 填問卷, take BB record, 提妳餵奶之類之類...
- 話曬都係做完手術無耐, 個傷口仲好痛架, 要就住來起身. BB喊下check片換片都要用5分鐘來落床...餵母乳又要好密甘抱佢上床餵.
- 隔離個超磅B好大聲, 係甘喊左成晚, 根本就無得訓...
- 手術之後得翻半條命, 加上幾乎每個鐘都要醒, 第四日姑娘話出得院我都拿拿臨出院...(呢個應該係陰謀)
- 拆線無需回醫院, 會安排姑娘上門拆線, 之後仲會來一兩次探訪, 關於湊B同傷口既野都可以同姑娘傾.

-------------------------------------------------廣華注意事項-------------------------------------------------------
1. 床頭櫃可以鎖, 但要自己帶鎖, 主樓地下鋪頭仔有得賣.
2. 如果入去唔係即日生, 要將產前後既野分開袋, 千祈唔好帶甘多野去, 因為生完會轉床/轉房, 到時先叫老公拿過來好D.
3. 產前袋要帶解悶用品, M巾, 網褲, 保暖瓶, 洗面刷牙用品個D唔洗講啦. 記得要拿包NB尿片, 濕紙巾, 同兩捲廚房萬用紙(全部都要未開過) 呢D都會響推入產房之前收.
4. 帶個斜咩既輕身袋仔, 方便去TOILET時放手機, 鎖匙, 廁紙M巾. (好重要!! 廣華唔係件件衫都有袋!開刀既尤其緊要...睇落去你就知...)
5. 用保暖瓶好過杯, 大肚要落床沖暖水唔方便之餘, 生完你根本落唔到床, 開刀仲慘, 落下床都痛到救命. 保暖瓶
6. 唔俾叉電, 睇得好嚴, 被人發現係唔會對你點最多講兩句, 但個幾日自己同個B有咩事都係靠佢地...你都唔想得罪D護士同助理架... 所以依賴電話上FB打機上網解悶既媽媽, 入院前要備多舊電俾屋企人拿翻去叉. 唔係就好頭痕, 電視其實只有頭兩張床有份睇, 生完連落床都落唔到實悶死.
7. 除非你執意要用某牌子奶粉, 否則入院前唔好買定奶粉, 因為醫院用既奶粉會幫你觀察BB飲完既狀態, 出院後要轉會好麻煩. 而醫院係會輪流換唔同廠商既奶粉, 入左院問清楚先叫屋企人買會好D.
8. 雖然開刀+BB食奶引致子宮收縮會痛上加痛, 但真係要忍痛餵, 一來母初乳好有營養, 二來BB如果以後唔肯埋身, 做媽媽既感受唔到個種豪無隔漠既聯繫, 係好遺憾既事.
9. 開刀既媽媽一定一定!絕對絕對!要準備產後束腹帶, 落得床之後要自己照顧BB, 無左佢你會痛到喊......

點評

Amei0223 謝謝媽咪詳細分享

發表於 12-1-17 12:19

0 3 0

私人傳訊

yamadalei

男爵府

積分: 5902

2^#

發表於 12-1-17 03:28 |只看該作者

本帖最後由 yamadalei 於 12-1-17 03:31 編輯

-------------------------------------------分享BB的照片----------------------------------------------------
前幾日滿月啦, BB曉得翻身, 不過係180度only~

http://www.youtube.com/embed/fo4SBQ8nUZ0

我PO唔到相...算嚕

點評

Amei0223 好可愛啊>3< 發表於 12-1-17 12:20

私人傳訊

Bubblegumbb

子爵府

積分: 14677

3^#

發表於 12-1-17 03:50 |只看該作者

回覆：[分享]廣華開刀過程 (好囉嗦), 注意事項同BB相.

thanks for sharing ar. 我都係黎緊要開刀，睇完你個post清晰好多呀

點評

yamadalei 加油呀!! 發表於 12-1-17 10:54

私人傳訊

家龍mA

水晶宮

積分: 54643

畀面勳章環保接龍勳章

4^#

發表於 12-1-17 04:11 |只看該作者

嚟緊都係去廣華生你d資料好有用 thx~
有感動位又有搞笑位上胎開刀生好快落得床
眼見開刀生果d 生完真係好痛苦

點評

yamadalei 加油呀!!廣華D姑娘好好人, 祝你生得開心~XD 發表於 12-1-17 10:56

私人傳訊

jennysf0805

別墅

積分: 759

5^#

發表於 12-1-17 05:43 |只看該作者

回覆：[分享]廣華開刀過程 (好囉嗦), 注意事項同BB相.

好多謝妳咁用心的分享呀！

祝妳可以早日康復，對 BB 健健康康咁成長啦！

Congratulation ar!!!!!!

點評

yamadalei 而家恢復得77 88 只係條腰多左4吋, 體重多左4KG.... 未收翻發表於 12-1-17 10:56

2/8/2011 - abt. 5w - 0.367 cm; 20/8/2011 - 8w3d - 1.77 cm; 10/9/2011 - 11w4d - 4.8 cm;
22/10/2011 - 17w2d - BPD: 3.84 cm / AC: 12.1 cm / FL: 2.45 cm;
19/11/2011 - 21w - 406 grams; 31/12/2011 - 27w4d - 1071 grams;
3/2/2012 - 33w1d - 2108 grams; 2/3/2012 - 36w2d - 3073 grams;
16/3/2012 - 38w1d - 3485 grams; 27/3/2012 - 39w0d - 3720 grams;
3/4/2012 我出世啦!!!!!! - 40w3d - 3730 grams

私人傳訊