當申請含有人壽成份，或醫療保險時，一般都需要回答健康問題。若果身體好好，當然核保上唔會有大問題啦。但若果曾經患上健康問題中提及過嘅病時，就有機會影響核保結果。有位客人曾經患上一啲對核保結果不利嘅病，所以傾向不作申報，又認為「我去私家醫院睇醫生，無我准許保險公司唔會拎到我嘅紀錄」你又認唔認同呢？
首先，簡單去諗，如果真係無影響，又點會有呢個申報機制？如果每個人都用呢個方法，豈不是每間保險公司好易claim爆，關門大吉！？事實上投保時，應本著「最高誠信」，客人投保時應該誠實回答返申請表上健康問題，同埋提供返已知嘅健康情況及報告予保險公司核保。某類型產品，如儲蓄危疾保險，保險公司有機會提供埋驗身服務。
申請時，保險公司會根據客人提供嘅資料去核保，就算有所隱瞞亦難以證明。但當客人申請理賠時，保險公司就有機會有所行動。其實最有機會要拎病歷紀錄就係要進行理賠嘅時候，所以claim錢通常都要填claim form。裏面有一項「聲明及授權書」，簽咗名就代表你授權保險公司進行理賠時去向有關機構索取有關文件或者醫療紀錄。係公立機構所接受嘅診治資料當然好容易得到，但就算你只去私人醫生睇病都好，都有好大機會拎到你病歷。
一定要記住，大家投保時要本著「最高誠信」原則，誠實回答及披露現有狀況，日後claim錢時都唔會理虧或者影響投保其他保險啦！
如果想知道更多資訊，歡迎瀏覽「理財公主病」Facebook專頁！
