你有冇去過social security辦事處問？你係入境時辦好定自己親身去辦証？
我記得我係land完返咗香港，但三個幾月後我媽都未收到，
我再入境就自己去辦，之後就個幾月後我媽地址收到，
佢唔係掛號又唔駛簽名，最怕係寄失或被人攞咗。
身份証我當時都個幾月收到啦，又係冇掛號架，入郵箱，
如果係太耐上網check下個status好D。
至於保險要睇條款，有D係包晒，一個月俾供款，去睇醫生或專科，
每次俾幾十至一百，但有D嘢保險唔包就要現兜兜俾，
例如足科訂做鞋墊就係，就算有D嘢保險包都要預先批准，
一日未有保險公司個approval code，你就冇得郁，
例如自閉症治療療程、工傷要做物理治療等，除非你自己俾，
否則都係要等到個code至可以，就算醫生或治療師都知道，
俾咗service你先，之後保險唔認賬佢地收唔到錢。
我唔知你個個案係驗D咩，好似未到高齡產婦個年齡但又想驗羊胎水的話，
係個孕婦自己俾錢。另一個可能就係份保險係要首先扣deductibles，
扣完至會由保險支付部份錢。其實美國呢邊醫保同香港唔同，
真係冇嘢係全包，每個月供款之後，每次睇醫生都要俾copayment，
而家好多公司cheap，將醫保轉嫁去員工度，除咗每張paycheck扣錢外，
又要先扣deductibles，好多醫療程序要預先批准。
全民健保個理念係令到買唔起保險嘅人都可以有保險，
如果你真係冇錢的話，你係可以用低價錢買到保險，
但如果你唔係低收入，保險費的確係一個唔少數目。
我都識人唔買保險，話貴，到有病又話睇醫生貴唔醫，
但佢可以個個仔買一間屋，吽到末期走返大陸醫，
最後佢係由個仔火化後帶返嚟，家人見唔到最後一面。。。
真係需要醫病，幾多錢都要，保險個理念唔係出事至買，
而係未出事就已經買定個保障，有人唔退休就係唔想自己俾錢買保險，
退休後又有話保險貴唔買，誰不知邊類人最需要保險？老人家嘛。。。
更有D話怕見醫生，個個月俾錢買醫保但有病唔去睇，
話睇咗知道大件事咪仲幣？最後邊個幫佢搞？佢D仔女囉。
大部份人中國人都送小朋友去讀私校，再一至日參加幾十樣補習同活動
＞＞＞唔同意，我就唔係，我仔女讀公校，冇幾十樣補習同活動，
有學嘢，都係我要求嘅游水（求生技能必須要，佢地又鍾意），
加多一兩樣佢地鍾意嘅興趣班，我唔有錢，學嘅都係政府資助，
Park and Recreation嘅課程，又平又唔差，唔駛要佢地做專業將來搵食，
唔幫佢地報league報比賽，真係完完全全興趣。至於補習，
我仔女暫時未需要，我地兩公婆都可以應付到，去到再大D追唔上要算。
我都識人一二年級就補習，因為父母唔識英文教唔到，
唯有去補習搵人教仔女做功課，順便做埋課後托管。
交稅有咩福利？如果你諗住交咗稅就會有好多保障，我估你會失望，
就好似香港咁，中產交好多稅，但負擔唔起買屋，去輪門診又等成日，
最後都係去睇私家醫生，去到老或者有生果金，餓唔死但又餵唔飽。
我老公話交稅提供嘅保障。。。俾錢請警察、國家安全、消防、
教育、交通馬路監管、水務電話通訊管理、商業牌照、城市規劃。。。
好多嘢唔一定係有型有物式受惠，但作為居民你又已經無形中得到呢D服務。
我好記得同過我老公呻。。。交咁多稅，但我地連屋都買唔起，
咩福利都得唔到，老來連social security都可能冇得攞，所有嘢自求多福，
但其他人未必真係冇錢又呃晒D福利，咁咪好唔公平？咁努力工作做咩？
不如拎綜援！我老公話作為公民責任，對社會係要承擔，
我地係交稅養埋一班冇能力嘅人，當中有真係需要幫嘅，
有老人有冇工作能力嘅，亦有一班呃錢嘅，但冇計架，
我地係要幫同支援果班冇能力嘅人，至於呃人果D，
就要批福利果班人去守門。知道邊個呃福利，你可以去告發，
亦可以鄙視，但對於要幫果班弱勢社群，我地係有責任嘅。
或者阿Q去諗，中國人講果句「施比受更有福」套落去，
而家真係見到新一代有D小朋友好自私，或者係家中得一個獨生子女，
唔識分享，更加唔會幫人關心人，有個case係有小朋友唔記得午餐，
果日冇嘢食，但全班冇人肯分嘢俾佢食，其實一班廿人，
每日個飯盒分少少佢都唔會餓啦，點解冇人肯？
呢D老師要教，家長責任更大。有興趣班家長同我講個獨生女好自私，
想佢學下團體生活同人分享獨立，家長問我點可以好似我女咁乖，
事緣係我幫老師做義工，我唔只跟我女嘅嘢，係安排十幾廿個小朋友嘅嘢，
老師要求小朋友自己顧好自己，家長唔入得後台幫手，
小朋友自己拎袋換衫，之後換好衫放好袋排隊裝身化粧。
但好多家長跟出跟入，拎埋袋餵埋嘢食，講明集合係12點，
2點表演，中間要換衫化粧彩排，有家長次次都遲到，嚟到趕上台，
好多家長即時幫手，幾個家長服侍一個，但遲到家長冇歉意，
連sorry都冇，老實講如果我係老師，遲到一律唔準出場，咩叫責任？
家長冇教小朋友點學到？群體活動其中一環就係紀律，
家長態度影響小朋友學習，唔學下放手，自己又唔守紀律，
小朋友唔難教，最難搞係家長，大人大姐唔通鬧你咩，
你面皮夠厚我都覺得費時幫人教仔女。
離晒題添，美國生活要樣樣主動，唔好齋等，同埋唔明必須問清楚，
咁多年學到一樣最重要嘅就係一定要睇清楚至好簽名，
法律文件尤其是，人講唔好盡信，人家未必想害你，但好多人都係一知半解，
幫仔女揀學校都可以話我聽人講呢間好，但從未去過間學校，
又唔知間學校點編班，有冇課後班，幾點上堂，報完名收咗至發現唔啱。
花旗太太生活在花旗國，留意時差，你問我未必即時答到。
發表於 
返回列表
