多年以來對美聯(1200)的認識不深，直至上月有戰友話佢哋老細約吃飯，叫大家支持吓個要約，之後走來問青冰係乜事，跟住先開始研究，那個要約青冰在另一專欄已有分析，有興趣的戰友可在專頁重溫，今次嘗試用一個長鏡頭，睇睇近年間公司發生過乜事。
回帶之前，略講要約的要點及上周五公佈的初步結果，大股東提出以2元作部分要約，共會買入5744萬股，先決條件有二，一是至少獲得5744萬股接納，二是獲得逾50%獨立股東授權批准此要約，因為根據收購合拼守則，如提出要約的大股東持30%股權以下，而在要約後股權會升越30%，就要獲得獨立股東批准先OK。上周五是首個deadline日期，共有約2億股接納要約，並有2.31億股授權批准此要約，即44.15%獨立股東，由於未過半數，要約人將截至日期延長至2月22日，作出最後努力。
美聯曾在2014年被基金APEX狙擊，此基金的營運總監是前美聯僱員，聲稱組基金買入股份係唔想美聯衰落去，不斷公開質疑美聯的企業管治，更去股東會踩場，話如果大股東肯5、6蚊收返啲股份，才會罷休。APEX一直持股都在約10%，但老闆黃建業的持股量不高，被狙擊時只係持有18%。在2014年4月，美聯有大手上板的成交，涉6615萬股，即9.21%股份，市場開頭以為係APEX收手離場，最後睇權益申報，原來係另一基金永明金融以5蚊悉售所有股份，所以其實黃老闆並唔係唔肯5蚊買貨，只係唔會向狙擊者買而已，5蚊係一個咩概念呢，就是較當時市價高三成囉。
比較有趣的是永明金融在4月悉售，但在10月又再次舉牌，持股增至5%以上，由2014年的3.8開始買，到去年1月以2.11元最後一次增持，已經揸住12%股份，係舉足輕重的股東，青冰亦深信他們是友好人士。至於APEX在當年罷免美聯董事失敗後，都轉趨低調，2018年初終於部署撤軍，在2.15至2.36大手減持4500萬股，股權減至5%以下，戰友有睇開隻股，都知近年成交好低，在市場沽係冇可能，所以APEX都是搵另一大戶接手，按權益披露，APEX是沽畀叫Surplus Gain的公司，是一位名叫劉宏智的投資者，該投資者之前比較活躍於創業板股份。
交代了當年的事，就睇返12月出要約通告時各股東的持股，大股東持27%，永明持12%，Surplus Gain持10.54%，將所有獨立股東加起來，是73%股權，換言之要約要成功，係要36.5%股東批准先得，即2.62億股。上月美聯發通告，話Surplus Gain已經接納要約及批准，換言之佢2蚊沽畀大股東，係要蝕錢的，再諗深一層，好有可能大股東就是要挾走你，先出個要約畀半條生路你行，話晒你都是接APEX的股，已經當咗你係敵人。
睇返美聯的股價，近5年買入的股東全部都要輸錢，所以大股東以2蚊收你哋的股，較當時市價高兩成幾，應該好多人會接納，但留意返今次只係收5744萬股，假設最後真係有2.62億股批准及接納，每名股東最後只能沽出約兩成的股，聊勝於無而已，現時有44%獨立股東支持，要再搵多6%並唔容易，如果有散戶蟹住三萬股，會唔會為咗可以兩蚊沽到六千股，而不嫌其煩打畀經紀搞手續呢？所以有理由相信，支持的都是基金及友好人士。
樓市在過去5年升完又升，雖然二手樓成交唔多，但作為物業代理股可以跌足5年，股權又散，連增持都要搞啲古靈精怪嘢，總體來說係冇太大投資價值可言，至於投機價值，就要睇要約最後是否成功啦。
