肺炎疫情令人聞風喪膽，搶口罩、搶消毒用品、搶米、搶廁紙，總之就係係咩都搶一餐，你話啲人麻目、無理智？或者都係嘅，之但係喺一而再，再而三嘅口罩短缺情況，呢種等極都等唔到返貨嘅心情，實在觸動到太多人嘅神經！
喺全民搶罩嘅短短呢半個月入面，唔知你聽過幾多關於口罩嘅故事，當中總有啲令你激心？感動？甚至傷感？又或者呢啲事，正正係發生喺你身上？呢幾日就有JM忍不住要分享自己嘅經歷，分別講到朋友A平日好好先生咁款，點知扮無口罩之餘，仲暗暗炒賣都唔知合唔合規格嘅口罩；另一方面，朋友B為人粗魯又節儉，但就喺呢個情況，分毫不收將珍貴嘅口罩送到JM手上。
到底你身邊嘅同事、朋友係真君子定假小人？展現人性原來靠個口罩就搵到答案！
「時窮節乃現！」
「的確好多節檢嘅人，會雪中送炭！」
「錢真係事小，係睇清楚啲人嘅品格！」
討論區熱話：口罩睇清楚好多人
討論區熱話：朋友好窩心，送我一支酒精洗手液 & 抗疫湯包
討論區熱話：口罩睇清楚好多人
討論區熱話：朋友好窩心，送我一支酒精洗手液 & 抗疫湯包
成日都有話「一樣米養百樣人」，有人因為口罩撕開君子面具，有奶奶因為家嫂口罩存量高，即時轉晒面色，仲有人可以繼續發國難財，選擇食人血饅頭！不過好彩嘅係人性都仲有好嘅一面，除咗網上不時叫大家帶多個口罩出街，盡量幫助買唔到口罩嘅老人家同低收入人士，其實喺大家身邊都有好多充滿愛嘅故事！
「姑仔平時好小器，但原來送了20個給老公。」
「喺呢個時間裡看到家人好守望相助，感恩！」
其實鯊魚太真係好同意樓主所講，因為一個口罩睇清咗好多人，就連平日喺家庭群組唔多出聲嘅屋企人，都會問大家買唔買口罩，轉傳下重要資訊，或者呢啲時候正好畀個機會唔多識表達自己嘅家人分享愛；喺困境中，朋友嘅守望相助，屋企人嘅關心，所有嘅一舉一動都係充滿住溫暖，所以無論你睇到嘅係醜惡定係仁慈，點都算係件好事呀，係咪？
