仔仔個人除咗有啲感性，有時都好搞笑，呢兩三年佢都有好多經典語錄，喺呢度同大家分享下先！
1. 仔仔活潑好動，精力旺盛，都算街知巷聞兼應晒猴年，好多親戚朋友都話佢似馬騮，佢聽埋聽埋，自然入腦..... 年初一我係咁叫佢食呢樣食嗰樣，佢食到唔想食，就同我講... 「媽媽，馬騮仔唔係食呢啲㗎喎！」
2. 某日，同表姐食下午茶，仔仔講嘢好大聲，表姐話佢...
表：你細聲啲啦，呢度唔係公園呀，係餐廳呀！姨姨，表弟好嘈呀！
我：仔，媽媽講過唔可以喺公眾場所大聲講嘢，記唔記得呀？
仔：記得。(但繼續...)
表：(大聲)表弟，都話唔可以大聲講嘢咯！你聽唔聽到呀？！！
仔：你宜家夠大聲講嘢咯！
3. 某夜，仔仔拎住我同老公張結婚相話...
仔：嘩，媽咪，好靚呀… 呢度邊度嚟㗎？
我：(聽到佢話靚，即刻好開心)呢度係迪欣湖嚟㗎。
仔：你下次可唔可以帶我去呢度呀？
我：梗係可以啦！
仔：好嘢！但係... 張相入面嗰兩個人係邊個嚟㗎？
4.
仔：爸爸，你生唔生BB呀？
老公：吓，爸爸生唔到㗎喎，要叫媽媽生！
仔：媽媽，你快啲生個BB啦！
我：但我宜家冇喎...
仔：唉… 咁我自己生啦！(將隻公仔塞入自己件衫入面)
5.
我：仔仔，表姐一陣嚟我哋屋企玩呀！
仔：吓，唔制呀，佢會拎玩具！
我：你唔可以咁㗎喎，玩具要大家一齊玩，表姐知道會嚟我哋屋企佢好興奮，好緊張，你唔可以咁㗎！
仔：哦..... 叫佢唔使咁緊張，咁興奮，慢慢嚟，唔使急，我等埋佢！
6.
仔：你唔好成日問我點解啦，我未長大，我都唔知點解呀。
7. 有一段時間仔仔好鐘意睇”Forzen”，佢問...
仔：媽媽，點解安娜咁唔開心嘅？
我：因為佢爸爸媽媽死咗，所以佢就唔開心。
仔：哦...咁點解佢爸爸媽媽會死嘅？
我：因為有意外，個海好大浪，打沉咗佢爸爸媽媽坐緊隻船...
仔：哦... 咩係意外呀？
我：意外係..... 一啲你估計唔到嘅事，好突然嘅，冇得解釋嘅...
仔：咁你幾時有意外呀？
我：........... 唔知
8.
我：你啲垃圾自己見到垃圾桶時就掉，唔好順手就遞俾我，知唔知呀？
仔：...
我：仔仔，知唔知呀？
仔：...
我：仔仔，點解你又唔應媽咪㗎？
仔：我知喇！我頭先應咗你啦，不過細聲咋嘛。
我：咁你下次大聲啲應我嘛...
仔：我大聲嗰時你又話我冇禮貌㗎啦...
9. 某日，有個婆婆問仔仔...
婆：小朋友，你係男仔定女仔呀？
仔：(語氣好man而堅定)我係男人嚟㗎！
婆：你係男仔啫。
仔：唉，都係男啫！
10. 食飯前，問仔仔洗手未...
仔：哎呀，唔記得咗添，宜家去洗！
我：又唔記得，你有咩記得㗎...
仔：我記得你囉，記得你咪得囉 ~
暫時係咁多先，咁多位爸爸媽媽會唔會都有類似經典分享下呢？大家一齊笑下啦！
