想生BB

收藏本版
回覆 發帖
返回列表
跳至頁

首頁
12345...12

尾頁
   150
Ihyl


大宅

積分: 2694


1#
發表於 21-7-4 22:23 |顯示全部帖子
本帖最後由 Ihyl 於 21-7-4 22:40 編輯

睇咗BK差唔多4年，見到好多樓主嘅分享，亦有好多有心做IVF嘅JM遇到好多疑問，究竟IVF個流程係點呢?有啲咩test應該做？又有啲咩嘢要準備? 作為過來人，好想分享2年裏面，去過咗加拿大、台灣、馬來西亞嘅造人之旅。希望可以用我自己嘅經歷，俾各位JM了解多啲其他地方嘅情況。從而俾到各位JM一點點鼓勵同支持。

另外，我想記錄低呢2年嘅生路歷程，希望等將來孖B大個咗睇返，知道佢地自己生來不易。

故事由幾時開始講起好呢？

-------------------------

好啦，由我同老公結咗婚1年半都無消息開始講啦！(2017頭) 本身我自己係外站空中服務員，只飛長途，我同老公由拍拖開始已經係Long D，習慣聚小離多。平均一個月見到2～3次！其實結婚前2年已經開始不設防，打算有咗咪即刻結婚，不過一直到婚後1年都無聲氣(頭尾3年)，我地開始擔心係咪有咩問題呢？之前覺得見得小，唔勤力，夾唔啱時間啫(前2年半)。之後有半年，見得多，勤力造，量體溫，夾時間，都一樣無聲氣！

真係開始驚，自己年紀都唔細(當時37)，再拖嘅話，就越嚟越難。差一年差好遠！所以我地兩個都去咗睇醫生，結果發現原來我同老公各自都有問題。

究竟係咩問題呢？

我老公精子活躍度得17%，雖然唔係最差，不過啲精子形態都唔太正常，有頭無尾，有尾無頭乜都齊！而我check完晒，我輸卵管無塞，卵巢同子宮都正常，無移位，無水廇，但係天生子宮後傾。不過AMH得0.64，FSH就高到14，當時我聽到呢啲數字都一頭霧水。

但係醫生好快就同我講係不孕症，因為我個卵巢年齡大，同我真實年齡不符（講白啲咪就即係卵巢功能衰退！）嘩！嗰一刻我簡直覺得個天好似冧落嚟咁！我從來無諗過自己會不孕，唔開心當然有，不過喊都幫唔到件事，所以我兩公婆唯有收拾心情去面對。就係咁開始咗我嘅IVF造人之旅。

因為屋企人嘅關係，我响2017年年尾自己一個飛咗去加拿大做我第一次嘅IVF。(2017年中，我同老公嚟探親嘅時候，已經做咗冷藏精子)講真，當時乜都唔識，
因為婦科醫生係屋企人，所以好放心，乜都無問，就連IVF個過程係點做都冇上網去望過或者去做資料蒐集，醫生叫我做乜就做。

好啦，終於要開始做第一次IVF啦，簽好晒啲文件之後，首先就走咗去照陰超睇吓今個cycle 有幾多個卵泡，初初照到左右兩邊各有5粒(卵泡)加埋都有成10粒（我個心諗都唔係咁差姐）之後就見姑娘，佢就比咗一大堆針藥出嚟俾我，叫我毎日幾點鐘打針同打幾多，同我打咗第一針之後就叫我返屋企，隔多兩三日再返嚟照陰超睇吓啲卵泡有冇大到。其實對於我來講最難克服嘅就係要自己打針。喺加拿大一般做IVF，都係自己打針，護士幫我打咗第一針，示範完一次之後，全部都要我自己解決。自己唔打就真係無人幫我打，咁唯有硬着頭皮，自已攞支針拮自己。由每日打1支，慢慢加到每日2支，到最後差唔多抽卵嘅時間就一日打3支。（講真，真係好痛，痛到喊，喊住咁打。）不過，諗起為咗造人，就算再痛都要繼續堅持。

過咗三日之後，我就再返去照陰超，結果簡直係晴天霹靂！

點解？

因為之前照到有10粒卵泡，今日照竟然得返5粒，冇咗一半呀！當時醫生問我會唔會考慮今個cycle 停咗佢先唔好做住，因為啲卵泡太少喇！（我當時都唔識比反應，只係呆咗唔知點算好）當我消化咗個結果之後，我問醫生下個cycle會唔會多過10粒？佢都答唔到。所以我決定繼續做，因為跟本我無咁多時間留喺加拿大。

好啦，經過咗10幾日嘅銡針，啲卵泡嘅size都差唔多有16/17mm，係時候可以抽出嚟啦！


待續……
私人傳訊回覆 引用

Ihyl


大宅

積分: 2694


2#
發表於 21-7-5 13:33 |顯示全部帖子
到咗抽卵嗰日其實都冇乜特別嘅感覺亦都冇緊張(可能係乜都冇諗同根本都唔知會做乜）因為抽卵嘅時間係全身麻醉，當抽完之後唞咗一陣，姑娘就拍醒我，不過當時自己feel到好似起唔到身，掙極都掙唔開對眼，我用盡全身嘅力氣，feel到自己呼吸開始急速姑娘喺我耳邊叫我慢慢咁唞氣，就係咁我等咗3分鐘之後就慢慢慢慢先至可以掙開眼。

