嬰兒醫護 今日: 0|主題: 79101

各位媽媽,之前我都係受bb訓覺既困擾,但做左呢個training之後,而家bb既睡眠問題已經得到好大既改善,
所以我都好希望大家同bb都可以有覺好訓
我都明白bb出世之後會好忙,冇時間追post,所以我盡量將D問題GROUP埋一版,等大家容易D睇

如岩岩出世既話固定左作息, 佢可能已經好好湊, 唔洗TRAIN
只要你規律地, 在他清醒時放在床上, 呢個時間係很易學懂自己訓覺
出世開始每日作息定時,自自然然, bb就跟住lee個規則行,你自己都會容易控制

如Bb已經有抱訓/要人氹先肯訓/奶咀/食住奶訓等等需要外來既東西, 先可以訓覺, 而你又唔滿意呢種狀況,
呢個Training可能幫到你
TRAIN前必須有既基本條件：
A)ＢＢ冇唔舒服
B) 家人合作(TRAIN時屋企人唔阻止/鼓勵及陪伴TRAIN BB O既你)
C) 夠狠心
如果你BB有唔舒服 / 家人反對 / 心軟,唔忍心BB喊 是但一樣,基本上你既失敗率既高達99.9%.......
所以建議你唔需要再睇埋落去


注意:BB 6WEEKS大先可以開始做(呢個訓練適合6星期大至自己落唔到床O既小朋友, 已經落到床至8歲左右, TRAIN法概念一樣, 不過有少少事要注意, 因為離題所以不表了)

夠決心Ready呢個訓練,家人既配合,第一步先幫bb定立一個固定既時間表

一歲前
4小時一個CYCLE, 包括食--玩--訓, 當你固定了, 他們到時到候就會餓, 到時到候就會眼訓
所以TRAIN呢段時間, 要日日O係屋企, 到成功左, 就可以出街都用同一個ROUTINE,
而訓練短則一兩日, 長則兩星期, BB就可以習慣個時間表

呢個訓練唔係亂咁由得佢喊，要你先解決佢所有需要先可以用, MAKE SURE佢唔會餓/片濕/冷/熱....
最後佢想要O既係抱, TRAIN佢時, 等佢明白, 你唔會抱佢訓....當然O係佢玩/食奶時, 你要抱得足夠, 有良好親子關係
頭1-3日,唔好祈望BB會立刻習慣,佢地一定會表現唔習慣,會以喊聲去爭取佢地想要既野(抱訓/暗訓/奶咀/食住奶訓等等)
所以頭一日做訓練,bb大喊,喊到面都紅,喊到聲沙,喊成個鐘其實係好正常(每一個媽媽train自己個bb都係必經的)
跟住你會發覺bb喊既時間會縮短

唔係做一日就會見效,預一星期, 最多2星期, 日日做同一個時間表同一個流程....如果2星期都唔成功, 而你又做晒所有野, 佢應該舒服, 你個心又定, 先至要改時間表
另外, 一開始用時, 佢地一定會抗拒, 你可以O係佢喊時, 等一分鐘, 再入去拍佢2分鐘, 然後就走開
注意拍佢時, 唔可以望眼, 如果哼音樂就靜, 唔好開聲講野; 如果講野先靜, 唔好抱, 最後一定要抱, 都只可以抱兩分鐘
兩分鐘後不論佢已經冷靜/仍然在喊都要放底,直至下一次安撫時間

媽媽們常見的疑問:
1)什麼是Nap?
小睡

2)怎樣將食奶時間拖至4小時一個cycle?
不可一下子一拖便拖一小時,每一日延遲15mins,等bb慢慢適應
拖延時間可以同bb玩下,分散佢注意力,亦可用奶咀暫時安撫一下佢既情緒

3)人奶易消化,BB很快便肚餓,可以4小時一個cycle嗎?
可以!方法都係一樣,每一次延遲15mins,但確保餵奶姿勢正確,BB一定是吃到奶的
因為餵哺姿勢錯了,即使已啜了成個鐘,都會食唔飽, 而且每邊食足15分鐘, 其食30分鐘

4)時間表延遲/提早有影響嗎?
岩岩Set好最好次次都準時,一次半次既延遲/提早都OK
但不要日日都出現延遲/提早,如果是這樣,就不是固定時間表了

5)如果有一餐提早左餵,下一餐需要提早返嗎?
不需要,照跟時間表SET好的時間

6)點解要SET固定時間表?
固定左時間,佢地要O既基本野, 你夠鐘就俾佢; 佢地會因而建立左安全感; 再者, BB個身體會自然調節至夠鐘就餓, 夠鐘就瞓, 因為所有需要都被滿足, 所以不會亂哭; 有固定作息O既BB都好鐘意笑, 因為唔需要擔心幾時食幾時瞓, 有安全感

