上一篇提及到，小周董7年來除咗用Zoom上堂同做功課外，兩兄弟都好少用電子產品。我收到好多朋友pm問，無電話無iPad，小朋友7年來玩乜？
首先唔可以一刀切，電子產品係一件教壞小朋友的東西，始終年代進步，電子產品有時真係可以令到小朋友加快某啲學習，而我當初唔想佢哋接觸太多嘅原因，只係想培養佢哋閱讀嘅興趣。小朋友少睇畫面豐富嘅電子產品，的確會較難有動力拎起本書，所以大小周董由細到大，對閱讀都唔抗拒，哥哥仲對文字特別有興趣，好多時會主動學習一啲中或英文生字。
平時除咗睇書，生活上另一主要興趣就係畫畫。暫時大小周董都未有一啲天生嘅創作力，所以好多時都係Copy一啲書嘅封面或者…亂畫，有時只係填下顏色，佢哋都會好開心！
更多文章：【港識教養】仔女出街頑皮？爸媽「正面指示」成聽話關鍵
因為疫情，多咗時間喺屋企，但意外收獲係哥哥會想主動學一啲新嘢，例如想整嘢食甚至想學織冷頸巾。雖然好似有啲女性化，但小朋友有呢個心我都會盡量配合，一齊學一齊試一齊撞板，我覺得都會係一個幾好笑嘅回憶。
另外我覺得不論男仔定女仔，都要有自理能力，畀佢哋試下幫忙做家務，細佬3歲就做一啲簡單家務，例如拎衣架，將窗簾鈎除下，哥哥就掃下地，有時洗下米或者教佢煮下啲簡單餸︰蕃茄炒蛋！ 佢哋唔會覺得係苦工，仲好開心可以幫手呢！
我都明始終畀部iPad佢哋，可以還自己一個Me Time。如果堅持無電子產品，大人就要有心理準備。小朋友創意無限，當佢自己諗有咩玩嘅時候，有時都會嚇你一跳，例如拎個膠袋當帽、或自己用紙剪咗隻拖鞋出嚟等等。
小朋友正常都對電子產品都有一種渴望，點解我會知？ 我見佢兩兄弟可以用2個舊電話套，或者拎個紙盒出嚟扮傾電話、扮Send Message仲有扮打機，有時可以扮成個鐘，哈哈！另外，出去食飯時佢哋見到隔籬枱小朋友每人一部電話或iPad，細佬竟然拎本餐牌扮打字，我就知佢哋內心都會有一種渴望，所以正如我頭先所講，未必需要一刀切完全唔畀小朋友用電子產品，尤其哥哥上咗小學真係好難完全唔用，但適當地使用同埋控制時間才是家長需要注意嘅地方，我知佢哋都會有呢個好奇心，但暫時未去到好大渴求，所以我就堅持住先。
更多文章：【教育方程式】從小培養孩子的幽默感 父母可以做三件事
更多文章：如何面對孩子不當行為？教你「故意忽視」策略3大原則！
總結7年間以我個人經驗，佢哋少用電子產品除咗可以令到小朋友加強閱讀興趣，小朋友更加可以發揮多啲小宇宙，搵多啲不同嗜好及娛樂，而有兄弟姐妹的話，佢哋關係都會比較親密，好似大小周董兩兄弟，佢哋會有更多時間相處，一齊玩一齊睇書做乜都一齊，所以佢哋感情真係好好。
雖然我呢份堅持可能有人覺得好變態好無謂，話我同時代脫節，而的確我因為咁而少咗好多私人時間，但我知佢哋越大就必需跟隨時代步伐走，使用電腦始終方便好多，亦無可能唔用同唔識，但暫時佢哋仲細，有一個方法可以令佢哋喜歡閱讀，而亦可以同時加深我哋一家人的親子關係，所以我都覺得係「得」多過「失」呢！