當我開始有返意識既時候，醫生就同我講今次只係抽得3粒，另外果2粒卵，用多咗兩樽藥水都冲唔到出嚟。小吓一粒，小吓又一粒，雖然只係得返3粒，起碼都好過1粒都無吖。（自我安慰）

由於老公啲精子活躍度唔高,所以我哋就用咗ICSI嘅方法係等佢哋受精。屋企人就幫我每日去問啲卵子嘅受精情況⋯⋯1變2，2變4，4變8，8變16，變變變好快又嚟到第五日啦！因為留係加拿大嘅時間唔長，所以我決定放鮮胎，喺去緊診所嘅途中我仲喺度掙扎緊，究竟係放2粒好定還是放1粒雪2粒呢？結果到咗診所之後，醫生同我講得返2粒（只有2粒可以去到day 5 嘅blastocyst）又小1粒，咁就可以唔使諗咁多，疊埋心水一次過放晒2粒落去(由於一心都諗住放哂入去所以我完全冇問到啲杯胎究竟係咩grading)
好啦，終於都放哂2粒入去，跟住落黎就係等，兩個禮拜後抽血驗睇吓有冇中獎。

待續…

點評

la_source    發表於 21-7-5 16:49
私人傳訊回覆 引用

Ihyl


大宅

積分: 2694


3#
發表於 21-7-5 23:45 |顯示全部帖子
由於我嘅大假唔多，成個IVF療程由開始到放返入去已經差唔多用晒我啲大假，又係時間返工繼續飛喇。其實我有問過醫生，喺等緊呢14日入面仲識唔識合飛呢？醫生話冇報告顯示話唔飛得，好多人自己有咗都唔知，一直飛到3個月先知。而且佢地都有好多病人做完之後都即刻飛走，所以寫唔到醫生紙比我請假休息。結果就係咁，我喺等待開獎呢14日入面就照常返工，反而冇咁多時間去胡思亂想。

當到第10日左右，因為醫生曾經講過由於我係放兩粒，所以好大機會係孖胎。如果真係中獎嘅話，大概第10日左右都可以用驗孕棒check得到，結果我都係忍不住走咗去驗。天啊，我見到有條好淺色既缐喎，嗰刻我勁興奮勁開心，不過冷靜左之後又喺度諗，其實喺咪錯覺咋。就係咁，攪到自己個心七上八落，每隔幾個鐘頭又走去驗一驗，而每次驗都係會見到有條好若隱若現嘅線…

不過真係天意弄人，果晚我瞓瞓下覺突然間覺得好似有嘢流出黎，我就砰砰聲衝咗去廁所check 下，開頭以為冇乜嘢不過去完個小便之後就開始見到啲粉紅色分泌物，跟著就好似越流越犀利。嘩我好驚呀，驚到即刻打電話返去比加拿大個醫生問佢係咪即係冇咗。

醫生叫我冷靜啲，如果真係冇咗嘅話都冇辦法啦，等多幾日就到第14日咁就可以去抽血驗hcg ，到時候個答案就會比較肯定啲，唔使自己再估來估去。

到咗第二日慢慢開始好似M嚟咁，不過我個心唔忿氣，堅持繼續用驗孕棒去驗，每次驗出黎條線越嚟越開始深色，越嚟越肯定係中咗奬。去到第三日我開始越流越犀利呀，終於忍唔住提早去抽血驗，等咗6個鐘之後終於有報告，我嘅hcg係213（bingo)

待續……
私人傳訊回覆 引用

Ihyl


大宅

積分: 2694


4#
發表於 21-7-6 07:03 |顯示全部帖子
當一收到個驗血報告，我就即刻打電話比加拿大個醫生，醫生就同我講:‘恭喜晒！’ 不過因為我流血嘅情況仍然持續，而且計返日子大概得一個月左右，就算去照都未必照得到，所以佢建議我最好隔兩三日再去抽血驗，make sure 個HCG繼續翻倍上升。

三日之後我就去咗驗第二次血，結果個Hcg係787。而我流血嘅情況雖然持續，不過已經冇之前咁犀利。本身應該三日後再去驗血，但因為係星期日嘅關係，所以下一次驗血要隔四日。

由於有出血嘅情況出現，所以由肯定咗中獎嗰一刻開始我就已經開始瞓床，真係除咗去廁所之外，唔會俾自己行嚟行去。不過好景不常，喺驗血前一晚，瞓係張床度睇睇下電視，個肚突然間好似比針吉左一下然後就開始劇痛。我係痛到跟本成個人連企都企唔直，要一路彎住個身，超辛苦先至可以用龜嘅速度慢慢咁行去廁所。一除褲就見到下面不斷流血，個肚就越來越扯住痛（oh no!阿Bs你哋係咪嚇我咋？唔好咁啦！）我坐咗係廁所大概20分鐘，先開始慢慢冇咁痛，不過流血嘅情況就未停過，就好似頭果兩日黎m咁。我係廁所再坐多20分鐘，感覺好啲喇，可以慢慢咁正常行返去房上床瞓。（但其實我好驚，我成晩都瞓唔到，我唔咁諗。）到咗第二朝我就一早起身去驗血，下午時份診所就打電話通知我Hcg係1312。

