|
呢2日真係好辛苦,事原benson喺7號放學之後就開始有咳,食藥之後已經好咗,所以8號就比benson帶口罩返學,點知到放學時benson不單止咳番,重有少少流鼻水,唉~~唯有等下午同benson去睇醫生,點知到咗4點幾benson開始咳得愈來愈厲害,而且重發燒tim,同daddy商量後決定去急診室,去到急診室約6:00到,去到時量benson約37.5度,2個鐘後升到38.3度,等咗4個鐘裡面不停咁咳,唉~後悔唔同benson去私家睇.......4個鐘後終於到benson,一入去醫生只係問咗幾句,見benson咳唔停即刻要benson先去照肺,結果出黎左邊肺部有白痕,醫生初步懷疑係肺炎,所以要benson即刻入院,上到病房兒科醫生黎到,聽完肺之後就話要抽鼻水同血去check!嘩~有無咁嚴重呀????帶benson去抽血同鼻水時原來係唔準父母入去ka!喺出面聽到benson一路喊一路叫痛,係咁叫媽咪我唔曳啦!果刻真係........好心痛!!!!!
醫生話test結果會喺第2日下午出,所以要第2日先知咩事,所以果晚媽咪就要同benson喺醫院過咗一晚,daddy就負責返屋企幫benson攞D奶粉同少少用品黎醫院,到第2日下午醫生通知test結果出黎係呼吸道合胞體感染,只係好普通嘅傳染病(一般好多小朋友都有機會感染到,只要抵抗力好就好快好番),所以當日下午可以出院,但係最無辜係無lala比姑娘種咗粒豆豆喺手度。
