婆媳關係今日: 0|主題: 27728

收藏本版

發帖

返回列表

跳至頁

查看: 6842 | 回覆: 68

終於決定搬！下星期就搬走！太期待了！ [複製鏈接]

12 3 4

anidacat

大宅

積分: 1249

1^#

發表於 15-12-10 02:33 |只看該作者 |倒序瀏覽 |打印

各位JM 可睇番我舊 post: 以前似一家人，而家似陌生人
之前同奶奶住樓上樓下，六七月開始叔仔結婚同老婆搬入黎就令我非常煩惱...之前呢度 JM 俾咗好多意見我，令我睇開咗，之後亦發生咗好多事，令我地決心租屋搬出去！等我慢慢講番啦～

#1 結婚週年慶祝變留係屋企叫外賣...
十一月某日係我同老公結婚週年，呢排風頭火勢，我地都好耐冇出過去拍拖...話哂結婚週年，梗係想出去食個飯乜都好啦！之前嗰日老公就同我講：「我地叫工人夜晚湊兩個細路落樓下，我地出去食個飯。」我：「真係？你俾佢地係樓下成晚咁耐？」老公：「ok 啦，一晚半晚將就吓，你咪咁死古古！」之後我地就同工人講有咁既安排。

第二朝叔仔就 send msg 黎，話工人同佢講夜晚會係樓下湊細路，就叫我地唔好，因為尋日工人同細佬落咗去一陣間（唔夠兩個鐘），佢老婆抱咗佢一陣，細佬打個個乞 chi，佢老婆今日就病咗囉喎....嘩佢講到咁，我地咪唯有唔出去，留番係樓上湊佢地囉...夜晚都係嗌茶餐廳外賣！好彩我份人唔算好計較呢D嘢，小朋友都有兩個，兩公婆慶唔慶祝都冇乜所謂嘅，但個心始終係唔 gur!!! 點解我地要為佢所有嘢負責？瞓唔到入我數，病又入我數！最火既係，佢地又係個群組度講，哎呀原來今日係你地結婚週年呀？唔緊要啦你地照出去啦，我自己入房就得！奶奶又講，結婚週年慶好重要的，你地好好出去玩。我頂...永遠都係咁，叫我地唔好落去就係私下搵老公，講好說話就係奶奶面前！唔出咪唔出囉！當我怕咗你地！

係呢件事之後，老公都灰灰地...事關我地啱啱先去完五日旅行，屋企非常清靜的，一返黎就話細佬整病叔仔老婆，佢都覺得點解次次落去嗰一陣都有說話俾我地聽。呢次之後，佢就再執執樓上，等工人姐姐可以獨自係樓上睇細路（之前佢唔肯俾工人單獨留係樓上，我地兩個都唔係屋企時就叫工人湊落樓下）。我地又搵日去買電飯煲，蒸爐同焗爐，從此工人放假我都唔使落樓下煮嘢食了！

0 0 0

私人傳訊

anidacat

大宅

積分: 1249

2^#

發表於 15-12-10 03:10 |只看該作者

#2 同奶奶 facebook 開火，然後攤牌
話說我日日都湊兩個小朋友過海返工，早出晚歸。以前仲可以去樓下時都有啲走盞，公司忙時可以留佢地係屋企，呢個月係完全唔得！咁我係D 媽媽 whatsapp group 度傾開計，有媽媽問我，你小朋友係公司日頭點瞓覺呀？咁我咪搵番張個仔係走廊瞓 high chair，工人抱住阿女瞓既相 send 俾佢地睇，講到有D 感觸，咪係 facebook 度 post 張相出黎，講吓佢地係公司既生活。我D同事都好橕我，咪搭吓嗲咁。點知第二日，我奶奶竟然 comment 我，話我虐待孩子！佢話我由朝到晚帶佢地係身邊唔係愛佢地，係虐待！又話外人（即我D同事）幫湊佢地只係一時，真正幫我既係家人！嘩我見到「虐待孩子」呢四個字真係著哂火！！！連我同事都火，忍唔住再 comment。我份人係好沉唔住氣，好火咁回我奶奶，你估我好想每日帶佢地舟車勞頓？而家咁既環境佢地唔可以留係屋企，你估我唔攰？佢地之前輪流病，我都唔敢留佢地係屋企，就係驚傳染家中既孕婦！唔通咁都叫唔體諒，虐待孩子？

其實事後睇番，真係唔應該咁認真...應該唔回，或者輕鬆地回，哎喲做乜講到咁嚴重啊？既然你咁錫兩個孫，我就放心俾佢地日日係樓下唔好出去咁多咁辛苦啦！但我真係忍唔到！跟住來來回回，奶奶大意就話家事唔應該係 fb 講（喂但我只係講吓小朋友係公司既生活咋喎...係佢主動講家事！），以前佢點幫我地做乜唔攤哂出黎講，係咪冇咗屋企人會開心啲等等之類。我D朋友同事又係咁回覆。我見情況有D失控，就唔再係 fb 講。

當晚我就 wechat 奶奶，打咗好多嘢，主要係話，多謝你一直以來既幫忙，之前我一個星期有幾日帶佢地返工，有幾日擺係屋企俾你同工人湊，係因為見你湊到好攰，我帶走佢地幾日等你都可以抖吓，點解你要話我虐待佢地？奶奶又唔回喎，我就再問，點解我次次再同你好好溝通，你就唔覆我，我係 fb 講幾句，你就公開話我不是？係咪所謂屋企人唔可以講唔好既嘢，只可以講吓風花雪月？最後佢終於覆我，講咗好多。最重要既 point 係，我地而家上番樓上生活，佢係覺得好應該，唔係因為細仔返黎，係因為佢自己想有番自己生活空間，我地一直係樓下係唔啱！睇到呢度我就明哂！原來咁多年真係我自己一廂情願，以為人地想要家庭樂，其實想要嗰個只係我！最後我同奶奶講，我而家明哂了。我份人鍾意咩都講清楚，唔鍾意有誤會。亦希望奶奶你唔好再委屈自己，如果一開始你就同我地講，你地應該去樓上，我想樓下維持係我自己的生活空間，我係絕對會明白亦會識做！點解唔一開始就講清楚呢？咁就唔使我地誤會！（我係因為老公成日落樓下睇電視食嘢我先跟佢咋喎...）佢就話唔覺係委屈，委屈等於修練之類。

講完總算了咗件心事，一直我就係想知奶奶既諗法，而家知道咗，我就可以定到自己既位！總之 keep 住係樓上，唔再落樓下，分開兩家就好，我無需再諗，奶奶係咪會想見D孫，我成日唔落去會唔會覺得我冇禮貌。以前就係會諗呢D無謂嘢，真係天真！