待續……

私人傳訊回覆 引用

Ihyl


大宅

積分: 2694


5#
發表於 21-7-6 20:38 |顯示全部帖子
同診所講完個報告之後就即刻打電話返加拿大通知醫生個Hcg指數，不過當醫生聽完之後就已經話……今次唔得啦，個指數已經向下跌！唔好諗咁多，休息多啲啦，下次再做過啦！

我聽完之後不斷喺度強忍眼淚唔敢喊（因為醫生始終都係屋企人，我唔想喺屋企人面前喊）當收咗線之後，我就即刻打俾老公，一聽到老公把聲我啲眼淚就忍唔住好似開咗水喉咁爆喊啦。我不斷喺度怪自己係咪自己做錯啲乜嘢搞到自己肚痛；係咪食錯左啲乜嘢而搞到BB走咗？！嗰一刻心情勁灰，當我冷靜完之後，又再喺度諗其實我放咗兩隻落去嫁喎，會唔會係其中一隻走咗而另外一隻仲喺度呢？我唔甘心，所以隔咗三日之後又再去驗多次個Hcg，今次個hcg得返502。知道個報告之後我終於都要面對呢次IVF嘅失敗，我個情緒再一次崩潰！我困住自己喺廁所喊咗個幾鐘，喊到對眼都腫到好似豬頭咁（宜家諗返起都覺得當時自己好傻）

隨着呢次失敗嘅經驗，自己開始慢慢去放鬆，坐完月之後就開始搵中醫去調理返自己個身體去準備第二次IVF。

待續…
私人傳訊回覆 引用

Ihyl


大宅

積分: 2694


6#
發表於 21-7-7 15:28 |顯示全部帖子
經過半年嘅中醫及針灸調理，我又開始準備飛去加拿大做第二次IVF嘅療程。由於上一次老公係用雪起嘅精，唔知會唔會影響個結果，所以呢次我哋兩公婆決定連精都係要用新鮮。不過由於老公工作關係，今次又係我自己一個人先飛去加拿大做IVF前期嘅準備。

當我一落機就第一時間去診所照陰超，不過照完之後，醫生有啲失望！因為今個cycle得3粒（真係差半年，功能又下降咗，所以如果有心做IVF嘅JM，決定咗做就唔好再等啦，子宮衰退係不能逆轉嘅事實）

由於得3粒嘅關係，醫生決定將啲針藥嘅劑量提升到最高，希望可以谷多幾粒卵泡出嚟！好啦，又經過左10幾日嘅銡針，雖然啲針藥劑量已經用到最勁，不過啲卵泡都係谷唔到好多，始終都係得3粒。而且個size已經去到17/18啦！正因為上次抽蛋嘅時間雖然見到有5粒但係最終抽得3粒，所以醫生今次都有建議我今個Cycle 唔好做IVF轉為做IUI（佢話佢有好多客人做IVF唔成功之後轉用IUI就成功咗，佢話我哋可以試一試）而吸取上一次嘅經驗，其實佢都怕今次呢3粒都未必一定抽得到出嚟。我哋兩公婆經過商量之後決定今個Cycle做IUI去試一試搏一搏！

待續……
私人傳訊回覆 引用

Ihyl


大宅

積分: 2694


7#
發表於 21-7-8 09:45 |顯示全部帖子
因為唔想影響今次IUI嘅結果，老公就提早三日到加拿大，等自己有足夠嘅休息去迎接做IUI嗰日。好啦，終於到咗做IUI嗰日啦，雖然唔使全身麻醉，但係因為我先天性子宮後傾，當醫生插啲喉管落嚟嘅時間，我總係感覺有啲唔自然，有啲怪怪地咁。隨着醫生慢慢咁將啲精蟲放入去我個身體入邊之後，就即係代表漫長嘅14日等待又要開始喇！

為咗令到自己係呢14日入邊唔好成日胡思亂想，我喺呢14日入邊就當自己來加拿大旅行，同老公周圍去玩，遊瀑布，睇酒廠。等自己放鬆吓又當係同老公度一個小蜜月！開心快樂嘅時光過得特別快，眨吓眼又到咗抽血睇吓有冇中獎喇。好不幸，今次嘅Hcg 係1（即係又失敗咗啦！）

其實已經失敗咗兩次，加拿大醫生建議我不如返香港，又或者去台灣，馬來西亞同泰國試下做，起碼唔使飛到咁遠，舟車勞頓，可能對我會好啲！如果到最後都係唔成功嘅，最終方法就係搵人捐卵。當然，我兩公婆都未接受到捐卵，始終感覺都係差啲！（我自己覺得如果到最後都係唔成功嘅，我寧願唔要都唔會接受捐卵，因為總係覺得唔係自己嘅！）

待續……
私人傳訊回覆 引用

Ihyl


大宅

積分: 2694


8#
發表於 21-7-9 08:29 |顯示全部帖子
就係咁我好努力咁去搵其他地方做IVF嘅資料，睇咗香港邊度有得做之後，諗住去登記。不過由於自己歲數嘅問題（當時39歲）同埋好多地方都要排期排好耐，計過數排到我嘅時間已經成40幾歲了（超高齡產婦）未必會同我做。於是我同老公就決定去台灣試一試。

我老公上網睇咗好多資料，搵咗唔同診所，最終搵咗個都算出名嘅診所去登記。通咗幾次電話，問咗基本資料，預約咗一個月後見醫生。休息左差唔多一個月，m到就準備出發去台灣做IVF喇。

