婦女醫護

收藏本版
發帖
返回列表
跳至頁

首頁
1

尾頁
   0
phDRCMP


洋房

積分: 74


1#
發表於 09-3-29 10:12 |只看該作者
衛生署瞌眼睏　毒中藥無王管

2009-03-28
【東方日報專訊】近排本港藥物事故爆到七彩，無奇不有，藥物監管制度兒戲到極，小市民去公立醫院睇醫生，拎咗一包二包藥，都唔知食好定唔食好。

好嘞，西藥信唔過，咁中藥又點呢？嗱嗱嗱，《中醫藥條例》規管嘅中藥商領牌制度以及中藥進出口管制，喺去年一月十一日起全面實施。所有中藥材批發、零售商，以及中成藥製造及批發商必須持有牌照，而且要放正喺當眼位置。

另外，條例亦規範持牌嘅中藥材零售商出售三十一種有毒中藥材及中成藥時，必須由負責人按照註冊中醫開出嘅處方配發，之後仲規定要做紀錄，例如留低顧客嘅聯絡電話以及地址咁。如果有任何人違反《中醫藥條例》，咁就大罪咯，最高罰款十萬元以及監禁兩年。

咁睇嚟，衞生署對於中藥材嘅監管好似仲嚴格啲喎。唉！唔好咁天真啦！嗱，只要認住食物及衞生局局長周一嶽(相關)以及衞生署署長林秉恩，都唔使多講嘞，一定冇好嘢o架啦。醫學界立法會議員梁家騮就講得一矢中的嘞，佢話衞生署「西藥都係咁差，中藥都唔會好」！

呢個牌照制度實施咗年幾之嘛，好多中藥材零售商都當係一紙空文。記者日前去土瓜灣一間中藥店，要買有毒中藥朱砂以及鬧羊花，真係話都冇咁易。店員既冇問係咪持有註冊中醫師藥方，亦冇要求記低資料，唯一有做嘅，只不過係提一提用朱砂煮嘢嗰時，唔好食渣喎。

嘩，朱砂係三十一種毒性中藥之一，含有雄黃以及鉛毒，亂咁畀人食落肚，隨時搞到重金屬中毒，後果唔係講玩。

除咗毒性中藥冇監管之外，屬於進口或出口監管範圍毒性比較小嘅中藥材，都係無王管，周圍有得賣。嗱嗱嗱，記者求其喺網上印張醫治坐骨神經痛嘅民間藥方，唔使註冊中醫處方，好輕易喺上水兩間中藥店買到受監管進口或者出口嘅中藥材製川烏以及製草烏。

唔係講笑，中藥材冇監冇管，隨時比西藥更危險，因為市民喺藥房買西藥要醫生處方，藥物上亦列明成分以及分量，但係好多小市民對中藥藥效一知半解，而藥材上又冇列明藥效以及成分，食落肚可大可小o架。

呢嗱，衞生署喺過去三年呈報嘅懷疑因為中藥引起嘅不良反應個案共有二百零二宗，其中有八十一宗證實係同中藥有關。最離譜嘅係，咁多人中招，衞生署承認牌照制度實施年幾以嚟，原來只係「零檢控」咁大把！

鬼咩，一句講晒咪又係懶囉。有中藥業內人士表示，衞生署好少派人巡查藥材店，又或者檢查店內有毒中藥材嘅紀錄。現代中醫進修學院院長蘇元元話，中醫藥管理委員會中藥組未處理嘅個案都有幾百宗，根本冇時間、冇人手去監管中藥店。

林秉恩話就話身兼中醫藥管理委員會中藥組主席，成隻紙老虎咁，監管瞌眼瞓，嚇鬼就得，無良商人怕佢條毛咩？

當局對中藥材嘅監管形同虛設，計功夫茶話齋，九成九係成班衞生懶官食錯中藥啦，如果唔係，因乜事監管工作會咁亂龍吖？周一嶽同林秉恩一日唔落台，小市民只有自求多福！
私人傳訊


首頁
1

尾頁

跳至頁
返回列表
回覆
發帖

© 2024 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見