2013年媽媽會 今日: 0|主題: 26100

第一日

推左入去產後房的大房，已經心知不妙啦，一定冇覺好瞓！

當時我沒有著衫，上身只係蓋住紫色手術袍上面再蓋張被，下身墊住床墊同大肚婆M巾，沒有穿褲，只係插左尿喉，好彩插住尿喉一啲都唔痛，右手邊吊左用來幫助子宮收縮的鹽水，總共要吊兩包，BB暫時比姑娘保管住。冇几耐，原來產前房的鄰居做完手術又再次做多一次我鄰居，真係好幸運~有個伴~

到左探訪時間，老公同奶奶只可以喺育嬰室見BB，由於有一架BB車仔冇貼名，佢地又唔係好認得BB，所以夜啲再黎睇BB~老公同奶奶問BB几點出世同几多磅，我先醒起，頭先喺手術室個醫護人員冇同我講，於是奶奶去問姑娘，姑娘唔肯直接同佢講，姑娘走到我床邊，話手術室肯定有講，可能只係我唔記得。我心諗我係半身麻醉啫，但我係清醒，佢有少少嫌麻煩咁話比我聽，我個BB 9:20AM出世同有2.82KG。之後，我問翻鄰居，原來佢都唔知，即係唔係我老人痴呆啦！

做完手術，醫生話可以飲少少水，若果几小時內冇嘔吐情況，撞正派餐的話就可以先用飲管飲粥水，若果撞唔正派餐，就比牛奶我飲。

好多人話產後房的姐姐好惡！唔難怪佢地，因為好多做完手術的媽媽，事無大小都會按身邊的鈴鐘叫姐姐，例如係起唔倒身斟水飲(講真個水壺超重，瞓喺度真係拿不起個水壺斟水飲架)。姐姐只會知道鈴鐘由邊間房發出，但唔會知道由邊張床位發出，所以佢地每次都會大叫"邊張床按鐘"，真係好煩、好落後囉，仲有我好想休息囉。

姐姐一確認我係餵人奶，佢地就每隔兩小時，將BB抱比我餵，新手媽媽的我，當然未試過餵啦！入院前，我都睇左好多教餵母乳的書，本來都好有信心，但冇一本書教我點樣去整醒一個瞓得好霖的BB食人奶，好多新手媽媽都唔忍心叫醒BB，於是唯有按鈴鐘向姐姐求救，姐姐通常見倒呢個情況就會大罵話"BB可以一瞓就瞓六七個鐘，你要自己叫醒佢架！"然後姐姐會好粗魯咁卒BB兩隻手仔、卒BB面仔、卒BB膊頭、大力咁掃風、除尿片、除衫仔等等，BB通常喺姐姐一翻"折磨"下會醒一陣間，但當你將你的奶奶千辛萬苦擺啱一個可以餵倒BB的位置時，BB通常又會進入夢鄉~由於我係開刀未落得床，所以只能用一個姿勢餵人奶，就係瞓側身餵BB，呢個姿勢有難度，因為剛開完刀，你基本上唔會亂郁自己的身體怕整親傷口，右手又插緊鹽水，但BB又唔會就你位置，什麼要啜埋乳暈等等，如果我有多一對手應付就好啦~唉~

下午有個大學生到我床位問我可唔可以做問卷，好似係關於大肚婆的情緒。我見得閒冇野做，就幫佢做問卷，好心有好報，佢原來都識點餵人奶，幫左我一把！4:20 我情況理想，可以飲牛奶啦，醫生話遲啲可以食粥同飯！醫院幫BB打乙型肝炎針，唔知BB有冇喊呢。麻醉藥開始慢慢散，下午時間，我成個身喺度震，呢個時候，姑娘問我要唔要止痛藥，几大都要，啲藥又唔會影響我餵人奶~

呢一晚實在太漫長，兩小時餵BB一次，用左起碼半個小時至一個小時整醒BB，又要BB食足起碼二十分鐘真係一件超超超超超超超超難的事~~~可能做完手術，個人有啲興奮，所以我基本上呢晚只係瞓左一個鐘，有時BB發出叫聲