我哋坐早機出發，到咗台北就攞住啲行李去診所，中午1點半就已經完成登記，不過見到診所人山人海，人多到連位都冇得坐。（當時我諗，呢個醫生應該都出名，希望真係幫到手；不過，同時間又證實咗另一件事，就係原來都有好多JM同我一樣生育有困難需要幫手。）等到4點鐘都未到我，走去問姑娘仲要等幾耐，姑娘同我講無咁快，而我嘅預約仲要係後加嘅，差唔多係尾3嗰個，姑娘叫我哋不如出去食個晏先，唔使急，留個電話俾佢，差唔多到我嘅就會打電叫我哋返嚟。我同老公出咗去成個鐘頭，食完嘢返嚟都仲未到，唯有繼續等等等。等下等下又等多個幾鐘，終於都可以見醫生啦。

台灣醫生好詳細咁問咗我之前做IVF嘅情況，當佢聽咗我用藥嘅份量之後，個樣都變一變，講咗句：「已經用到上限喎」。醫生問完所有問題之後，就講解台灣嘅做法，佢話我今次可以喺放入去之前做埋PGS/PGD （即係喺加拿大無做過嘅基因檢測。）

我同老公其實未聽講解之前，都決定咗今次嚟嘅係會開針做，只係想問清楚開針後嘅安排，例如幾耐返嚟照？可唔可以返香港呢？定係要留喺台灣直到抽卵呢？問晒我哋想知嘅問題，之後簽晒所有文件就去照陰超。醫生經過一輪左照照右照照之後就同我講我今個cycle 得一粒（what? 得一粒卵泡？！個天係咪玩我呀？計劃趕唔切變化）只有一粒，醫生唔肯同我係今個cycle 做IVF，就係咁台灣做IVF嘅計劃宣布告吹!

待續……
私人傳訊回覆 引用

Ihyl


大宅

積分: 2694


9#
發表於 21-7-10 06:32 |顯示全部帖子
喺台灣返咗嚟之後我就繼續睇中醫同針灸，希望對自己有啲幫助。（其實當時都有懷疑過睇咗咁耐中醫究竟有冇幫助）再抖多一個月之後，等下個cycle我哋兩公婆再去加拿大試最後一次！

終於又返嚟加拿大，又等到M嚟喇，又係時候去照陰超。講真丫今次照陰超之前，我個心都已經打定輸數，應該都冇乜幾多粒，但係出奇地今次有7粒喎。（嘩！超開心呀，未試過有咁多粒）於是我又展開咗我第三個IVF打針嘅流程！

由於今次黎做嘅心態係最後一次，今次就聽中醫講黎個中西合壁，希望多啲蛋同質地好啲！所以今次我除左毎日打針之外仲毎日都食中藥。（其實我自己好憎食中藥，不過諗到為咗要成功做到阿B，幾難食都要good一聲吞咗佢）唔經唔覺又過咗10幾日，又係時間抽蛋喇！

雖然今次抽卵都係全身麻醉，不過抽到一半嘅時間，我感覺到下面好痛（好似有嘢喺度撩撩吓）同埋覺得自己開始醒醒地，我不斷喺度縮、喺度掙扎，朦朧間我聽到有個姑娘係我耳邊講‘冇事嘅，好快就得㗎啦，唔好郁啦’，隔咗一陣之後我又開始冇咗意識咁瞓着咗啦！抽完之後一樣送咗我去觀察區度唞咗一陣，不過今次唔同嘅係老公拍醒我，佢叫我起身嘅時候我只係feel到自己好暈好wing好想瞓，跟著聽到姑娘話比我瞓多一陣，如是者我係觀察區度瞓咗成個幾鐘。

待續……
私人傳訊回覆 引用

Ihyl


大宅

積分: 2694


10#
發表於 21-7-11 06:33 |顯示全部帖子
我慢慢咁開始有返意識，咁啱肧胎專家剛剛經過，佢就同我哋兩公婆講啱啱睇過我抽出黎啲卵泡，今次抽到五粒出嚟而且全部都成熟可以用，等佢處理好之後就會拎去用ICSI受精。（我就趁住呢個機會問佢第一次IVF嘅卵泡靚仔啲定係今次嗰啲靚仔啲呀？佢就話第一次嗰啲其實好差，正常佢哋唔會建議放返入去，不過因為我唔係住喺加拿大，所以先幫我放入去，睇吓有冇成功嘅機會）

好啦，又到咗等佢地1變2，2變4，4變8嘅時間啦，好不幸有2粒係Day 3嘅時候停左，最後得返3粒可以去到Day 5！而我今次亦都係選擇放鮮胎，我覺得反正都係放，放2粒落去起碼多個機會先嘛，剩返嗰1粒就雪起咗！

唔知係咪喺呢個地方留得太耐，超唔想再留喺度等呢14日，所以最後當我放完嗰2粒入去之後就即刻搭飛機走人返屋企。其實第一個星期唔知係咪因為時差關係，大部份時間都係瞓，食飽就瞓，瞓飽就食，成個人好relax。不過到咗第二個星期，慢慢開始適應返個時差，就開始瞓唔得多，個腦又開始喺度亂諗嘢…究竟我今次得唔得呢？好想知道今次有冇中奬呀！如果唔得嘅話我又應該要點樣做好呢？當時個腦淨係浮現咗好多問題，仲有好多負面嘅畫面。

