改善bb車上巴士的條例與步驟建議
呢篇文章係希望引起各位媽咪嘅關注， 聚集一啲力量促進城巴及新巴將對bb車使用巴士嘅條款作出改善， 可以切合到實際嘅情況。
希望bb車使用巴士條款根據“珀麗灣巴士公司臨時措施”作出修改，
“珀麗灣客運公司對嬰兒車使用巴士的臨時安排”
1. 可行情況下，乘客應在登車前摺合嬰兒手推車。
2. 於不阻塞通道及安全的情況下，如輪椅位置未被使用，乘客可將嬰兒手推車暫放於輪椅位置。乘客應在旁看管嬰兒手推車，避免影響其他乘客。
3. 如輪椅位置已被輪椅乘客或嬰兒手推車佔用，未能再放置額外的嬰兒手推車時，乘客必須摺合有關嬰兒手推車，或改乘下一班巴士。
4. 如遇有輪椅乘客登車，因該位置優先予輪椅乘客使用，嬰兒手推車乘客必須讓出有關位置，並將嬰兒手推車摺妥，或改乘下一班巴士。”
希望可以令到有需要嘅媽咪生活得更加安全順暢， 亦都希望可以令市民對推住bb車畀媽咪給多一份體諒與關懷
如果贊成改進巴士條款可以入去下面網址中的統計表支持一下：
https://docs.google.com/forms/d/e/1FAIpQLSf_OcNl5j406WQPgbMHjDJ4-WCN7wiCR3YIMH3Fhd2V4x1GwA/viewform?usp=sf_link
相信好多媽咪都試過“一個人推住bb車上巴士係幾咁困難”，巴士公司以安全理由要求在車上收好車抱住bb ， 其實際困難情況係首先要孭起一大代bb嘢， 第二要一隻手抱起bb， 先唔講收車，只係用一隻手抱住bb 其實都有危險性！ 就算可以一隻手好穩陣地抱起個bb ，之後得一隻手點收車呢？？ 要知道大部分bb車都唔可以輕易企喺度就收得到！如果呢個動作可上車前做好， 都要孭住一大袋bb嘢 ，單手抱起bb,單手拎住bb車， 又要羅定銀包嘟卡比錢, 上到車又要放好bb車 ！顧住一大堆嘢， 其實已經好唔安全 ， 好容易撞親人和撞親bb ，一個大男人都唔係咁輕易做得到！ 如果係一個力量身型也較細的媽咪就更加困難和危險！
如果上咗巴士先收車抱bb， 同樣有單手收唔到車嘅麻煩， 加上巴士好少會等你抱起bb坐好先開車， 置身於巴士嘅搖擺顛簸中要單手抱住bb再收車， 對大人對小朋友都好危險！比起做好安全措施綁好安全帶喺輪椅位度嘅bb車危險很多！
所以呢啲 所謂安全嘅條款實際上 適得其反，弄巧反拙 ， 只會大大增加危險性！ 根本唔切合實際環境！
我曾經去信 城巴和九巴公司， 建議改善bb車使用巴士的條款， 九巴未答覆 ，城巴答覆令我感覺佢哋冇正視問題， 只係用一個不太合理嘅安全理由話“嬰兒及嬰兒車皆有可能因此而跌出或碰撞” 而沒有改進條款的意思。 