承接上篇晴朗在肚子裡的十個月(一)－首12周 (按此)，就等我繼續回帶，同大家分享懷孕過程。對於正準備懷孕或正在懷孕中嘅媽媽可以作多個參考呀！
**由於以下落嚟嘅記錄包括咗兩胎嘅經歷，我會將陀住朗朗 (哥哥，2010年出生，現時6歲7個月)嘅回憶highlight為藍色，而晴晴(妹妹，2012年出生，現時4歲10個月)嘅就用粉紅色標示。等大家睇得容易啲啦！**
懷孕第13周
去威爾斯進行唐氏綜合症檢查(OSCAR)，即係度下BB頸皮嘅厚度來估計BB患唐氏綜合症嘅機會率。估唔到朗朗又大個咗咁多，上次4.24cm，今次有7.46cm喇！等咗差不多兩個鐘，終於有結果。結果顯示朗朗患唐氏嘅機會很微，又過一關喇！
懷孕第15周
陀住晴晴第一次有人讓座畀我，第二胎真係會快啲現肚呀！咁快被人label咗係大肚婆！
懷孕第16周
又同晴晴有個約會喇！照超聲波嘅時候，醫生話八九成似係女。佢zoom近BB果度同我數有三劃，係女仔生殖器官嘅最初形。走嗰陣仲提我可以開始買定啲BB女衫添！睇嚟醫生都好有把握喎！終於可以有機會一嘗幫囡囡扮靚嘅超大欲望，唔駛再「恨」人哋「恨」到口水流。真係堅開心！
平時行百貨公司嬰兒部見到啲女仔衫真係好「恨」呀！而家有機會可以買喇！嗰種期待同興奮嘅感覺真係超正！
婚後一直打算將啲金器留番畀第時個女，估唔到真係可以成真喎！興奮嘅感覺維持咗好一段時間！
人地話結婚可以令妳成為一日嘅公主，陀BB可以令妳成為十個月嘅皇后。有咗BB特別感覺到身邊所有人嘅關心同愛護，感覺好幸福呀！
懷孕第17周
仲記得陀住朗朗果陣，第一次照超聲波照到BB性別，我不得不接受呢個事實，BB係有何B仔架！嗚……聽到嗰一刻的確係有啲失望。不過醫生話各樣都好好，朗朗有半磅，真係快高長大。其實健康先係最重要，仔定女都已經唔緊要喇！
第一次從網上見到呢幅相嘅時候，印象好深刻。上星期見醫生嗰陣，話我好快就會感覺到胎動。好興奮呀！之後成日都摸下個肚，感覺下朗朗幾時會踢我。但仲未有感應，好期待呢！
懷孕第20周
胎動喇！突然感覺個肚有嘢郁，好似有條金魚響裡面彈下彈下，彈咗我幾下咁。終於感覺到胎動喇！開心到笑咗出嚟！不過第一胎係會遲少少，陀晴晴果陣18周就已經胎動喇！
買咗部胎教機，聽聞用咗佢，BB出世後係會比較聰明、富想像力同埋情緒穩定啲。每次箍住佢響個肚，開機會播出不同節拍，朗朗就響我肚裡面好活躍咁踢，感覺都幾開心！不過有無用就見人見智。如果話朗朗聰明同富想像力都尚可以，但情緒穩定呢part好有保留。佢係一個極度難湊嘅BB，起身又喊、瞓瞓下醒咗又喊、抱住都可以喊。總之就係好難頂啦！其實感覺好似無咩用，而且再無咁多恆心每晚使用，所以陀晴晴嗰陣無用過喇！反而晴晴好湊好多，點解會咁嘅呢？唔用仲好。
懷孕第21周
網上bid咗啲BB音樂CD，一開始聽，朗朗就顯得好活躍，不停咁踢我。睇嚟好鍾意聽音樂咁播！
照超聲波好明顯見到晴晴隻手仔，好似同我哋say hello咁呀！哈哈！
連隻臭腳都照得好清楚，kawaii呢！
側面輪廓似爸爸多啲喎！
睇睇下仲要令轉面，好似怕睇蝕咗佢咁呀！
懷孕第22周
陀女中期口味又轉變到好鍾意食西餅、蛋糕，每日都要食過至安樂。陀女嘅口味就係我致肥嘅原因喇！
懷孕第23周
不過好彩返健康院嘅時候，姑娘話我keep個磅數keep得幾好。仲記得陀住朗朗果陣諗住大肚都必定肥架啦！就不停食，搞到有埋姙娠糖尿。第二胎就醒喇！唔好咁放縱，要繼續努力呀！
懷孕第24周
踏入BB腦部開始發展嘅階段，要食魚油丸喇！我響萬寧買，兩胎都有食，其實唔知有無效，但食咗感覺會良好啲。
懷孕第25周
今次照晴晴嘅時候，佢「mark」大個口仔，好似想講嘢咁呀！跟住仲識得同我哋笑添！睇到我哋好興奮。每次照超聲波之前都會超級期待架！
相關閱讀：