為咗唔好俾自己亂諗嘢，我嘗試去做好多唔同款式嘅甜品蛋糕去打發時間，令自己去分散注意力，結果做咗一大堆甜品蛋糕出嚟，一下子又食唔哂，所以又停咗冇做。當一停低咗冇嘢做我又開始亂諗嘢，結果我就開始上網去睇吓啲IVF討論區，去睇下其他JM做IVF嘅經過問同分享。

待續……
私人傳訊回覆 引用

Ihyl


大宅

積分: 2694


11#
發表於 21-7-11 13:06 |顯示全部帖子
回覆 tshoyi 的帖子

其實老公真係好好，從來冇話過‘不如唔好再做’。就算係要佢返工請假，佢都肯願意陪我飛來飛去去做阿B，（當然亦都要感激老公嘅老闆對老公嘅支持同體諒，肯比我老公請咁多假去做阿B）
私人傳訊回覆 引用

Ihyl


大宅

積分: 2694


12#
發表於 21-7-12 09:09 |顯示全部帖子
嘩！睇完啲討論區講喺香港會點樣做IVF之後，其實我有啲慶幸自己冇喺香港做IVF嫁。點解咁講？？因為响加拿大嘅醫生曾經同我講過，佢哋只會幫病人放Day 5嘅 blastocyst 入去, 唔會移植亦都唔會雪起Day 2/ Day 3嘅embryo。佢話如果連Day5都去唔到既，咁放入去做乜鬼喎？（我見到有啲JM講，醫生話粒embryo喺外面養唔大，放入去可能會大呢？）唉！嘥錢嘥時間，仲要影響埋自己嘅心情同比個假希望自己，最後仲令到自己好失望好唔開心，為乜呢？真係嘥鬼氣！

我諗諗下又覺得講得幾啱喎，我見香港個啲都係為咗要有胚胎’雪‘而會選擇Day 2/Day 3就拿拿聲雪起佢，因為佢哋怕啲胚胎等唔到去Day 5做blastocyst，怕會全軍覆沒，到期時乜都冇…得個吉。（講真丫，如果係咁我寧願唔雪，冇希望就唔會有失望嘛！你話係唔係？）

如果我同你講兩個失敗個案：
第一個，有一粒embryo喺實驗室培養，檢查咗係有缺陷，收到電話通知你培養失敗；第二個，培養完嘅blastocyst，直接移植入去，要你好忐忑咁去等14日，然後先知道係失敗！

雖然完全係兩件事，但係结果都係一樣………係失敗！JM比著係你，你又會點樣揀呢？你問我嘅，我一定係揀前者！（起碼唔使攪到自己個心情囉囉攣十幾日先啦！）當然每個人都有權選擇自己想要嘅做法啦。（呢個純粹係我個人嘅感覺）

好啦睇睇下啲討論區，唔經唔覺有到咗開奬日啦，我一早起身就走咗去抽血驗Hcg ，希望可以快啲知道結果嘛。不過當電話響起嗰陣，我突然間全身起雞皮疙瘩，個心七上八落好驚咁。（完全唔知點解會係咁！）

待續……
私人傳訊回覆 引用

Ihyl


大宅

積分: 2694


13#
發表於 21-7-13 09:12 |顯示全部帖子
結果姑娘話今次嘅hcg檢驗指數係1.9（即係今次又衰咗啦！）我未嚟得切消化呢個事實，（其實好想爆喊）就即刻打咗比我馬來西亞嘅朋友（因為呢個朋友講過如果我今次再失敗嘅話，就叫我去馬來西亞佢之前做過嗰間試下，話哂…佢都係過來人，曾經做過一對龍鳳胎同埋一個仔一個女嘛！）跟著我就打咗去馬來西亞，預約3日後見醫生，仲即刻訂埋三日兩夜嘅機票酒店。然後過兩日就出發啦（剛剛好去到M就來了）

去到馬來西亞之後休息咗一晚，第二朝一早就去到呢間診所。到咗好快就做完哂啲基本嘢，填表、簽文件同做檢查（嘩，呢間診所大過台灣嗰間好多，人又多過台灣嗰間喎！唔通真係咁勁？！喺等緊見醫生嘅時候，我就隨手攞起本小冊子睇下佢哋嘅診所簡介（因為呢間診所係朋友介紹，我就信哂個朋友，所以完全冇去望過間診所究竟有咩做同埋成功率係有幾多！）我見佢哋寫自己嘅成功率有82.5%（果陣係2018年，宜家睇返2020年都有成82.9%），喺全亞洲都數一數二嫁喎。仲有丫，佢哋解凍卵子嘅成功率仲要係100%。（咦，我見啲JM講過溶咗雪會跌grade嫁喎，佢哋可以做到同雪之前一樣grade？！咁ok 喎！）

待續……
私人傳訊回覆 引用

Ihyl


大宅

積分: 2694


14#
發表於 21-7-14 07:06 |顯示全部帖子
等呀等，出去食完個晏再飲埋杯拉茶返嚟都仲未到我，最終等咗六個幾鐘頭，終於可以見到醫生啦。一入到去醫生就好詳細咁問哂我哋以往做IVF嘅資料，用咗咩嘢藥，用咗幾多份量。之後就開始照陰超，醫生話我今個cycle 有7粒可以開針啦。我老公就好奇咁問醫生，我上個cycle 先啱啱抽完，需唔需要抖下先，等下一個cycle 先再開針呢？

