新一份施政報告出左黎，最主要一樣就係放寬左按揭，800萬做9成，如果你入息過唔到壓測就可以另外加保費，去解決。我先唔講呢個政策係好定壞，我想講講呢個政策誰人受惠? 想買樓既你，想換樓既你? 還是想賣樓既你? 我深信最受惠既係發展商。當然今次樓花係唔可以，但如果一手現樓又無話唔得，咁即係最終發展商又可以高價去推一手樓，今次重要唔洗出發展商獨門秘技二按，即係個發展商唔洗借錢過你，直接銀行俾，咁當然係爽喇，收貴D又唔洗借錢俾你。
但大家可能會係咁出去睇樓了，亦正正咁既政策，會做成中上價樓又會再一次既拉升，之前細價樓價狂升，今次就到中大價樓了，呢個政策，就幫左一班人上車，發展商又可以賣貴D，去貨又快D，而二手樓賣家即時又賣貴左，銀行又多左生意，個個都笑晒咁去買樓同賣樓，幾爽。我又想問下，個個都賺錢，邊個蝕錢?????
開始重點，我自己對呢個政策完全唔支持，相反重覺得有D危險，因為如果有咁高入息去買樓，做到按揭，我又想問點解佢之前無首期去買樓? 高收入低儲蓄，即係話你知，呢班人係高消費人士，餐搵餐清。而家呢個政策係夾硬俾左一班無實力既人去買樓上車，可能會部份幫左換樓客，但我所見最驚既係果班無乜首期，但想上車既人。今時今日咁既環境，經濟一逆轉，你無左份工，我就真係唔知你點供層樓了。
今次呢個政策確實會幫左一班人，就係高薪公務員，鐵飯碗，唔怕兜，佢地可以捱到尾。大家見到今明兩年既經濟絕不樂觀，如果你高人工，又係私人企業打工就更應該小心。呢個政策，係一把雙面仞，當樓價下行時推出，絕對係德政，當樓價處於高峰，就好似火上加油一樣。呢個政策正正可以俾大家見到，當水退時，邊個真正無褲著了。
