有時見到小朋友鬧爸爸媽媽，覺得真係好冇禮貌！自己父母都唔尊重，係好可悲嘅一件事嚟啊！有網民就喺網上討論區傷心地分享：小朋友上到高小之後，情緒暴躁咗好多。遇到唔如意嘅事態度就會好差，當媽媽仇人咁聲大夾惡。佢仲話，好似變咗小朋友係阿媽，自己係小朋友畀佢鬧！呢啲時候，做媽媽嘅真係會好傷心啊！
唔少網民都話，小朋友大大吓好易受朋輩影響。嗰時就最難搞，因為朋友講一句有用過父母講一百句，仲有好易模仿朋友嘅行為同態度。不過做父母唯有見招拆招，一於睇吓網民集思廣益得出咩意見喇！
互相尊重
去到十歲呢啲年紀，佢哋更加有自己諗法，繼續用對小朋友嘅管教方法可能唔work架啦。可以嘗試當佢係一個大人咁對待，話畀佢知對媽媽使用惡劣嘅語氣係唔恰當。如果媽媽當其時為佢做緊嘢，例如準備緊飯菜，可以停止動作，表示唔會再幫唔尊重自己嘅人。父母同小朋友有平靜對話嘅機會，講吓大家嘅不滿，可能不失係解決困局嘅辦法。
幽默化解
有啲媽媽主張唔去硬碰硬，如果小朋友語氣不善，就會講笑咁講「你係咪食咗支大聲公落肚呀？」咁仔仔就會知自己咩事。咁樣唔會令小朋友有畀家長斥責嘅感覺，但係又明白自己做咗唔恰當嘅行為。
管教有責
可能小朋友到反叛期就係唔想服從家長，咁父母最好就有啲殺手鐧。例如有媽媽話因為自己一手掌控手機、平板同電腦上網。就算小朋友態度唔好，都會比較容易合作。同埋可以訂立規定，比如事先協商好食飯時間，如果有事耽誤可以同父母溝通，但如果態度不善，父母食完就會收拾飯桌。小朋友應該自動自覺食飯，或者面對自然後果（冇飯食）。
講係咁講，小朋友性格唔同，上述方法唔一定奏效。或者父母都可以留意自己對住小朋友會唔會有時語氣過激。有時小朋友都係一面反射家長行為同情緒嘅鏡嚟架！
親子間有衝突，家長一定會感到難受，不過唔使太灰心，育兒路上每個階段都有新嘅難題，關關難過關關過！