其實呢個理由根本唔成立， 試諗下～BB 喺bb車中扣好專為bb而設嘅安全帶加上bb車鎖好轆，喺輪椅位再為bb車扣上安全帶，比起用雙手抱住bb安全性高好多, bb車本身已經係一個好安全嘅保護支架可以保護bb， bb車內專為bb設計嘅安全帶令bb跌出嘅機會幾乎等於零， 而且有成人企喺隔離睇住保護住bb會好安全，反而人手抱bb變數大好多， 巴士本身嘅車位設計只係畀一個人坐， 空間細bb好易撞親， 如果真係遇到突發煞車嘅情形， 抱住bb嘅人都要一隻手推住前面張櫈維持平衡， 又係只得一隻手抱住bb， 而且座位空間偏細，急煞車情況下更加容易會撞親bb， 相反 Bb車喺輪椅位中有安全帶扣住， BB在車中又有扣好安全帶，又有bb車嘅保護， bb車四個轆，鎖好轆四平八穩唔會旭， 多重保護， 急煞車根本唔會對做好安全措施嘅bb車有影響 ，安全性只會畀用人手抱住高好多，
而且做大家都知道媽咪經常唔夠瞓，抱住bb坐喺巴士好容易不知覺地恰著， 到時仲容易跌親bb，
一個人推住bb車同一個坐輪椅嘅人遇到障礙分別唔大， 點解對bb車嘅支援差不多等於零， 而且令推bb車嘅人有好大壓力， 上車又收車抱起bb ， 會畀人覺得你阻住上車 ，會畀人覺得你架bb車好阻埞！
主因係巴士公司有啲條款唔得人性化，冇諗過實際情況，只係保障巴士公司自己嘅利益， 亦都冇針對包容和體諒bb車使用巴士的宣傳。
推住bb車可以乘坐交通工具同輪椅一樣。
有人會講“bb車咁唔方便不如用孭帶”， 先唔講bb車同孭帶嘅分別，但呢句説話唔係正正係歧視緊推bb車嘅人咩。。。
現時社會大多數人包括巴士司機， 都對bb車使用巴士抱住麻煩阻地方阻人上落車嘅態度， 令到好多推bb車嘅人上巴士都會覺得好有壓力好尷尬，我哋唔應該用約定俗成嘅心態接受呢啲態度逆來順受。
約定俗成嘅事物係大多數人會做嘅嘢，未必一定係最好， 而任何事物都必定有善空間。
以前社會 巴士仲係要上樓梯 ， 做為仲係三加二 ， 人人都嫌棄唔夠位坐嘅時候，可能會覺得輪椅可以上巴士係匪夷所思嘅事， 就係因為有人意識到平等社會傷健共融， 先至會有第一架低地台巴士誕生， 巴士裏面先會有輪椅位。 到依家唔會有人覺得個輪椅位係嘥地方。
當人類嘅知識越來越深厚，見識越來越廣泛，社會越來越文明， 對平等社會嘅態度就會更加進步， 對有需要人士會更加包容和體諒。
巴士針對bb車嘅規則條款絕對有改善空間， 也應該要曾加宣傳對bb車的忍讓和支援。
不該用一啲適得其反，亦不太合理嘅安全理由嚟推卸責任， 故步不前！
其實珀麗灣客運公司巴士已針對bb車列出一啲更好嘅臨時條款，改進得好好， 無強制規定收bb車，而且運行起上嚟快捷安全冇爭拗方便好多。
文章底部有珀麗灣客運公司對嬰兒車使用巴士的臨時條款各位媽咪可以參考一下。
如果贊成巴士條款根據碧君臨時條款改進可以入去下面網址中的統計表支持一下：
https://docs.google.com/forms/d/e/1FAIpQLSf_OcNl5j406WQPgbMHjDJ4-WCN7wiCR3YIMH3Fhd2V4x1GwA/viewform?usp=sf_link
“珀麗灣客運公司對嬰兒車使用巴士的臨時安排
1. 可行情況下，乘客應在登車前摺合嬰兒手推車。
2. 於不阻塞通道及安全的情況下，如輪椅位置未被使用，乘客可將嬰兒手推車暫放於輪椅位置。乘客應在旁看管嬰兒手推車，避免影響其他乘客。
3. 如輪椅位置已被輪椅乘客或嬰兒手推車佔用，未能再放置額外的嬰兒手推車時，乘客必須摺合有關嬰兒手推車，或改乘下一班巴士。
