【幾個移民媽】海量移民資訊湧入腦 移民媽：「怕做錯決定！」

「媽咪，我好鍾意香港，唔想離開我哋個屋企。」朱古力妹臨瞓前的告白。

朱古力妹，媽咪又何嘗唔係呢。其實我都唔捨得離開呢個地方，不過世界很大，我哋留喺喥，永遠唔知外面係點。我哋成日鼓勵小朋友，安全情況下乜都試下，希望佢哋有冒險精神。留喺香港，佢哋會日日返學乖乖坐定定，返屋企溫黙書測驗，學下琴、學下畫畫，考試升中，再考試。我經歷過，但係咪真係想佢哋咁長大？

更多文章： 嚮往澳洲大自然 港媽為仔女儲錢移民

我哋同朱古力仔同朱古力妹做心理準備，哥哥起初都有少少抗拒，但當佢知道去外國讀書少好多功課、黙書、測驗時，就開心晒。

決定要走之後，面對海量移民資訊，fb group 都入咗好幾個，睇呢個group同嗰個group 講嘅嘢又唔同，呢個KOL同嗰個YouTuber講嘅又唔一樣，真係頭都痛。淨係決定去邊個國家、邊個城巿，我哋都已經頭都痛。

更多文章：飛英生活體驗日記 第二章：沒有「容易」的路

每日大量資訊，真係唔知點篩選，唯有睇得幾多得幾多，仲save咗好多未睇呀! 不過到時又可能已經唔update。同幾個一樣準備走嘅families 開咗chat group, 大家盡量分享下目標地方嘅資訊、進度。其實有同路人真係緊要啊，大家互相提醒，就算過到去都可以互相幫助，唔開心都有人傾，小朋友差唔多大，又有buddies，就算喺學校俾人蝦，都有個朋友傾訴下嘛。

有好多嘢仲要決定，有好多嘢要考慮，其實壓力都幾大，怕行錯一步會影響小朋友嘅將來，但有時又計唔到咁多，唯有隨遇而安啦。