你好老師，我係最近follow你嘅讀者，想請教下你有關投資既問題。本人呢十年一直係外國，但有買港股同美股。
本人收入同財產如下：
30歲，工作收入：20000港幣/月左右
副業：3400 港幣/月左右
我在當地還有一層唔需要供嘅樓收租樓：租金收入，扣曬所以開支大約有4500港幣/月左右（樓可以賣，而家大約值190-200萬港幣）
每月必要開支：供自住樓連水電上網，大約21000/月左右
老婆現時收入：17000/月左右，但老婆仲有三個月左右就生，所以之後會無咩收入或者轉做全職家庭主婦。
現金約35萬，最近幾個月先開始有做小小投資，所以唔係好多錢入咗股票，而且比較雜，大約如下：
美股：
Tesla
Berkshire hathaway
Baidu
Apple
Microsoft
港股：
9988
700
00388
0968
更多文章：【理財個案2023】欠債百萬怎處理？
目標：
1. 如你所見，如果老婆唔做野既話，基本上會頂得好辛苦，因此想睇下有咩投資組合可以減輕小小之後既經濟壓力。
2. 希望投資平穩有儲錢功能既股票，主要係抗通漲又可以跑贏小小就好（我個平台買唔到2800， 唔知咩原因）。
3. 有睇開比亞迪，其實買唔買得過，有點波動。
4. 有睇過d高息股 例如中電, 領展, 中銀 同 中移動. 當中得中移動個股價有所回落。呢幾間值唔值得月供長渣？
5. 700、9988係想當潛力股咁買，但因為我較高位買，現價仍有一段距離，而家呢個價位應該再入手嗎？
6. 間樓係可以賣，因為而家計落回報率唔夠3%，好似好雞肋咁，如果真係賣左有190-200萬現金，你會建議點樣去投資好？
7. 其實美股同港股既玩法會唔會有好大差別？ 我而家投資左一陣就覺得美股上落差比港股大，但除此之外，我唔太清楚有咩分別。
可能一次過問得太多問題，唔好意思。唔該曬老師。
個案重點：
‧30歲，已婚
‧夫婦收入合共約港幣$40000
‧外國生活，有自住物業，及一層收租樓
‧太太有機會之後不工作
重點目標：
‧太太無收入後的理財方案
‧是否賣出收租樓
‧港股美股投資策略
龔成老師分析：
1） 你30歲，我一般建議先做好增值部分，之後到累積到有一定財富，才慢慢換成提供現金流的收息資產，因為在整個人生財富累積的過程，運用「先增值，後現金流」，是較理想的方法。
但由於你預計將來一段長時間，家庭開支壓力會唔細，希望透過投資去加大每月現金流，作為幫補。
因此我建議你新資金，集中投資一些「平穏增長股」，佢地增長力唔係最高，但都會有平穏增長，而且會有一定派息，可以幫補你生活上支出。你唔好預好多，大約3-4%股息率左右，但相信這個方法，較可以平衡你增值需要，和家庭支出壓力。
2） 上述平穏增長股已可以做到你要效果，你可以投資一些指數基金，例如追蹤美股的Vanguard S&P 500 ETF（VOO），就是追蹤美股的ETF，追蹤指數是標普500指數，當中都是全球有實力的公司，有長線投資價值。
由於美股波動，不建議一次過大手買入，最好的方法分注投資，長線持有，這是一個最好的投資策略。
另外一面，你可以考慮投資一些中國相關的基金，令你的組合可以同時有美國及中國類的股票，我相信中國、美國，都是全球兩個長遠最大經濟體，同時投資會有不差的長期回報。你應該投資一些風險度中等，有平穩增長力的基金，又或在股票上找相關的中國股票指數基金。
另外，如果你太太之後無收入，而你們面對一定的生活壓力，而你又很想用投資配置去處理，就可以考慮買一些收息股，這些收息股增長力較弱，雖然不適合你們的年齡情況，但如果你目的是現金流，可以考慮，例如投資$200萬，假設股息率為7%，一年收息$140000，每月$12000，都算是一個不差的數，但就要賣出你的物業，這點稍後再分析。
例如買入香港電訊（6823）、工行（1398）、恆生（0011）、置富（0778）、陽光（0435）、深高速（0548）、收息基金（3110）等收息股。
3） 比亞迪（1211）係潛力股，但風險都高，考慮到你現時家庭收入減少，資金要運用得較小心，比起投資這股，反而建議你投資電動車ETF（不是比亞迪有問題，只是佢風險略高，投資ETF更適合你）。
反而可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。
持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。最好以分注的模式進行。
4） 這幾隻都可以，但中電（0002）和中移動（0941）係純收息股，佢派息普遍會比平穏增長股多，但增長力好弱，係佢缺點。
而領展（0823）和中銀（2388），就係有上面講的平穏增長股。
這4隻你都可以投資，現價都合理，可以分注。你要自己從「現金流」和「增值」2者間，作出一個平衡。
5） 首先你要明白一個概念，我地持有一隻股票與否，關鍵位是企業質素、前景，不要被買入價影響。不要因為想拉低平均價就加注，最重要睇質素，以及這股佔你組合比例會否過多。
阿里（9988）騰訊（0700）都有質素，但要上翻高位不是短期事。你預這2隻股票較波動，如果你想小心運用手上財富，以及你風險承受能力不算高，未必適合再加注，因為不建議你持有太多。
6） 你物業在海外，你要比較你們當區的樓市情況，比較租金回報率是否過低，如果太低，而你分析到該物業長遠的發展，如果質素較一般，並無發展，就可考慮出售，轉一些收息資產更好（即是上述提及的收息股）。
但如果當區租金回報都接近，加上物業有質素，配套等仍有發展，就可持有，因為物業本身是一種資產，同優質股一樣，都具有增值能力。而且佢能提供穏定現金流，對減輕你生活開支壓力，都有幫助，不過租金回報率就較低。
另外要留意，我地財富增值組合，除了講質素外，都講平衡性，唔可以偏晒係股票類，若你物業係有質素，其實持有係無問題。
若你最終覺得，都係沽出物業較好。這筆資金，你都可以用來投資「平穏增長股」，如果你好想追求現金流，就可按上述建議投資收息股（當然，你可以平衡配置）。
留意，投資股票最好用分注模式進行，同時留意股票好多時比物業更為波動。
另外，由於你就快有小朋友出世，預期有一定額外洗費，加上你太太短期內不能工作，你要先預留半年左右開支，作為應急之用，才開始投資計劃，會較為穏當。
7） 其實投資港股定美股，重點都係睇企業質素。若有質素，我地再從佢平貴，組合平衡性、是否適合自己投資策略等，去定買入計劃，咁就可以了。我相信中國、美國都有當中的優質企業，也都有各自的風險，因此，長遠以平衡配置模式進行，是較好的做法。
