「喂，今晚番黎做Bar tender呀。」呢一句係我呢年聽得最多嘅說話。
近呢一年，每星期都有party，而似乎只有party就係最齊人既時候。原本諗住一班人一齊飲下酒、諗下合作嘅野，但佢地喺party到安排咗個角色俾我就係bar tender，唔知啱唔啱做，但佢哋都安排咗就唯有做下。
記得早幾年經朋友介紹，夾左個studio做co-working space，好難得搵到一班都係想做slasher而諗法又夾到嘅人。可能係因為由讀書開始，我就無咩群體生活，所以當初我用咗5分鐘就決定要夾一份租。
收咗線之後，返屋企換件衫，揀左幾支自己調嘅私伙酒膽就上左studio。場內嘅音樂、氣氛，我諗喺大廈鐵閘已經感受到。
「咁遲架？成個studio爭你咋！」
「哦，係咩？」
更多文章：【戒毒】21天建立一個習慣那麼戒掉呢？有心未必可以改變 多點體諒少點質疑
由幾個紙皮箱組成嘅一張bar枱，我拎咗張黑色枱布遮住啲紙箱，拎咗個啤酒樽頂住張A3 SIZE嘅自製Wine list，再擺咗幾個富士山shot杯做裝飾，一擺好私家酒list， 我就開始我嘅工作。
「要1 shot呀。」
「UM…你今日嘅心情係？你一個人嚟定同朋友呀？今日邊隻歌啱你feel？」
「開心呀…UM….」
「咁你呢…..」
「其實呢，我只係想要1 shot咋……」
「好，你等一陣。」
當我調好咗杯酒之後，我拍拍個客嘅膊頭，佢回一回頭就拎咗杯酒。當我想問佢覺得杯酒點嗰陣，佢已經飲完同埋轉身走。我諗你宜家問返我佢有無帶眼鏡、肥定瘦，我都唔係好答到你。
今晚人唔算好多，我又如常咁坐埋一二邊去roll煙，跟住就會有幾個host坐埋一齊smoke、吹下水。每次smoke*(註1)我地都好有默契，一坐埋一齊就會有一個負責grind *(註2)，一個負責roll*(註2)，而我總係負責pick野*(註3) 嗰個。
更多文章：【改過自新】先死而後生－吸毒致眾叛親離 瀕死邊緣醒覺尋真實自我
支煙一點著就代表我地嘅飛行*(註4)正式開始。啱啱起飛嘅時候，大家都仲係warm-up緊所以比較靜；去到中期你會見到開始有人坐近咗，有人會咬耳仔，有人會喊，大家亦都開始有共同嘅話題產生。每次我哋smoke嘅話題都離唔開理想、生意合作計劃，甚至存在嘅意義；而呢啲題目往往都可以令個旅程再唔係各自飛行， 感覺就似畢業旅行。成個行程可能係無咩計劃，但係大家都係帶住興奮嘅心情去呢趟行程。
喺成個行程期間，總係會有人鬧交、有人做和事佬，亦都有大家一齊中伏食過難食嘅野，夜晚成班人去買宵夜或者一班人圍埋傾心事；呢啲畫面過咗好多年後都會好回味。旅程總有完結嘅一日，飛機降落之後，大家拎完行李就各自趕巴士返屋企； 之後，大家嘅話題都係離不開賺錢、買樓，當初嘅夢想都變成揶揄對方又或者係自嘲嘅笑話…
聚會都由齊人，慢慢變成5個、2 個人，又或者再無人應機。最後，大家都各有各生活。當我望住D煙絲，我好明白我同呢班人既維繫就只有呢支大麻煙，煙熄左大家都係各自生活，而我係想要啲咩嘅關係呢?
又有新一支ROLL 好既煙傳到過嚟，我仲好唔好點著呢支煙?
註1: 吸食大麻的代號
註2: 製作大麻煙的工具及捲煙動作
註3 : 購買大麻的代詞
註4: 大麻用家會用飛行或旅程(TRIP)形容吸食的過程
更多文章：【媽媽傳奇】妳是妳本身的傳奇 以「VASK」發掘年輕媽媽無限可能性
後記：
近年禁毒處以「大麻是毒品」針對青少年吸食大麻作為宣傳教育，但吸食趨勢仍未有回落，主因可能係宣傳教育中，未能勾畫大麻於青少年間「扮演」的角色。
青少年對朋輩的重視，因他們正經歷建立自我形象的成長需要；青少年吸食大麻，似是輔助青少年打破隔膜，建立共同話題的媒界。使他們可與同儕間連繫並建立自我形象。
同時，社會氣氛的抑壓及國際上對大麻的立法態度，亦令大麻熱潮近年於香港捲起。或許社會大眾在怪責現時年青人缺乏溝通技巧，放大青少年不足的同時，亦可試問我們曾有協助青少年裝備以上的技巧，以助他們在成長上面對不同選擇嗎?
若想了解更多有關藥物濫用與家人支援的資訊及服務，可瀏覽PS33尖沙咀中心網站或致電2368 8269向當值社工查詢。
作者：謝芷瑩 （香港基督教服務處PS33尖沙咀中心註冊社工，熱愛紋身藝術的90後。）