不過醫生就好肯定咁話：‘你太太嘅AMH得0.64，所以每次都係得個位數字嘅卵子係好合理。今個cycle有7粒，如果唔抽等下個cycle 其實都唔會多，而且仲要浪費咗今次嗰7粒。Anyway 開針與否你同老公自己決定啦。不過，如果太太仲係後生嘅話，我都會建議佢休息一下先再做，但係以佢嘅年紀，已經唔可以再等，等多幾個月個答案其實都係一樣…甚至會越來越少！所以我會建議太太即刻開針做，最好係連續抽幾個cycle，抽到有10粒以上嘅卵泡再做埋PGS去搵啲正常嘅肧胎，咁先至會有機會成功！’（嗰一刻我喺度諗，呢個醫生都好識搵錢喎，連續開幾針咪好貴囉！）跟住醫生繼續解釋：’其實呢個係好簡單嘅數學題，卵泡越多，可以培養到好嘅blastocyst 嘅機會就越大。’

講到呢度，我同老公當然明白啦！話哂之前都有三次失敗嘅經驗嘛，當照到有5粒卵泡就只係抽到3粒，最後培養成功嘅就只係得返2粒，仲要唔知健唔健康，正唔正常喎。所以呢一刻我同老公個心都決定咗要開針。我只係想知多啲PGS嘅作用。當聽完醫生解釋，只要做咗PGS就能夠搵到正常嘅blastocyst，以我嘅卵巢狀況成功率應該有八成以上。

聽完呢句話，我老公即刻同醫生講：‘開針啦！’ 醫生跟著就講：‘其實先生啲精子嘅活躍度同形態都唔係十分好，我會開啲補精嘅supplement 比先生食一個月，希望可以輔助到啲啦！’ 就係咁，我就開始咗我第四次嘅IVF療程。

待續….…
私人傳訊回覆 引用

Ihyl


大宅

積分: 2694


15#
發表於 21-7-15 07:51 |顯示全部帖子
由於今次嚟馬來西亞之前跟本就冇諗過會即刻開針，所以只係訂咗三日兩夜嘅機票酒店，宜家我又要嗱嗱聲訂過另外一張機票同酒店準備三日之後再飛番嚟照陰超去跟進返啲卵泡。結果我一個星期入面飛咗嚟馬來西亞2次！其實喺馬來西亞做IVF嘅流程同加拿大嘅都係大同小異，不過，醫生知道我失敗咗三次，所以今次就用咗唔同嘅針藥，希望效果好啲。如是者又過咗10幾日，又係時間要抽卵啦！（今次開針，我都停咗食中藥，反正之前食住做都唔得，試吓唔食有無奇蹟出現）

到咗抽卵嗰日，喺預定時間去到診所，姑娘就安排好間獨立病房比我，然後叫我換好哂手術衫之後等叫名（其實我抽卵嗰日，除咗我之外，仲有另外五個人。嘩！佢哋真係好忙，唔怪得知平時去診所等照陰超嘅時候，見到啲醫生走上走落，原來就係一邊喺上面手術室同病人進行抽卵手術，之後又走返落去診所幫其他病人照陰超同會診）

講真丫，其實喺加拿大抽卵同係馬來西亞抽卵都係用全身麻醉嘅方法，不過喺馬來西亞就會喺隻手背上面針，一粒豆，之後再叫你吸幾啖氮氣去令到你昏昏欲睡，所以當我喺馬來西亞抽完之後，我都冇出現暈暈地同wing wing地嘅情況。隔咗一陣，手術室嘅姑娘就走黎幫我檢查狀況同check血壓，一切正常。姑娘跟著就同我講今次抽咗2粒。吓？咩話？！乜唔係有7粒咩？我即刻追問個姑娘：‘你係唔係攪錯咗呀？醫生話有7粒卵泡，點解得2粒嘅？！’（話哂今日連埋我都有成6個人抽卵泡，係咪攪錯咋！）姑娘即刻再幫我check。

等咗20分鐘之後，姑娘同我講冇攪錯到，今次我只係抽到2粒。佢話如果我覺得有問題，轉頭可以安排我去見醫生問淸楚。但係點都好，胚胎專家都係會用ICSI嘅方法去幫卵泡受精，而聽日胚胎專家會打電話通知我啲卵泡嘅受精情況。

等呀等，等呀等，等咗兩個鐘頭終於見到醫生喇，我老公就已經急不及待咁追問點解得2粒，喺咪有咩問題發生咗呀？（抽咗咁多次，今次照到有7粒係最多，反而抽得最少，一半都無，得嗰2粒）醫生就解釋，佢已經用咗兩倍份量嘅藥水，但係好可惜沖極都沖唔到出嚟，最後只係沖到2粒，所以係冇辦法嘅情況之下，我只有接受得2粒嘅事實。佢仲安慰我話，唔緊要啦，下個月我哋會繼續抽嘛。（我嗰刻係勁無奈囉！）

