今日女主人有事煩，佢心情唔靚我好擔心，我倆各自小生意盡量都不互相干涉，所以我都無問太多。她今次不會選用折衷方案，寧願關門也不苟且！做小生意好處，隨心所慾，不用為五斗米折腰。
小弟生意仔，進入倒數階段，再過半年我就會正式退休了！
小生意的壞處？就係今日唔知聽日事，無得月月出糧，心態絕對不同。可能因為懶，每月都不會計收入和支出，就女主人而言，一時可以好好，一時又可以好差。今次事故主要為技術性問題，一係有得做，一係無得做。（當然，一定解決到，只是完美與否吧）
若我現在生意仔出了問題，我應該不會理會，等它慢慢死去吧！
所以，係九年前，我倆已經不喜歡太死板的路，尤其理財方面，希望維持高流動性。又因我倆生意唔大，但平均搵錢又多過一般打工仔，雖則不是三更窮五更富，不過流動性同埋隨時可以轉身，比一切重要。再者，小弟行兼業恐怕有年齡限制，盡快搵夠走人比較理想。
買唔買樓自住好，其實因應個人情況多於一切別人意見，投資則是另一故事！我的情況又同大部份人不同，資產雖然唔多，不過總算做到所謂租務自由。何謂租務自由？係自己個區想租邊度都ＯＫ，搬屋搵人攪吧！搬屋其實唔算太麻煩，當做大掃除而已，未搬過屋／不懂有效搬屋的人才會有這種感覺吧？加租？既然錢可以解決，為何一定要搬？？？
大量未試過在租金上升期租樓的人，他們或許只看到壞處！動之以錢，什麼幫人供樓云云；此路不通的話，動之以情，搬屋很煩。
對我來說，租金持續上升，同去電腦場買條ＲＡＭ一樣，這個時期若價格上升，付錢便解決。
若然有一日生意失敗投資失敗，或股息不足以交租食飯，可以選擇搬到小一點的單位，再由日常開支著手。我現在的情況，未必人人相同，於我而言，進可攻退可守。一邊收股息債息等樓跌又可以，即使樓價一路升到上太空，我也不會太ＳＵＦＦＥＲ（總有一半人以上比我更糟吧？），再者我又隨時可以拔營離開香港⋯⋯
ＷＨＡＴＳＡＰＰ ＧＲＯＵＰ中有人問及是否安全感不足？非也，只是大家價值不同玩法不同，以及生命所追求的不一樣吧。
此篇靈感來自９０後ＢＬＯＧＧＥＲ ＴＡＭＩＮＶ，以及小弟ＷＨＡＴＳＡＰＰ ＧＲＯＵＰ中一些對話，年輕的不買，以及有點資產的不買，總有個原因。
你在想投資，我們在想生活，完全是不同世界呢。
