誠蒙Baby Kingdom錯愛，邀請青冰在家庭理財版面撰文，非常榮幸。青冰起初也頗有猶豫，因為身兼三份工作，在公司是一名盡責員工，在家裡是一個勤勞的爸爸，及一周發三篇稿的專欄作者，實在忙碌，再加上拜讀過理財版面的其他作者，青冰的風格似乎較為另類，怕格格不入，幸而編輯小姐給予青冰很大的自由度，所以真係無理由再推塘，日後會較專注金融投資那一part，因屬青冰專長，至於理財嘛，還是請教其他賢達更為合適。
正所謂「你不理財，財不理你」，靠血汗腦汁辛苦得來的工資，真係要好好籌劃，可惜我地生於接近零息的年代，除咗買樓，就是股票，但所費的心力，股票似乎遠比投資物業多，用事後mode睇，買樓長升，但你睇個恆指，十年前31958點，我地年頭都係升至33484點，升幅不足5%，真係迷失十年啊。不過咁樣比較就有點取巧的，恆指公司其實有一個總股息累計指數，將咁多年來的股息點數加返入恆指，假設2007年你最高位入市，那時指數係59958點，而今年最高位係89475點，換言之11年來都有49%，不過複利率都係每年3.69%回報，唔算太過突出。
成日聽人講股票諗唔到買乜，就買盈富基金(2800)啦，跟大市嘛，股票旺佢就自然上，原來假設你在2007年最高位買入盈富基金，每次收到股息後再買返盈富，當你在今年1月底最高位沽出，你都係只有43.93%回報，年回報3.61%，而這個數字會同上面股息累計指數相近，因為都係講緊同一樣嘢，只係操作手法略有不同。
照咁睇股票投資真係唔吸引喎，咪住，其實又點解要逼自己買盈富呢？盈富係跟恆生指數買賣，換言之你必須理解恆指有咩特性，有咩成份股。恆指現時有50隻成份股，佔最大比重的是金融股，有11隻，佔比48%，地產股同樣是11隻，佔比11%；成份股主要係揀公司的代表性，以市值及成交量作主要入選準則。青冰真係未見過環球市場裡有主要指數，有行業的佔比達48%，而金融股中有很多迷失十年的內銀內險，直接拖累了恆指多年的表現；而11隻地產股加埋只係多騰訊(0700)的比重2個百分點，咁其實是否有需要維持11隻地產股作成份股呢？近年加入的新貴，大部分都係染藍後不久就見頂，這或多或少係選股準則有問題，那些新貴業務最勁，盈利增速最快之時，大多只係兩三百億市值，好喇當佢地廣泛被市場吹捧，個個基金都揸住之時，市值自然過千億，成交額自然合乎恆指的標準，可惜很多時都遇上是行業周期的尾聲了。
恆指就似一間百年老店，老員工全部Old Seafood，唔會踢佢走，但佢地的表現又長期不濟，由於請人準則有bias，所以新員工，返工前過於催谷，入職後都交唔出面試時的水準，咁試問這間公司又怎會朝氣勃勃呢。
青冰早前曾在其他專欄撰文，話長線收息之選，中電(0002)及煤氣(0003)遠勝盈富基金，就以11年前的大頂位買入計，假設每次收息都再投入買股，盈富現時總回報係11.96%，年回報1.03%，中電總回報係154%，年回報8.85%，煤氣總回報係132%，年回報7.99%。唔好忘記這11年以來，牛熊交替已經幾次，這些數據絕對經得起風浪，所以日後如果有人叫你長線收息買盈富，原因應該有二，是門外漢，或是這個人好想跣你。
Fb個人專頁： http://www.fb.com/chingbing888