由於我係要連續抽卵，所以醫生就幫我計下次大概幾時會嚟M，然後再同我預約埋嗰日再返嚟照陰超。就係咁，手術之後嘅第二日我就飛咗返香港休息啦。

待續……
私人傳訊回覆 引用

Ihyl


大宅

積分: 2694


16#
發表於 21-7-16 07:37 |顯示全部帖子
返到香港一落機就收到胚胎專家嘅電話，佢話尋日抽嘅2粒卵泡，全部都成熟，而且2粒都已經受精分裂，佢哋會繼續培養去到Day 5，之後再攞去做PGS。

好快又去到第五日，收到胚胎專家打俾我嘅電話，佢話俾我知嗰2粒胚胎最後只係得1粒能夠去到Day 5，而且呢粒仲要係Good grade 嘅blastocyst (喺呢間IVF 診所嘅grading 係分為：Good，Fair good，Fair，Poor fair同Poor）胚胎專家問我喺咪需要做PGS? 我同佢確定咗要做之後，佢就再同我解釋，由於PGS檢驗需要大概兩個星期先至會出到報告，所以粒blastocyst抽完組織做PGS之後，佢哋會先雪起粒blastocyst再等報告出，直至要做植入嘅時候先再解凍。

過咗兩日之後，介紹我去呢間診所做IVF嘅朋友打電話比我，問我個情況同進展，我就同佢講得1粒可以做到PGS咋。好失望！明明話照到有7粒，但係最後都只係抽到2粒！（勁無奈！）跟住佢就問我想唔想轉另外一個醫生試下，佢話想當年佢做IVF嘅時間都用過兩個唔同嘅醫生。我諗諗吓都好喎反正都係試，就係咁我就打咗返去診所叫佢哋安排另外一個醫生比我去做下一次嘅IVF療程。日子一日一日咁過，好快又過咗兩個禮拜，我又再次獨自飛返去馬來西亞準備第五次IVF嘅開針。

待續……
私人傳訊回覆 引用

Ihyl


大宅

積分: 2694


17#
發表於 21-7-17 05:50 |顯示全部帖子
同上一次一樣，我一到馬來西亞就即刻去診所。由於今次換咗另外一個醫生，所以係見醫生嘅時候，佢又好詳細咁問我以往做IVF嘅資料，用咗咩嘢藥，用咗幾多份量，我又再一次講俾醫生聽。當醫生了解清楚之後就開始同我照陰超喇。佢一路照一路係個電視螢光幕度指示比我睇我左邊有3粒，右邊有1粒同幾粒非常細嘅卵泡，醫生解釋太過細嘅卵泡就算開針用藥都未必跟得上其他卵泡嘅大細，所以醫生話我今個cycle都只係有4粒嘅基礎卵泡。

而根據過去幾次IVF所用嘅藥，醫生覺得可能啲藥唔係咁適合我，所以佢決定今個cycle再轉用另一種藥，希望今次個效果會好啲。如是者一開始一日銡1針，四日之後就一日銡2針，再過多四日就一日銡3針，差唔多到抽卵嘅時候就要一日銡4針！（每日都準時咁左右左右係咁銡，唉！我成個肚全部都係窿窿啦）

到咗抽卵個日，（唔知點解心情有啲期待又緊張）我換好晒手術衫之後好快就叫咗我個名。（今日好似冇上次咁多人抽）入到手術室，又見番同一張手術床同一個麻醉師，麻醉師同我核對過個人資料之後，就問我之前係咪係邊度見過我，覺得我好熟口面。（我心諗，你梗係見過我啦，上個月咪喺呢度見過你囉！）係呀！我同佢講上個月先喺呢度抽完卵泡嘛。跟著佢就同我講：你加油呀，希望你今次成功唔使再喺呢度見到你啦！（我都希望係咁！）之後佢就俾咗兩啖氣我聞然後我就瞓着咗嚕。

待續……
私人傳訊回覆 引用

Ihyl


大宅

積分: 2694


18#
發表於 21-7-18 06:49 |顯示全部帖子
終於都抽完第五次蛋啦，又係時候睇賽果。今次姑娘同我講，我抽到5粒！（吓！乜唔係得4粒咩？點解又會變咗5粒㗎？多咗粒嘅？唔係呀嘛，又玩我呀？之前就抽少咗，今次就抽多咗，喺咪睇錯呀！）於是姑娘就安排我去見醫生。一見到醫生，佢就問侯我：‘你宜家感覺如何？有冇邊度唔舒服？一陣間返去好好休息。’

跟住佢就慢慢解釋返頭先我抽卵泡嘅過程，醫生話本身照到嘅嗰4粒基礎卵泡已經全部抽晒出嚟，意外地亦都抽多咗一粒細細粒嘅。不過呢粒細嘅，一抽出嚟，就已經知道係冇可能用嘅，因為個size太細一定未成熟。不過，唔緊要，今次抽到我哋預期嘅4粒已經係好好，跟住落嚟就會拎去受精同培養，到時睇吓Day 5個結果係點啦，然後我哋再研究下一部點做！

