近日的新聞充斥著劈價的成交報導，一片淡風亦當然漫延至討論區，劈價的報導亦動輒5-10%咁劈，當多區都有連環的劈價成交的時候，不禁會令人思考，究竟呢個係一個係樓市下跌的開始，定係只係曇花一現的整固期呢？
要思考呢個問題，不得不將近日的經濟大環境的大前題列舉一下，當中肯定少不了中美的貿易戰，聯儲局以及香港加息的蔭霾，港匯不停走資的弱勢，人民幣的弱勢，空置稅的影響以及當然少不了最主打的港股進入左熊市由高位跌左五六千點等等，種種外在原因，都可以睇到唔單止樓市，就連股市同做實体經濟的企業都有多少影響，人的信心係呢段時間變弱，亦係無可厚非。
以上種種原因之中，短期最影響樓市的非股市同埋空置稅莫屬。先講股市，其實唔單止講由33000點的水平直插至26000的水平係好難玩，而且基本上呢個熊市行左接近9個月，由1月底的高峰之後，雖然偶有反彈，但整体黎講都係向下，呢個股市向下行超個9個月的情況下，尤其係呢一個月左右其實跌得急左好多，真係有人要輸錢輸到要賣樓套現都不足為奇，而如果你認為呢個說法係合邏輯的話，應該可以解釋到部份成交係要劈價黎成。
另一方面，空置稅的推行其實亦真係睇到發展商呢段時間係好急於出貨，新盤推勢一浪接一浪，幾乎個個星期都有新盤推，由Park Yoho 幾個盤，到LP6，然後又到朗屏新盤，睇到各個發展商都出盡法寶散貨，尤其以新地勁激進，十足十按揭先租後買的形式都要推盤，目的好明顯就係趕係空置稅之前有咁多散咁多。而係呢個散貨潮入面，有幾個因素其實都幾值得參考，一方面就係其實價錢上發展商並沒有太大的讓步，新地自知難散貨的Park Yoho系列都唔係特別話平，佢只係利用付款方法去應市。而LP6呢，可以睇到一样幾千票超額認購的購買力，而且首推亦係可以話接近1Q清的，購買力其實存在，只係一手發展商推盤，代理就盡將所有客源推去新盤，導至二手基本上只得番零星的睇樓客，所以二手弱勢係只因盡局一手而成的。
雖然樓市的弱勢似係大肆報導，不過市場的成交其實亦並非一面倒的，係一方面有人願意低價成交之際，實際上市場亦有破頂的成交存在，所以呢期的市況兩極化的情況下，很難判斷話樓市已如股市成跌市之勢，況且其實對比股市，樓市升左接近8個月，好多細價樓亦已先後挑戰6球的高牆，而有跟開隊長個blog的朋友都明白，6球之牆其實真係比4球要高好多，難破好多，之前隊長亦有提及市場去到6球之時就必須整固一下，所以與其理解樓市已成跌勢，隊長反而認為只係一段整固期，弱勢係事實，但跌勢就未可定案。
當然好自然你會繼續問，咁整固之後樓市又如何呢，整固又要幾耐呢？的確呢兩個問題係樓市去向的關鍵，而呢個又回會到文章開頭的因素，亦即包括中美貿易戰玩幾耐呢？股市仲要跌幾耐呢？加息又會加成點呢？發展商散貨潮又會持續幾耐呢？會唔會消耗殆盡所有的購買力呢？以上問題拖得越耐，就會對樓市造成更多的負面影響。未來呢段時間，可能都未必可以係三兩個月內撥開雲霧，一如今年的建議，大家留著彈藥，做好防風措拖，不買也不賣可能就是上策。
