論盡家傭 今日: 6|主題: 133855

2018年,踏入27歲嘅我，有兩個小朋友,屋企有兩個工人,人生裏面亦經歷過幾次勞工處、差佬同法庭紛爭係關於雇傭糾紛。

喺呢度我好想同大家分享我嘅經歷，亦都好想將呢啲經歷寫成-「請姐姐攻略」。

簡單講一句，如果屋企有小朋友，請姐姐就好似搵男朋友，一個字 —— 夾。男人都冇十全十美，何況工人。

背景交代：屋企經營印尼/菲律賓生意。

人生第一次請姐姐，係生第一個小朋友ge時候。姐姐係呀媽喺雇傭中心請，全新未黎香港印尼人。結果係，知識水平 — 佢放屋企d 2A 電池係陽光下叉電😨由於佢心地善良，我努力教導，大家都相處左半年，最終我老公頂唔順佢太蠢，某日就即時解雇左佢。

結果：佢搵咗不知名工會（佢地有好多呢啲會),警察,出現喺雇傭中心。收場係工會嘅人自稱律師自稱兄弟姊妹，要求索償嘅錢係多於我應賠嘅錢，再加上工會人好惡叫我阿媽收聲（因為語言不通），最終冇共識，法庭見。

幾個月後，法庭上見到工會人唔見咗（其間得知，原來工會人幫佢fight到幾多，係會由當中拆返作為傭金），法庭見到嘅係社工（終於有正常人幫佢),最後佢得到理賠機票薪金件事完咗。

總括嚟講,損失係姐姐，佢損失咗呢幾個月入邊嘅生活費，人工，仲有佢嘅住宿費，為嘅就係排期上court。

待續到第二個姐姐，自己去agent 搵，interview 過程快靚正，事先睇曬佢背景資料,分別三個唔同顧主，每次都係兩年完約，全部經驗係take care new born 。interview 過程主要係agent 講嘢,簡單交代雙方背景及需求。

呢兩年過得好快，我記得細仔出世佢由頭到尾無微不至照顧，24小時服侍細細。當中發現佢為人做事沒有條理，唔識安排時間，但照顧new born真係冇得頂，我唔可以冇咗佢去照顧細仔，但佢做家務成效又唔理想，我為咗佢,決定再請多個姐姐幫佢幫輕工作。

由於之前一年俾兩次agent錢好甘，我終於決定用自己network 搵工人，慳返一萬蚊。當其時有超過10個finish contract 見工，當中有你揀人，人揀你。最終係馬尼拉旅行約見一個，心諗，係你啦！

馬尼拉約見姐姐—呢位做咗一年,到呢刻為止,我對佢嘅工作表現冇得彈，成個私人秘書咁，自行安排晒所有野，正！

而家照顧細仔姐姐決定唔再續約,雖然佢係照顧new born尤物，但始終BB會長大（細仔歲半啦），佢係連晾衫都擔遮個d人，屋企工作開始唔適合佢做。

到啱啱新請左位完約姐姐，去成為馬尼拉姐姐新拍檔。新姐姐當然係自己搵，慳返一萬蚊，成個文件過程只係收七百！

今次都好有信心呢個姐姐係夾我嘅。