龔成老師你好，其實睇完你d片都有啟發。
其實我今年大學畢業，係上星期同一位認識多年嘅好朋友食飯，佢讀唔成書，而且已投身社會，儲左D錢。我哋平時就係用你教嘅價值投資法去搵啲股買左佢放係度一排等佢倍升或者升5成以上放。而我哋係一星期前食飯有個idea，就係想搞XXXXXX。
我好記得你係好多片到話成功同失敗嘅人，問題不在大家嘅能力上，兩者分別係前者係唔怕難只會做不斷試，而後者就只想不做，得個諗字怕呢樣嗰樣。
我同我朋友都好記得呢段說話，我地嗰晚食完飯返到屋企即時開始準備，希望可以係幾個月後開始試業。
本金唔算好多，而且我地都傾好，今次既XXXXXX希望可以run到3年，甚至5年。我哋目標只求回本唔求賺錢，亦甚至最少會蝕錢。
當然你可能會有個問號，但其實我地真正想係希望而家20出頭，大家未有家庭負擔，亦唔洗交家用嘅時候，希望可以用小小錢，去換一次搞生意嘅經驗。呢盤生意一定唔會做一世，亦唔會話可能係5至10年。
想問下你既意見，如果比著係你好似我呢個年紀咁嘅情況，你建唔建議我咁做。個金額其實唔係好大，如果比著係你，你覺得用嚟買一次做生意嘅經驗，學下嘢？定係用嚟繼續投資係啲股票到？
我今次做生意嘅本金，其實係早幾年中生製藥倍升所賺到嘅錢黎。我已經放哂啦，你認為繼續投資股票定係試一次年輕嘅「賭博」會比較好？謝謝!
更多文章：【理財個案2021】買樓定買股票的決定
個案重點：
‧20出頭，大學畢業生
‧未有家庭負擔
‧想創業
重點目標：
‧創業
‧維持業務3-5年
‧生意收支平衡
‧如何在投資股票和創業中取捨
龔成老師分析：
我好鼓勵你地去試，你哋的年齡，正正係大膽去做的好時機，因為你有膽，同埋「輸得起」，另外，創業一定會經歷好多困難，呢個係一個好好的學習。
好多人就係唔敢試、唔敢輸，所以一世都做一D唔想做的野。你可能會輸，但輸完再起身，試多幾次，總會贏！
講返你嗰度，你哋首先要做資料搜集，同區的對手有多少，收費幾多，你要從顧客的身份不斷「參考」別人，那個是較成功的，點解會成功。
即是說，你一定要了解當區，一個區可以有多少間，顧客是甚麼年齡，點樣引佢地來，點樣能要佢地再光顧。
比起市場的對手，你的強項是咩？點解要去你度唔去對手度？你哋的財力唔多，要同人鬥強無得鬥，但你地可以鬥「與別不同」，在定位上找到你哋的特點。
另外，點樣做宣傳，點樣有客，客戶唔會自己上來，點樣識到你地？具體的方法係點？
同時，除了初期的投資外，每月的成本點？各方都要計清楚，你地而家唔係玩玩下，而係同市場鬥，只要唔小心，就會輸，唔會有人同情，所以一定要做足功課。要做，就要認真做！
另外，你地年輕有優勢，想想有D咩係比人強，有無D咩有創意的方法。我無啲咩你哋會識而人地唔識，至於學生先有的網絡等等。
記住，成功者失敗者最大的分別，係夠唔夠膽做，你其實已行緊成功者嗰條路，但當中一定有困難。順境時，個個都做到，但面對困難時，就係真正分辨成功人士同一般人的時候，加油！
若然你有問題想向龔成老師發問，可在龔成的fb專頁中inbox龔成。
