有一種凍，叫你阿媽覺得你凍，平時我都好驚小朋友凍親，但呢幾個星期真係熱到我都覺得小朋友熱！星期一至五都話盡量唔出街，係屋企開行冷氣，但小朋友唔出去玩，真係怕影響佢成長，望住出面個天氣，你唔做足準備都唔好行出門口！
今次我就要分享炎炎夏日消暑好方法！去文！
1）芭蕉扇
今時今日香港有邊個無返一兩把芭蕉扇傍身？市面上出過好多扇，正版既應該係「共田」牌，我用嘅就係F95B，市面上報紙檔都有得賣，大約40蚊左近，出街都夠用到返屋企，三段風速，最強風速都比得上家用座地風扇。
問題係，有風好過無風，但依家天氣有風都變熱風，只可以話好過無，又或者頂一頂，但勝在差完電又一條好漢，所以點都要帶兩把，一把比阿仔，一把比自己！
價錢：5／5
耐用：4／5
清涼度：3／5
2）熱中對策
呢支野，最近都幾常用，聲稱可以－30度，一噴出嚟的確幾凍，但有冇減30度好多實試都話無，但以冰涼感講，呢隻算係最好，你真係無即時感到有涼快感，但佢個指引係唔好直接噴係皮膚上面，話怕太凍會凍傷皮膚，最好就隔衫用。
壞處係，用得太快，太大支唔方便，同埋噴時有白泡，有少少黏感。
係賣日本貨既地方有售，大型日本百貨公司都有機會有，售價偏貴，接近100元，去開日本買會平少少，大約900Yen，但一定要寄倉。
價錢：2／5
耐用：2／5
清涼度：4／5
3）冰巾
冰巾聲稱濕水後可以即時降低溫度，放係頸上或抹汗都感到涼快，市面上有好多款式，由韓國大牌成百幾二百蚊一條，到你淘寶十零廿蚊條都有。原理係點我都唔知點解釋，但作為用家，佢濕水後一拉，真係感覺比水喉水溫度低咗。
產品計用嚟抹汗的確唔錯，其他冰涼產品都充當唔到呢個用處，但麻煩位係你要搵水抹，同埋抹完汗之後要洗乾淨，唔係條巾會發臭，我個仔有次抹完汗無洗就放落背囊，夜晚發現個陣你想像唔到我個樣係點。
價錢：4／5
耐用：4／5
清涼度：2／5
4）花の滴醒神筆
咁熱天氣，坐車一定頭暈身慶，小朋友亦好易中暑，如果你戶外活動真係熱親的話，就可以用花の滴醒神筆，佢由天然薄荷提煉，配合蘋果花、櫻花、綠茶三款味道，見暈可以塗於太陽穴、人中、頸位，會有迅速冰涼醒神效果。
戶外活動時仲可以驅蚊、止痕，集多用途於一身，成份仲不含樟腦、避蚊胺等等有害物質，小朋友都可以安心使用，當你搭車見暈都可以止暈，同小朋友出街放係袋入面可以以防萬一。
7-11有售，只需78蚊，仲可以貨架試用添。
5）抹汗濕紙巾
好喇，賣完廣告，講返正題！乜話？你唔知賣咗？咁我叻！乜話？你一睇就知？你叻囉！不過繼續講返正經野，包你有用！
濕紙巾好多，以前得Tempo 滴露，但近年興起咗專For抹汗用抹臉用嘅濕紙巾，賣點係乜？反過嚟睇，即係普通濕紙巾唔可以抹汗同抹臉囉。
的確濕紙巾好多都含酒精，你敢唔敢用酒精抹面？咁平時用咁多護膚做乜？
推薦兩款，一款就係Gatsby冰涼濕紙巾，涼意超勁，但亦有少少「嗱」，作為抹身紙巾講就好好用，但唔可以抹面，味道亦有少少攻鼻。
另一款係花王嘅香體紙巾，日本製，有種好似爽身粉嘅香味，仲可以止汗味，涼意無Gatsby咁勁，但無咁傷皮膚。
價錢：3／5
耐用：2／5
清涼度：3／5
6）噴霧水樽
同小朋友出街點可以無水樽！？但水樽都有分好多種，想解渴之餘消暑？一定要用噴霧水樽，除咗正常飲水位之外，佢仲可以將水變成霧狀噴出，比起你用水抹面有另一種更清爽嘅體會。
消暑提示，試下用冰水放係樽再噴，比起其他產品更有清爽感覺，仲可以係餐廳或便利店refill水源，一物二用，比起用膠水樽環保n倍，如果你仲係用緊舊式水樽，好心你就換咗佢啦！
市面上賣嘅通常都一百元左右，比起其他水樽，呢種水樽係貴少少，但真係值！
價錢：3／5
耐用：5／5
清涼度：4／5（冰水5／5）