4. 如遇有輪椅乘客登車，因該位置優先予輪椅乘客使用，嬰兒手推車乘客必須讓出有關位置，並將嬰兒手推車摺妥，或改乘下一班巴士。”
～ 好多人都誤會咗 呢篇文章係要令條款畀bb車霸住個輪椅位， 但係我絕對唔係咁嘅意思， 呢個輪椅位絕對係 輪椅優先使用， 有輪椅上車一定要收bb車， 只係文中冇細緻討論條款， 所以先舉例參考“珀麗灣 客運公司條款”，謝謝各位的討論。
～ 亦都有人話遇到 有啲唔肯收bb車嘅理由係“bb瞓咗覺”，
其實我對呢啲“怪獸理由”都好反感！呢啲係冇品嘅人做嘅！絕對唔係一個唔收車嘅理由！ 我只係針對 一個人推住BB車，當時 又必須 用巴士嘅人士嘅困難， 可行情況之下我都贊成收車(其實多過一個人我都覺得要收車了， 不過好難係一篇文章做出咁細緻嘅討論…)。 衷心多謝各位嘅意見。
～ 亦有人提出bb車比輪椅多好多，
對的，bb車一定係多個輪椅，就係因為咁，輪椅使用輪椅位嘅幾率亦都唔高，好多時輪椅位只係畀乘客企，
而且好似 珀麗灣 關條款咁輪椅幾時都係要優先使用輪椅位， 有輪椅上就要收車如果乘客唔遵守 當然係乘客有問題。
所以我覺得參照珀麗灣呢條款係可行。
~既然bb車嘅數量多亦即係話有需要嘅人都會同樣多
～ 有人話唔收車好容易撞親人， 其實拍架車喺輪椅位鎖好會好穩陣， 而且必需要成人喺隔離 睇住 ，反而收咗架車都係放喺輪椅位 或者個巴士車轆小平台上面，之後行咗埋位坐， 邊個可以確保架車唔會跌落嚟撞親人 危險性反而仲高。
～有人提出, 如果同一時間好多架bb車上車會好混亂,
我之前都試過, 摺好bb車上巴士,之後發覺巴士上面已經有兩部bb車同埋有旅行喼, 有手拖車, 輪椅為已經用盡 ， 我部bb車冇位放，
好彩當時我有兩個成人, 一個抱bb坐好,一個就攞住部bb車企, 其實冇乜混亂同爭拗, 遇到人多會都要將就,
如果將來研究好嘅條款沒有列明細緻處理方法就唯有靠人嘅品德禮讓互助
而且我想表達嘅係針對"一個人有必要用巴士上車時遇到困難"時候嘅對策, 唔收車唔係首選。
其實如果呢個城市對bb車更加共融 設施更加完善， 相信好多人都會揀bb車而唔用孭帶，只係一啲 規條 同埋一啲守舊，約定俗成嘅想法令到我哋覺得需要用孭帶代替bb車，可以爭取更好嘅設施同規條唔係對各位媽媽都有好處咩。
～ 由於有好多人都誤會咗呢啲文章係主張用bb車霸住輪椅位， 所以我將文章作出少許修改，
之前說法係我表達上出現問題， 引起大家誤會實屬抱歉。
修改範圍如下：
令bb車喺許可嘅情況之下無需要收車， 而使用輪椅位。>>> 改成>>>
希望bb車使用巴士條款根據“珀麗灣客運公司臨時措施”作出修改
而疑問卷也將會刪除兩個選項，
只剩番
“根據珀麗灣 針對嬰兒車臨時條款修改現時巴士條款”
如果支特可以入去點一下謝謝。
https://docs.google.com/forms/d/e/1FAIpQLSf_OcNl5j406WQPgbMHjDJ4-WCN7wiCR3YIMH3Fhd2V4x1GwA/viewform?usp=sf_link
發表於 
返回列表