7)BB食完奶整極都唔醒?點算好?
可嘗試用凍水抹面/換片 ; 用盡一切方法都唔得, 咁必須掃好風落哂格先放返落床, 落床時, 佢最少都要醒一醒, 知道自己落左床, 因為瞓前瞓後環境改變, 會令BB不安, 因而突然大喊

8)BB訓了,但又夠鐘飲奶,如何做?
叫醒他食,唔好諗住由佢訓醒先餵,因為你呢一餐唔準時,下一餐又會有影響
如是者,時間表就不夠固定了

9)點解要用安撫物呢?
安撫物係提醒BB要訓覺,每次訓覺都要比佢,訓醒就欏走, 久而久之,BB一見到安撫物就知道要訓覺;
而且BB同大人一樣, 會有自然清醒時間, 佢一摸到聞到感覺到安撫物, 就知你要佢瞓, 唔洗你親自走去氹佢瞓

10)BB唔理安撫物,點好?
BB唔一定要攬住佢,可放在床邊,每次訓前比佢望一望都可以
落床就俾COMFORT ITEM, 夠鐘起身就伶走, 唔洗迫, 佢見多幾次, 會攬住, 一旦有效, 佢半夜醒左會自己搵返

11)用嘜野做安撫物比較好?
可以用安撫奶咀,不過只給一次, 跌左唔俾返佢, 其他時間唔俾奶咀, 1 - 1.5歲戒奶咀
(不過好多BB都要大人幫佢搵返個奶咀, 如果要人搵返個奶咀, 佢先瞓, 奶咀就唔係一個好O既安撫物)
毛巾/公仔最好, 方便帶出街同埋清洗

12)安撫2分鐘時仍然大喊,應該繼續安撫至冷靜嗎?
不需要,2分鐘後,不論BB已經冷靜定係依然大喊,都必須放底

13)BB喊得時間太長,喊到面紅耳赤,聲沙,眼腫腫,會有問題嗎?
老人家話會喊到突肚臍,入風,我就未聽TRAIN過既媽媽有發生過呢D問題
喊到面紅耳赤,聲沙,眼腫腫都係必經既階段,最緊要100%確保佢冇唔舒服就可以放心, 當然, 佢喊到嘔, 就要幫佢清理, 不過在佢安全情況下, 都係施施然去清理, 唔好緊張, 不過要預左, 試多幾次係咁, Bb會用嘔來威脅大人就範
所以佢瞓時喊到嘔要在安全情況下清理 (唔係一味唔理佢), 但日間清醒時BB以嘔威脅大人就範, 就唔洗即時清理, 反而要走開一陣, 幾次之後, 佢發現嘔唔會令佢有想要O既野, 就唔會以嘔威脅

14)BB咁樣喊法會唔會影響心理?
我地絕唔係因為唔比奶/唔理佢/令到佢喊,只要你滿足哂佢生理上既需求
平時食奶(30分鐘)/掃風(30分鐘)/玩時抱得足夠, 有良好親子關係,呢個訓練係唔會影響BB日後既心理
.BB必須要抱, 抱抱同食奶一樣重要, 有實驗發現, 沒有猩猩媽媽抱的小猩猩, 即使食物充足, 也會因缺少抱而死亡
這裡提倡的只是不抱不氹自己瞓

15)如何忍受BB既喊聲?
可以襯呢個等待既時間做下家庭細務, 總之一定要搵野做分散自己既注意力;
其實BB只要無野唔舒服 (除左扭抱瞓), 喊, 係少事


16)見到BB喊成咁,好心痛,想放棄,如何是好?
首先,你一放棄,BB之前喊既眼淚就白流,而且BB訓得差,對腦部既發展同成長都會有影響
父母亦因為BB訓得差而影響情緒,冇時間休息
一有呢個想法可以入黎呢個POST,睇下媽媽們成功既例子,為自己打支強心針,繼續堅持落去!
你會發覺喊聲會一次一次/一日一日縮短, 然後佢識笑/多左笑容, 就咩都抵返


17)BB訓到中途突然間喊,我洗唔洗理佢呢?
如果已經用安撫物, 又無改變BB瞓前瞓後環境, 訓到中途突然間喊,可能係發夢,亦可能係訓唔到去下一個CYCLE
呢個時間唔好擾攘BB,唔洗即刻去安撫佢,咁樣反而會打斷佢地既睡意
比時間等佢地自己訓返，如果10-15分鐘過左都仲係喊緊,先入去睇下佢會唔會片片好濕,冷熱問題


