疫症漫延搞到人心惶惶，而當中受到嚴重影響嘅相信係一眾臨盤在即嘅媽媽們，之前都有睇過一啲資訊，由於安全起見，唔少公立醫院都取消丈夫陪產安排，而隨住疫情轉變，進一步嘅安全真係仲變得快過股巿！但無論點變，有啲嘢都係改變唔到，就係寶寶隨時都要出嚟啦！
面對咁嘅情況，有孕婦選擇轉到私家醫院進行分娩，但講真呀，喺私家生的話，在底都講緊係5位數字嘅事，一時三刻改變原有計劃，都唔係個個家庭負擔得起；喺根本無退路嘅環境下，有唔少孕婦都唯有硬住頭皮，一個人走入產房，自己迎接呢個人生嘅重要時刻。
不過其實媽媽們你哋絕對唔孤單，因為仲有一眾JM們陪你！提到公立醫院嘅最新安排，JM們都紛紛來到討論區上同大家分享：
「我前日喺屯門醫院生咗... 我想話俾大家聽，係完全無陪產，無得探，全程自己一個，你只可以叫姑娘透過電話同老公交待下個進度，出院老公可以喺走廊等，入唔到病房。」
「我早幾日喺廣華生咗，要帶住口罩生，原本喺產前房除開咗，想令呼吸好啲，落到產房比姑娘叫我帶番，唯有用力啲呼吸囉！」
「我係順產，第一胎，住左3日2夜，產後房都有帶口罩呀！」
「QE有笑氣，但係要帶住口罩聞。」
討論區熱話：公立生b一問
討論區熱話：公立生b一問
總結各位JM嘅親身經驗，目前喺公立醫院分娩有幾項安排；第一，暫時不設陪產安排，而家屬都唔可以進入病房，物資醫護人員轉交，所以有媽媽就提提大家，入院之前，最好都係帶齊寶寶嘅必需物品，例如：尿片、濕紙巾及出院衣服等等。
第二，有關仲有無提供笑氣呢個問題，按大家嘅資訊嚟睇，應該係按情況而定，無特別因為肺炎關係而全面唔提供，不過由於生產過程，大部份都要戴住口罩咁生，所以都有可能要戴住口罩吸，各位媽媽有需要嘅時候，最好都係問下醫護人員，說明有呢個需要。至於出院方面，雖然家屬唔可以入病房，只可以喺走廊等，但醫護人員都會提供協助，唔使擔心搞唔掂。
要一個人面對生產過程，其實係需要好大嘅勇氣，特別係孕婦們嘅情緒比較敏感，所以屋企人嘅支持同體諒真係好重要，記得多啲關心佢哋嘅身心需要喇！
