香港地少人多再加上天價樓巿問題，要有個安樂窩真係唔容易，正因為咁衍生出各種家庭同住嘅問題，除咗永遠都解唔開嘅婆媳矛盾之外，有啲家庭因為重男輕女，屋企男丁成家立室之後，就要個家姐或者細妹搬出去，將自己住咗大半世嘅「家」拱手相讓，幸運嘅你，可能以為呢啲故事都只會係電視劇劇情，但事實上，令人反晒白眼嘅故事，偏偏日日都發生喺你左近！
好似有位JM最近就喺討論區分享佢個「恐怖叔仔」嘅故事，同時列出對方8宗罪：「真心好難頂！我老公同佢一向無兩句，老公開聲同佢講，佢當聽唔到，扮無嘢！」
1. 去小便唔關門，行過就見到個去緊廁所嘅美麗背影
2. 洗完對波鞋，放喺廚房洗手盤度/廚房枱面
3. 手洗完啲衫，勾喺廳中間，由佢滴到成地都係水，但要有陣酸叔味
4. 鐘意大大聲播歌
5. 入屋除鞋，成地都係鞋
6. 無家教，就算同佢打招呼佢都唔打招呼
7. 啲嘢四圍放，唔比人掂佢啲雜物，我哋都要搵位食飯，唯有夾硬食完快快收
8. 成日砰房門，真係半夜都醒曬
討論區熱話：救命，好想呻叔仔有幾恐怖
討論區熱話：救命，好想呻叔仔有幾恐怖
雖然以上嘅罪行分開嚟睇，好似都唔係啲咩「死罪」，但老老實實同一屋簷下真係超級影響生活同衛生環境，有網友就提議JM都係快啲搬，又認為始終嗰個都係叔仔「屋企」，而JM就道出另一個傷感嘅真相：「層樓係老公，我同老公未結婚佢已經住住先，佢哹大家關係係差，但同99仲差，可能大家接受唔到99，所以哥搬咗，見阿哥出咗去，就講要間房。」
Juicy媽聽到呢度，真係覺得「屎坑三姑，易請難送」，作為女士，原本幻想婚後嘅二人世界忽然多咗個「陌生男人」已經夠難頂，仲要係唔啱傾、唔尊重、唔乾淨，真係幾好脾氣都好難忍，但要個老公狠心趕個細佬出街，又確係唔容易，即使關係再差都係兩兄弟，「愚孝愚義」真係一街都係，望住呢個狀況，Juicy媽都只能送上四個字「愛莫能助」！
