好多時聽啲女人呻自己老公係自私精，事事計較令老婆受盡委屈。真係睇到都覺得該煨囉，因乜事嫁咗仲差過做女時架。咁梗係唔係話嫁咗一定做少奶奶，但至少唔好畀人撳住嚟恰囉。
其實被老公食住好可能唔係一朝一夕形成。講真，隻佬一開始就咁差嘅，妳都唔會同佢結婚喇。好多女人都覺自己珍惜段感情，就事事忍讓。男人同佢計較，佢忍；男人點佢做嘢，佢忍；到男人唔尊重自己，佢都仲忍緊。嘩，點搞呀，自己都唔愛自己，人哋梗係打蛇隨棍上啦！
當然，呢個世界仲有好多好男人、好老公嘅。但Juicy媽就覺得自私精有時係被縱出嚟，未娶老婆時被阿媽當王子養、結咗婚又做大帝嗰啲呢！
唔好以為默默耕耘，為個家付出男人就會珍惜。如果妳對自己印象都係：師奶一個、肌膚暗淡無光、打扮老土乏味，咁唔該妳花啲時間執正返自己。妳可能會問：唔通我為個家捱生捱死，都仲要打扮到隻雀咁？非也，畀隻佬睇都係其次啫。最緊要自己感覺良好，咁人哋先意識到妳嘅價值。
結論：各位姊妹無論婚前婚後、生咗小朋友未，都記得要留返幾分去愛自己，唔好完全失去自己魅力，正如冇人會真心愛嗰隻種田嘅牛嘅啫！
如果問心自己已經做得足夠好，感情路不順純粹因遇到賤人。咁唔使怕離開喎，因為好嘅係後面等緊妳！