3:00AM，姑娘幫我用部機喺BB身上驗黃，可能佢見我已經可以自己坐喺度餵BB，佢話不如幫我拆埋個尿袋，佢好快手咁”蚊”條尿喉，好彩唔痛，佢話若果第二日朝早都去唔倒小便就要再插過尿喉架啦~

下午，我開始好擔心，因為由凌晨三點開始，BB一直都冇屎同尿，，就如新手媽媽的想法一樣，我根本都冇奶，BB點會有野食，又點會有野疴呢~我已經一直好努力咁每兩個鐘餵佢，但到BB
一直都冇大小二便。姐姐又係咁問我佢有冇，原來若果BB好耐都冇的話，可能要捉BB去抽血，到時媽媽會好心痛~

探病時間有太多人探病，實在唔係一件好事，今晚有成十個人黎探我，每次只可以有兩個人入黎，其實我真係好累，BB唔知點解突然喊得好緊要，連面色都變埋，口角同鼻孔都噴野，我嚇親，即刻按鐘叫姐姐黎，姐姐話佢冇事，好彩奶奶同老公喺度陪我。昨晚冇瞓，今日一直都好努力去餵人奶，唔明BB點解一直都冇大小二便，我覺得心力交瘁，喊左出黎。老公安慰左我一陣，奶奶話幫BB換片，BB竟然疴起屎黎，老公即刻拍片，我又再喊，今次係喜極而泣的眼淚，BB真係比你玩死我啦~老公知我辛苦，叫我不如餵杯仔奶，休息下放鬆下，只要盡力而為就可以啦~其實，想餵杯仔奶都要過倒姑娘嗰關，因為佢地一定要你比個原因佢，佢先至決定餵唔餵，當晚，我帶左個眼罩由8:30PM瞓到4:00AM，去廁所洗左個面，忍唔住去育嬰室睇BB，BB瞓得好霖，啲姑娘借勢話比翻我照顧，其實分開左一陣，我都好掛住BB~入院前，冇諗過要點樣同BB獨處，所以點樣換片、抹屎抹尿、餵人奶、包包被等，真係要事前學定先~

第三日

可能已經掌握倒時間，我又可以自由落床，心情好左好多，亦都開始習慣BB瞓時媽媽就要瞓。呢日開始上奶，
姑娘教我點樣按摩個奶奶，BB始終啜得唔係几好，我好多時奶奶都損左。今日有個姑娘同我講，要我努力啲餵，因為BB體重輕左少少，要我首先休息多啲，餵人奶都會餵得好啲，呢句說話真係令我覺得好感動，因為我都差啲忘記自己其實做完手術，係一個病人~

第四日

產後房係人來人往的地方，非常忙碌~忽然會有好多人出院，好冷清，然後又會有好多人入院，好熱鬧！其實，有啲姐姐都好好架，好有耐性咁答你問題，教你點做，不過，要睇下你夠唔夠運遇到啫~新手媽媽問姐姐的問題，令我諗翻起我剛入院時的情境，不斷不斷咁重覆~

醫生巡完順產媽媽再巡開刀媽媽，佢話我可以出院，我開心到彈起~不過，姑娘話仲要檢查一次BB的體重，唔知係咪我剛剛餵完人奶，姑娘話BB的體重都係啱啱好出倒院咋~之後，我好好彩又遇翻專教餵人奶的姑娘，臨出院前，佢教我點餵BB。出院前，我幫BB換片，佢好衰，竟然想請我飲茶，射到我的床單同被都濕左~

我都唔知係束腹帶定係花膠有用，個傷口唔係好痛，只不過有時行路時扯住扯住，反而，相比起出院後谷奶先至係最痛~

開刀媽媽的BB若果12點前出世的話，做手術為第一日，第四日的中午就可以出院，12點後出世的話，就要等多一日。

希望我的經歷可以幫倒一啲好迷惘的新手媽媽啦~

~完~