戒片呢個環節相信係唔少父母都要經歷嘅一件事，成日聽人講夏天係戒片嘅黃金期，咁若然錯過咗咪要等多年？又如果第一年唔成功，咪即係要再等多年？但另一邊廂，又有人話如果未戒片，隨時影響幼稚園面試成績！？講到咁，咁到底應該幾多歲開始戒？1歲就戒？2歲戒趕唔趕得切咖？
「呀！媽我真係好亂！」曾經都閃出過一秒不知所措嘅我，最後採用嘅方法係...全佛系戒片法，原因或者係因為懶？但又覺得著住條片，其實小朋友都唔舒服得去邊，當佢準備好，然後就會同片片說再見！至於有無影響幼稚園面試成績，老老實實都唔諗得咁多，反正每間學校收生標準都唔同，如果為咗面試迫佢戒，到時未準備好瀨尿咪仲衰！
尊重孩子成長步伐
喺育兒階段中，有時候唔單止係戒片，好多時都難免有「比較」，同表兄弟姐妹比較、同朋友仔女比較、同小朋友同學比較，所以喺全佛系戒片法嘅過程中，都有唔少心理關口，旁人一句：「咁大個仲著片？」更加可能令人動搖，甚至否定自己嘅決定，而根據衞生署家庭健康服務「孩子何時才需要戒用尿片呢？」指，其實小朋友喺歲半至兩歲期間，如果有一啲特定跡象就可以開始進行戒片，但本著唔好令定咩對戒片產生壓力同抗拒，所以亦把心一橫，抓緊「佢唔願意，就唔好強迫佢」嘅宗旨，慢慢等待佢準備好嘅一刻。
身教與朋輩影響的重要性
成日都話每個小朋友都有自己嘅成長步伐，決定奉行全佛系法，最主要嘅原因係因為定咩係個比較自尊心強嘅小朋友，曾經都有試過夏天戒片法，但過程中，瀨尿明顯令佢覺得異常尷尬，亦會清晰表達要求要著返片，所以都將策略變成邊著邊戒，有時提下佢著咗片都可以除片去廁所，問下佢要唔要去廁所，以免「裸戒」傷害佢嘅小心靈，同時產生罪疚感。
另外，都有媽媽會疑惑應該點教仔仔企喺度小便，個人就覺得呢個重任都係交比爹哋最實際，一招「有樣學樣」可以話係贏過千言萬語；其實講咗咁耐，我就覺得喺整個戒片過程中，即使準備幾多都唔及返學嘅秒速成長，當小朋友見到同學仔都開始唔著片，老師會定時帶佢哋去廁所，戒片之路自然事半功倍！
所以若然你喺小朋友戒片過程中遇上瓶頸，甚至感到壓力，或者都可以試下放鬆少少，容許佢嘅「未準備」，陪佢走向脫片時刻！