18)BB識轉身,識企,放佢落床就反身/扶住床邊企係到,點處理?
不需強行將BB禁低唔比佢起身,放床後有得佢,每隔一陣入去睇下佢,如果佢企身/反身就將佢訓返低
不停重覆又重覆呢個動作, 佢會明白要瞓底, 直至BB訓著為止....
其實佢企起身, 代表佢想挑戰你要佢瞓O既權威, 『你要我瞓, 我偏唔瞓』,
所以你堅持, 佢會敵唔過你; 一般, 佢第一晚你堅持直至佢瞓, 第二晚佢未必會再企起身, 第三晚可能準時瞓著


19)訓練途中BB病了,可繼續嗎?
必須立刻暫停,一切等待BB康復才可繼續


20)訓練幾時見效?
Bb愈細就愈易訓練,而時間亦都相對地短, 但我發覺大人個心愈平靜, 家人愈合作, 愈快成功
快則2-3天,慢則1-2星期,基本上2星期後已經可以好穩定了


21)如何說服家人支持訓練?
最直接既方法可以叫佢上黎睇下呢個Post,有好多成功既例子
如果老人家唔識睇/唔肯睇,就洗小小錢請佢地去旅行,襯佢地唔o係到幾日train BB
我第一次TRAIN都係襯奶奶去左旅行試的
其實家人都係為BB好, 只係大家唔知點先可以令小朋友”好” 甚至對”好”O既定義不同,
開心見誠講, 良好溝通, 對TRAINING或教小朋友都有幫助

22)如何介夜奶?
Bb滿月後已經可以介夜奶, 12點過後, 唔喊唔餵, 如果你最後一餐餵多D, 佢都定時定候半夜喊, 咁即係佢習慣左你某個鐘數要氹先肯瞓, 唔係肚餓
試下, 只係餵水, (當然都係唔喊唔餵喇), 然後每日減一半份量, 幫佢戒
如果第二晚又醒, 都係餵水, 不過少過之前一晚一半
每次都減份量, 到第四朝不餵, 只拍.....
如果只係早過早餐時間少少, 就連水都唔餵, 慢慢拖時間, 拖到夠鐘為止

24)BB食奶咀可以自己訓,但甩了便喊,如何是好?
奶咀可以做安撫物,但只可以比一次,如果佢一甩左就喊,奶咀對佢黎講就唔係好O既安撫物
介奶咀方法都係一樣,用Crying control,好快,佢就唔記得左奶咀既存在, 愈細就愈快戒到
(我個仔都係咁介架咋~而家完全唔洗食奶咀就可以訓覺luu)

25)成功了,間中抱訓/時間表提早/延遲多一點有影響嗎?
冇問題,一次半次是可以的,有時我帶亞仔出街,d親戚就自然好幫手咁暗佢訓覺
又或者到左nap時間d親戚都唔比佢訓覺= =開頭我都好緊張,不過一日半日,只要返到屋企後
日日如是用返同一個routine就冇問題

26)訓練成功後,BB無故大哭唔肯訓?
以我個Case為例,bb訓練後night sleep已經可以唔喊,5-10mins內一定訓著
但有一日放床後冇耐突然大喊,喊左十幾分鐘都唔肯訓,Crying control都唔得,最後攪左2個中先訓到
第二日沖涼先發現因為佢背脊敏感起左紅粒粒,所以,如果有咁既情況,加以留意同檢查bb有冇任何野唔妥!!!


關於bb睡眠既書籍:
【每個孩子都能好好睡】唔同年紀小朋友, 唔同睡眠問題
(如: 唔肯瞓BB床/晚上醒N咁多次/唔瞓)O既解決方法 ; 如何介夜奶
仲有【10大教養金律】【快樂教養100問】【母嬰健康院小冊子】
照顧BB O既PART少D, 但令小朋友睡眠O既方法同每個孩子都能好好睡相似, 但無咁覆雜

關於訓練bb訓覺既網址:
可以睇返BK「扭眼訓喊到拆天-3個月bb」個Post,有好多好多不同類型既訓覺問題,pyjess都有一一解答
亦可以上yahoo seach *訓練寶寶睡覺* 有好多台灣既blogger分享訓練過程我當時睇左好多,
不過冇bookmark低,大家打呢個keyword可以搵到

至於呢個post,有好多媽媽都上黎分享左佢地訓練後成功既case
可以睇返: #10-11(介奶咀成功case), #12,#37,#62,#70(拖食奶時間),#84,#98, #102, #121, #126, #132, #148, #173, #251(企起身唔肯訓), #249
更達盡既訓練方法: #95
我自己Train時既報告: #157,#160,#166,#170,#177,#211,#219

如果已經成功訓練既你,快D上黎分享,留言,交流,令呢個Post唔好咁快沉底,令多d媽媽見到!!
有經驗既媽媽亦可一齊幫手解答下新手訓練媽媽既疑難雜症~

最後,十分感謝Pyjess百忙之中幫我修改呢個"訓練精讀"同埋用心解答媽媽們既問題