到咗第二日就收到胚胎專家嘅電話，佢話嗰4粒卵子入邊，有2粒成熟另外2粒就唔成熟；唔成熟嗰2粒，已經加咗啲營養液落去培，希望培養到佢成熟，大概聽日就會知道結果。而成熟嗰2粒就已經受精，不過分裂得有啲唔正常！（吓？！點樣唔正常呀？唔係1變2，2變4，4變8嘅咩？！ 係呀，冇錯呀，正常嘅分裂應該係1變2，2變4，但係呢2粒受精卵，其中一粒就1變4，而另外一粒就1變2.3（吓？！變咗2.3？咩係2.3呀？完全唔知佢講乜！）胚胎專家好有耐性咁解釋比我知，變咗2.3就即係，佢分裂到2嘅時候粒大嘅細胞跟著旁邊黐住3粒細嘅細胞。跟著我就追問點解會咁，胚胎專家只係話原因不明，不過肯定嘅係佢分裂得唔正常！至於唔成熟嗰2粒會繼續跟進。

又過咗一日，胚胎專家再一次來電，佢話另外2粒已經培養成熟，亦都已經受精開始分裂。（唉，好彩呢2粒係正常姐，不過我又開始驚，如果到Day 5全軍覆沒嘅話我咪乜都冇，最後又係得個吉）原本我諗住第二日一早返香港，最後都係改咗機票，去見完醫生先再飛番香港。

待續……
私人傳訊回覆 引用

Ihyl


大宅

積分: 2694


19#
發表於 21-7-19 07:12 |顯示全部帖子
一見到醫生我都未問佢宜家我要點做，佢已經好主動咁問我跟著個plan想點，我好直接同佢講，其實我好驚今次會全軍覆沒，最後得返一粒唔知PGS正唔正常嘅 blastocyst，萬一連嗰粒都係唔正常嘅話，我呢兩個月咪又白做囉！佢亦都好同意。諗咗一陣，佢問我辛苦嘛？你下一個月要唔要繼續再做？需唔需要抖返一個月先再做？我好老實同醫生講其實我都要返工嫁，我唔可能請咁耐假，而且我已經冇咩彈藥去做啦（其實做咗咁多次都差不多用哂所有積蓄），我都係時候返工儲返啲彈藥先至可以再繼續做呀！

跟著醫生就講，一生人嘅卵子數量其實係有定嘅，（由出生嗰一刻已經定咗，係不變嘅事實）每嚟一次M就會少一定嘅數量，所以個儲存量只會越嚟越少，質量亦會隨著年紀增長而越嚟越差。而成孕嘅關鍵始終係精子同卵子嘅質量問題。如果25歲抽嘅卵，冷藏咗，雪到45歲，就算收咗經先放返入去。成功率都會高過一個40歲先抽卵做IVF嘅case。就係咁，我聽完之後，就決定比自己最後一次機會，無論成唔成功都好，都會係最後一次！

醫生見我咁有決心，加上當其時計番我下次黎M嘅日子差不多係聖誕節咁上吓，佢怕我大時大節一個人係馬來西亞過，就叫我帶埋啲針藥返香港打，今個cycle唔使照咗陰超先開針喇！（因為已經決定咗有冇都會係最後一次嘛）叫我同老公同屋企人過完聖誕先再飛番黎馬來西亞見佢！

待續……
私人傳訊回覆 引用

Ihyl


大宅

積分: 2694


20#
發表於 21-7-20 06:22 |顯示全部帖子
時間過得好快，眨下眼又過咗聖誕節，即係我又要開始我第六次嘅IVF療程！係時候飛番去見醫生喇。今次一見到醫生，我就急不及代咁問我啲蛋蛋係點？嗰2粒去唔去到 Day 5呀？有冇拎去做PGS呀？之前第一次攞咗去做PGS嗰粒喺咪應該有結果啦？（哎喲，真係好多問題呀！）醫生見我咁緊張都好快手咁搵返哂啲報告出黎睇。

跟著醫生就講：‘首先嗰2粒受精卵，其中一粒去到 Day 3就停咗，而另外一粒雖然去到 Day 5做 blastocyst ，但係囊胚入面嘅細胞團唔夠多，唔符合做活檢嘅質量，而且亦都開始變黑，所以佢哋冇拎到去做PGS。而之前拎咗去做PGS嗰粒，報告都出咗喇，報告顯示第18對染色體出現問題（即係T18），唔正常，所以呢一粒都唔可以用啦！（我聽完之後，我成個人好似跌咗落個萬丈深淵咁，好無助！感覺就好似乜嘢都冇哂咁！打咗咁多支針，抽咗咁多次卵，驗咗出嚟又唔正常）唉！個天係咪玩緊我呀！唔通想要個阿B都真係咁艱難？！？

醫生解釋，如果呢粒胚胎冇拎去做PGS嘅話，佢哋可能已經幫我放咗入去，因為佢已經去到 Day 5嘅blastocyst 而且仲要係 Good grade，佢好大機會會成功。不過當陀到一半做産檢嘅時候，就會發現有問題！其實第18對染色體出現問題都有成功出生嘅個案，不過呢對染色體出錯的話就係我哋平常見到嘅愛德華氏綜合症。到時可能再要決擇繼唔繼續生。醫生跟著就安慰我：‘唔緊要啦，我哋仲有希望！我哋寄望今個cycle啦！好啦，我哋不如照下先，睇下今個cycle 有幾多粒啦。’

待續……
私人傳訊回覆 引用


首頁
12345...12

尾頁

跳至頁
返回列表
回覆
發帖
高級模式 | 發表帖子
B Color Image Link Quote Code Smilies
你需要登錄後才可以回帖 登入 | 註冊

© 2024 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見